ಫಾಸಿಲ್ ಫ್ಯುಯೆಲ್ – ಪಳೆಯುಳಿಕೆ ಇಂಧನ – ಜನರು ಶಕ್ತಿಯ ಆಕರವಾಗಿ ಬಳಸುವ ಕಲ್ಲಿದ್ದಲು, ತೈಲ ಅಥವಾ ಜೈವಿಕ ( ಸಹಜ) ಅನಿಲದಂತಹ ಇಂಧನಗಳು.‌ ಇವುಗಳು ಜೀವಿಗಳ ಅವಶೇಷಗಳಿಂದ ರೂಪುಗೊಂಡಿರುತ್ತವೆ.  ಇವುಗಳಲ್ಲಿ ಅಧಿಕ ಪ್ರಮಾಣದ ಜಲಜನಕ ಅಥವಾ ಇಂಗಾಲ ಇರುತ್ತದೆ‌.

ಫಾರ್ಮುಲಾ – ಸೂತ್ರ –  (ಅ)ರಸಾಯನ ಶಾಸ್ತ್ರದಲ್ಲಿ ಒಂದು ಸಂಯುಕ್ತವಸ್ತುವನ್ನು ಅಕ್ಷರ ರೂಪದಲ್ಲಿ ನಿರೂಪಿಸುವುದು. ‌ಆ ವಸ್ತುವಿನಲ್ಲಿರುವ ಪರಮಾಣುಗಳಿಗೆ ಸಂಕೇತವನ್ನು ನೀಡುವ ಮೂಲಕ ಅದರ ಸೂತ್ರವನ್ನು ಬರೆಯುತ್ತಾರೆ.

(ಆ). ಗಣಿತ ಮತ್ತು ಭೌತಶಾಸ್ತ್ರದಲ್ಲಿ ಒಂದು ನಿಯಮ ಅಥವಾ ಸಿದ್ಧಾಂತವನ್ನು ಬೀಜಗಣಿತದ ಸಂಕೇತಗಳಿಂದ ಸೂಚಿಸುವುದು. 

ಫೋರ್ಸ್ ರೇಷ್ಯೋ‌ – ಬಲದ ಅನುಪಾತ – ಯಂತ್ರವೊಂದಕ್ಕೆ ಸಂಬಂಧಿಸಿದಂತೆ ಅದಕ್ಕೆ ಕೊಡುವ ಬಲ( ಎಫರ್ಟ್) ಕ್ಕೂ ಅದು ಕೊಡುವ ಬಲಕ್ಕೂ ( ಲೋಡ್) ಇರುವ ಅನುಪಾತ. ಇದಕ್ಕೆ ಯಾವುದೇ ಮೂಲಮಾನವಿಲ್ಲ, ಆದರೆ ಇದನ್ನು ಶೇಕಡಾವಾರು ಲೆಕ್ಕದಲ್ಲಿ ನಿರೂಪಿಸುತ್ತಾರೆ.  ಕಡಿಮೆ ಬಲ ಕೊಟ್ಟು ಹೆಚ್ಚು ಬಲ ಪಡೆಯುವಂತೆ ಯಂತ್ರಗಳನ್ನು ರೂಪಿಸಲು  ಯಾವಾಗಲೂ  ಪ್ರಯತ್ನಿಸುತ್ತಾರೆ.

ಫೋರ್ಸ್ಡ್ ಆಸ್ಸಿಲೇಷನ್ – ಬಲವಂತದ ಆಂದೋಲನ – ಒಂದು ವಸ್ತು ಅಥವಾ ವ್ಯವಸ್ಥೆಯ ಸಹಜ ಆವರ್ತನದ್ದಲ್ಲದ ಆಂದೋಲನ. ಬಲವಂತದ ಆಂದೋಲನವನ್ನು ನಿಯತವಾದ ಬಾಹ್ಯ ಬಲದಿಂದ ಪ್ರೇರಿಸಬೇಕಾಗುತ್ತದೆ.

ಫೋರ್ಸ್ಡ್ ಕನ್ವೆಕ್ಷನ್ – ಬಲವಂತದ ಉಷ್ಣವರ್ಗಾವಣೆ – ಬಿಸಿಯಾಗಿರುವ ದ್ರವವನ್ನು ಒಂದು ಜಾಗದಿಂದ ಇನ್ನೊಂದು ಜಾಗಕ್ಕೆ ರೇಚಕ ( ಪಂಪು) ಅಥವಾ ಪಂಖಾದಿಂದ ತಳ್ಳಿ ಬಲವಂತವಾಗಿ ವರ್ಗಾಯಿಸುವ ಕ್ರಿಯೆ.

ಫೋರ್ಸ್‌ – ಬಲ – ನಿಷ್ಕ್ರಿಯ ವಸ್ತುವೊಂದರ ದ್ರವ್ಯವೇಗವನ್ನು ( ಮೊಮೆಂಟಮ್ ಅನ್ನು) ಬದಲಾಯಿಸುವ ಮಾಡುಗ ಇದು‌. ಬಲವು ದ್ರವ್ಯವೇಗದ ಹೆಚ್ಚುವಿಕೆಯ ಗತಿಗೆ ಸಮಾನುಪಾತದಲ್ಲಿರುತ್ತದೆ.

ಫೊರ್ಬಿಡನ್ ಬ್ಯಾಂಡ್ – ನಿಷಿದ್ಧ ಪಟ್ಟಿ – ಒಂದು ಘನವಸ್ತುವಿನ ಹರಳಿನಲ್ಲಿ ಯಾವ ಎಲೆಕ್ಟ್ರಾನು ಸಹ ಪ್ರವೇಶಿಸದ/ತನ್ನದಾಗಿಸದ ಶಕ್ತಿ ಪಟ್ಟಿ ಇದು‌. ಶಕ್ತಿಪಟ್ಟಿಗಳ ಚಿತ್ರಗಳಲ್ಲಿ ಇವು ಖಾಲಿಜಾಗಗಳಾಗಿ ಕಂಡು ಬರುತ್ತವೆ.