ಫೆಟೀಗ್ – ವೈಫಲ್ಯ ( ಮುರಿದು ಬೀಳುವಿಕೆ ) – ಮತ್ತೆ ಮತ್ತೆ ಬೀಳುವ ಒತ್ತಡದಿಂದಾಗಿ ಒಂದು ವಸ್ತುವು ಮುರಿದು ಬಿದ್ದು ತನ್ನ ಕೆಲಸದಲ್ಲಿ ವಿಫಲಗೊಳ್ಳುವುದು.

ಫಾಸ್ಟ್ ರಿಯಾಕ್ಟರ್ – ವೇಗದ ಅಣುಸ್ಥಾವರ – ವೇಗ ನಿರೋಧಕವನ್ನು ಬಳಸದಿರುವ ಅಥವಾ ತುಸು ಪ್ರಮಾಣದಲ್ಲಷ್ಟೇ ಬಳಸುವ ಅಣುಸ್ಥಾವರ.

ಫಾಸ್ಟ್ ನ್ಯೂಟ್ರಾನ್ – ವೇಗದ ನ್ಯೂಟ್ರಾನು –  ಅಣುಬೀಜಕೇಂದ್ರದ ವಿದಳನದಿಂದ ಉತ್ಪತ್ತಿಯಾದ ಹೆಚ್ಚಿನ ಶಕ್ತಿ ಹೊಂದಿರುವ ನ್ಯೂಟ್ರಾನು.

ಫಾರ್ ಪಾಯಿಂಟ್ –  ತುಟ್ಟತುದಿಯ ಬಿಂದು –   ಕಣ್ಣಿನ ಅಕ್ಷಿಪಟಲದ ಮೇಲೆ ಬಿಂಬವು ರೂಪುಗೊಳ್ಳಲು ಸಾಧ್ಯ ಇರುವ ಅತ್ಯಂತ ದೂರದ ಬಿಂದು ಇದು.

ಫಾರ್ ಇನ್ ಫ್ರಾರೆಡ್ – ತುಟ್ಟತುದಿಯ ಅಧೋಕೆಂಪು -ವಿದ್ಯುತ್ಕಾಂತೀಯ ವರ್ಣಪಟಲದಲ್ಲಿನ ಅಧೋಕೆಂಪು ಅಲೆಪ್ರದೇಶದ ಅತ್ಯಂತ ಉದ್ದದ ತರಂಗಾಂತರವುಳ್ಳ ಭಾಗಗಳು.

 ಫ್ಯಾಕ್ಟೋರಿಯಲ್ – ಆದಿಗುಣಕ‌ – ಒಂದು ದತ್ತ ಸಂಖ್ಯೆ ಹಾಗೂ ಅದರ ಕೆಳಗಿರುವ ಎಲ್ಲ ಪೂರ್ಣಾಂಕಗಳ ಗುಣಲಬ್ಧ. ಸಾಮಾನ್ಯವಾಗಿ ಇದನ್ನು‌N! ಎಂದು ಬರೆಯುತ್ತಾರೆ. 

ಫ್ಯಾರಡ್( F) – ಫ್ಯಾರಡ್( F) – ವಿದ್ಯುತ್ ಸಾಮರ್ಥ್ಯದ ಎಸ್.ಐ.ಮೂಲಮಾನ. ಭೌತವಿಜ್ಞಾನಿ ಮೈಕೆಲ್ ಫ್ಯಾರಡೆಯ( ಕಾಲ 1791-1867) ನೆನಪಿನಲ್ಲಿ‌ ಇಟ್ಟ ಹೆಸರು ಇದು.‌

ಫಾಲ್ ಔಟ್ – ವಿಕಿರಣ ಪಾತ – ಅಣು ಸ್ಥಾವರಗಳು ಸ್ಫೋಟಗೊಂಡಾಗ ವಾತಾವರಣಕ್ಕೆ ಬಂದು ಸೇರಿಕೊಳ್ಳುವ ವಿಕಿರಣ ವಸ್ತುಕಣಗಳು.‌ ಇವು‌ ಮನುಷ್ಯನ ಹಾಗೂ ಪ್ರಾಣಿಗಳ ದೇಹಕ್ಕೆ ತುಂಬ ಅಪಾಯವನ್ನುಂಟುಮಾಡುತ್ತವೆ.