ಕನ್ನಡ ಕನ್ನಡಿ

ಫಾಸಿಲ್ ಫ್ಯುಯೆಲ್ – ಪಳೆಯುಳಿಕೆ ಇಂಧನ – ಜನರು ಶಕ್ತಿಯ ಆಕರವಾಗಿ ಬಳಸುವ ಕಲ್ಲಿದ್ದಲು, ತೈಲ ಅಥವಾ ಜೈವಿಕ ( ಸಹಜ) ಅನಿಲದಂತಹ ಇಂಧನಗಳು.‌ ಇವುಗಳು ಜೀವಿಗಳ ಅವಶೇಷಗಳಿಂದ ರೂಪುಗೊಂಡಿರುತ್ತವೆ.  ಇವುಗಳಲ್ಲಿ ಅಧಿಕ ಪ್ರಮಾಣದ ಜಲಜನಕ ಅಥವಾ ಇಂಗಾಲ ಇರುತ್ತದೆ‌.

ಫ್ಯೂಕೋ ಪೆಂಡ್ಯುಲಮ್  –  ಫ್ಯೂಕೋರ ಲೋಲಕ –  

ಭೂಮಿಯ ಸುತ್ತುವಿಕೆಯಿಂದಾಗಿ ನಿಧಾನವಾಗಿ ತಿರುಗುವ ಮೇಲ್ಮೈ ಹೊಂದಿರುವ ಒಂದು ಸರಳ ಲೋಲಕ ಇದು‌‌. 1851 ರಲ್ಲಿ ಫ್ರೆಂಚ್ ಭೌತವಿಜ್ಞಾನಿಯಾದ  ಜೀನ್ ಬರ್ನಾರ್ಡ್ ಲಿಯೋನ್ ಫ್ಯೂಕೋರು  ಇದನ್ನು ಕಂಡುಹಿಡಿದರು. ‌ಭೂಮಿಯ ಸುತ್ತುವಿಕೆಗೆ ಮೊದಲ ನೇರ ಸಾಕ್ಷಿ ಕೊಟ್ಟದ್ದು ಈ ಲೋಲಕ.

ಫೋರಿಯರ್ ಸೀರೀಸ್ – ಫೋರಿಯರ್ ಸರಣಿ – ನಿಯತಕಾಲಿಕ ಗುಣಕವನ್ನು ತ್ರಿಕೋನಮಿತಿಯ (ಟ್ರಿಗೋನೋಮೆಟ್ರಿ) ಗುಣಕಗಳಾಗಿ‌ ವಿಸ್ತರಿಸಿ ಬರೆಯುವುದು.  ಇದನ್ನು ಮೊದಲು‌ ಫ್ರಾನ್ಸ್ ದೇಶದ ಗಣಿತಜ್ಞರಾದ ಜೆ.ಬಿ.ಜೆ. ಫೋರಿಯರ್‌ ( 1768 – 1830) ಅವರು ಸಂಕೀರ್ಣ ಅಲೆಯ ಸುಸಂಬದ್ಧ ಅಂಗಗಳನ್ನು ಕಂಡುಹಿಡಿಯಲು ಬಳಸಿದರು.

ಫೋರ್ತ್ ಡೈಮೆನ್ಶನ್ – ನಾಲ್ಕನೆಯ ಆಯಾಮ   – ಅವಕಾಶ ಮತ್ತು ಸಮಯದ ನಿರಂತರತೆಯ ಒಂದು ಆಯಾಮ ಇದು. ಉದ್ದ, ಅಗಲ, ದಪ್ಪಗಳನ್ನು ಹೊರತು ಪಡಿಸಿದ ಒಂದು ಆಯಾಮ.‌

ಫ್ರೇಮ್ ಆಫ್ ರೆಫರೆನ್ಸ್ – ಪರಾಮರ್ಶನ ಚೌಕಟ್ಟು – ಇದು ನಿರ್ದೇಶಕ ಅಕ್ಷರೇಖೆಗಳ ಒಂದು ಚೌಕಟ್ಟು. ಇದರ ಸಹಾಯದಿಂದ ಸಮಯದೊಂದಿಗೆ ಬದಲಾಗುವ ವಸ್ತುವಿನ ಸ್ಥಾನವನ್ನು ಗುರುತಿಸಬಹುದು. 

ಫ್ರಾನ್ ಹಾಫರ್ ಲೈನ್ಸ್ – ಫ್ರಾನ್ ಹಾಫರ್ ಗೆರೆಗಳು – ಸೂರ್ಯನ ಬೆಳಕಿನಿಂದ ಉಂಟಾಗುವ ವರ್ಣಪಟಲದಲ್ಲಿನ ಗಾಢ ಕಪ್ಪು ಗೆರೆಗಳು. ಈ ಗೆರೆಗಳ ತರಂಗಾಂತರಗಳನ್ನು, ತರಂಗಾಂತರಗಳೊಂದಿಗೆ ಬದಲಾಗುವ ಪರಿಮಾಣಗಳನ್ನು ಗುರುತಿಸಲು ಪರಾಮರ್ಶನ‌ ಮಾನದಂಡಗಳಾಗಿ ಬಳಸುತ್ತಾರೆ. ‌ಉದಾಹರಣೆಗೆ, ವಕ್ರೀಭವನ ಸ್ಥಿರಾಂಕಗಳು.‌

ಫ್ರೀ ಎನರ್ಜಿ – ಮುಕ್ತ ಶಕ್ತಿ – ಉಪಯುಕ್ತ ಕೆಲಸ ಮಾಡಲು ಒಂದು ವ್ಯವಸ್ಥೆಗೆ  ಇರುವ ಸಾಮರ್ಥ್ಯ.

ಫ್ರೀ ಆಸ್ಸಿಲೇಷನ್ –  ಮುಕ್ತ ಆವರ್ತನ –  ಒಂದು ವ್ಯವಸ್ಥೆ ಅಥವಾ ವಸ್ತುವಿನ ಸಹಜ ಆವರ್ತನದಲ್ಲಿ ಇರುವ ಆಂದೋಲನ.‌ ಲೋಲಕವೊಂದರ  ಈ ಮುಕ್ತ ಆಂದೋಲನವು ಅದರ ಉದ್ದ ಮತ್ತು ದ್ರವ್ಯರಾಶಿಯನ್ನು ಅವಲಂಬಿಸಿರುತ್ತದೆ.

ಫ್ರೀ ಸರ್ಫೇಸ್‌‌ ಎನರ್ಜಿ – ಮುಕ್ತ ಮೇಲ್ಮೈ ಶಕ್ತಿ – ತೆರೆದುಕೊಂಡ ಒಂದು ಮೇಲ್ಮೈ ಯಲ್ಲಿನ ಏಕಘಟಕ ಪ್ರದೇಶವು ಹೊಂದಿರುವ ಶಕ್ತಿ.

ಫ್ರೀಝಿಂಗ್ – ಹೆಪ್ಪುಗಟ್ಟುವಿಕೆ – ದ್ರವ ಸ್ಥತಿಯಿಂದ ಘನ ಸ್ಥಿತಿಗೆ ಮಾರ್ಪಾಡಾಗುವ ಪ್ರಕ್ರಿಯೆ.