ಇದ್ದಲು – ಮರವನ್ನು ಅಥವಾ ಇನ್ಯಾವುದಾದರೂ ಸಾವಯವ ವಸ್ತುವನ್ನು ಗಾಳಿಯ ಗೈರುಹಾಜರಿಯಲ್ಲಿ ಸುಟ್ಟಾಗ ಉಂಟಾಗುವಂತಹ ಇಂಗಾಲದ ಒಂದು ರೂಪ. ಇದಕ್ಕೆ ನಿಶ್ಚಿತ ಆಕಾರವಿರುವುದಿಲ್ಲ. 

 ಪ್ರತ್ಯೇಕಿಸುವ ಯಂತ್ರ – ಬೇರೆ ಬೇರೆ ಸಾಂದ್ರತೆಯುಳ್ಳ ಘನವಸ್ತುವಿನ ಅಥವಾ ದ್ರವವಸ್ತುವಿನ ಕಣಗಳನ್ನು ಒಂದು ಕೊಳವೆಯಲ್ಲಿ ಅಡ್ಡಡ್ಡಕ್ಕೆ ತಿರುಗಿಸಿ, ಅವುಗಳನ್ನು ಪ್ರತ್ಯೇಕಿಸುವ ಒಂದು ಉಪಕರಣ. ಹೆಚ್ಚು ಸಾಂದ್ರರೆಯುಳ್ಳ ಕಣಗಳು ಹೆಚ್ಚಿನ ತ್ರಿಜ್ಯದಲ್ಲಿ ಸುತ್ತಿ ಕೊಳವೆಯುದ್ದಕ್ಕೂ ಚಲಿಸುತ್ತವೆ, ಮತ್ತು ಇವು ಕಡಿಮೆ ಸಾಂದ್ರತೆಯುಳ್ಳ ಕಣಗಳನ್ನು ಇನ್ನೊಂದು ತುದಿಗೆ ದೂಡುತ್ತವೆ.

ಕೇಂದ್ರಗಮನಿ ಬಲ – ಒಂದು ವಸ್ತುವಿನ ಮೇಲೆ ವರ್ತಿಸಿ ಅದನ್ನು ವೃತ್ತಾಕಾರಾದಲ್ಲಿ ಸುತ್ತುವಂತೆ ಮಾಡುವ ಬಲ. ಇದು ವೃತ್ತಕೇಂದ್ರದ ದಿಕ್ಕಿನಲ್ಲಿ ವರ್ತಿಸುತ್ತದೆ.

ದ್ರವ್ಯರಾಶಿ ಕೇಂದ್ರಬಿಂದು ಅಥವಾ ದ್ರವ್ಯಕೇಂದ್ರ – ಒಂಧು ಸಮರೂಪೀ ಘನವಸ್ತುವಿನ ದ್ರವ್ಯರಾಶಿಯ ಕೇಂದ್ರಬಿಂದು.

ಮಧ್ಯಬಿಂದು ಸಮಕಟ್ಟು – ಒಂದು ಬಿಂದುವಿಗೆ ಸಂಬಂಧ ಪಟ್ಟಂತೆ ಸಮಕಟ್ಟನ್ನು ಹೊಂದಿರುವುದು. ಮಧ್ಯಬಿಂದು ಸಮಕಟ್ಟುಳ್ಳ ಹರಳುಗಳಲ್ಲಿ ಅವುಗಳ ಮೇಲ್ಮೈಗಳು ಸಮಾನಾಂತರ ಜೋಡಿಗಳಾಗಿ ಕಾಣಸಿಗುತ್ತವೆ.

ಲೋಹಪಿಂಗಾಣಿ – ಲೋಹ ಮತ್ತು ಪಿಂಗಾಣಿಗಳು ಒಟ್ಟು ಸೇರಿದಂತಹ ಒಂದು ವಸ್ತುವನ್ನು ಸೂಚಿಸುತ್ತದೆ.  ಹೆಚ್ಚಿನ ಉಷ್ಣತೆ, ತುಕ್ಕು. ಉಜ್ಜುವಿಕೆ ಮುಂತಾದವುಗಳಿಗೆ ಜಗ್ಗದ ಅತ್ಯಂತ ಕಠಿಣ ವಸ್ತು ಇದು.