ಎಕ್ಸೋಎರ್ಜಿಕ್ – ಶಕ್ತಿದಾಯಕ  ಪ್ರಕ್ರಿಯೆ – ಶಕ್ತಿಯನ್ನು ಹೊರಸೂಸುವ ಬೀಜಕೇಂದ್ರದ ಪ್ರಕ್ರಿಯೆಯನ್ನು ಸೂಚಿಸುವ ಪದ.

ಎಕ್ಸಿಟೆನ್ಸ್ – ಕಾಂತಿ ಸೂಸುವಿಕೆ – ಒಂದು ಮೇಲ್ಮೈಯ ಏಕಘಟಕ ವಿಸ್ತೀರ್ಣದ ಪ್ರದೇಶವು ಹೊರಸೂಸುವ ಪ್ರಕಾಶಮಾನವಾದ ಅಥವಾ ಹೊಳೆಯುವ ಬೆಳಕು. ಮುಂಚೆ ಇದನ್ನು emittance (ಎಮಿಟೆನ್ಸ್) ಎಂದು ಕರೆಯುತ್ತಿದ್ದರು.

ಎಕ್ಸ್ ಹಾಸ್ಟ್ ವೆಲಾಸಿಟಿ – ಹೊರಚಿಮ್ಮುವ ವೇಗ – ರಾಕೆಟ್ಟಿನಲ್ಲಿನ ಉರಿದ ಅನಿಲಗಳು ಹೊರಕ್ಕೆ ಚಿಮ್ಮುವ ವೇಗ.

ಎಕ್ಸ್ ಕ್ಲೂಷನ್ ಪ್ರಿನ್ಸಿಪಲ್ (ಪೌಲೀಸ್) –  (ಪೌಲಿಯವರ) ಬೇರೆಗೊಳಿಸುವ ಸಿದ್ಧಾಂತ – ಒಂದು ವ್ಯವಸ್ಥೆಯಲ್ಲಿನ‌ ಯಾವ ಎರಡು ಕಣಗಳೂ, ಉದಾಹರಣೆಗೆ ಒಂದು ಪರಮಾಣುವಿನಲ್ಲಿನ‌ ಎರಡು ಎಲೆಕ್ಟ್ರಾನುಗಳು ಏಕರೂಪಿಯಾದ (ಒಂದೇ ಅಂದರೆ ಅದದೇ) ಕ್ವಾಂಟಂ ಸಂಖ್ಯೆಗಳನ್ನು ಹೊಂದಿರಲು ಸಾಧ್ಯ ಇಲ್ಲ ಎಂಬ ಸಿದ್ಧಾಂತ ಇದು. 

ಎಕ್ಸೈಟಾನ್ – ಉತ್ತೇಜಿತ ಪರಮಾಣುವಿನಂತೆ ವರ್ತಿಸುವಂತಹ ಒಂದು ಎಲೆಕ್ಟ್ರಾನು‌ ಹಾಗೂ ಒಂದು ರಂಧ್ರಗಳ ಕಣಜೋಡಿ.

ಎಕ್ಸೈಟೇಷನ್ – ಉತ್ತೇಜನ‌ – ಒಂದು ಬೀಜಕೇಂದ್ರ/ ಎಲೆಕ್ಟ್ರಾನು/ ಅಣು/ವಿದ್ಯುದಂಶವು ಶಕ್ತಿಯನ್ನು ಪಡೆದುಕೊಂಡು ತಾನು ಇರುವ ಸಾಮಾನ್ಯ ಸ್ಥಿತಿಗಿಂತ ಹೆಚ್ಚು ಶಕ್ತಿಯ (ಕ್ವಾಂಟಂ -ಶಕ್ತಿ ಪೊಟ್ಟಣ) ಸ್ಥಿತಿಗೆ ಏರುವುದು.

ಎಕ್ಸ್ ಚೇಂಜ್ ಫೋರ್ಸ್ – ವಿನಿಮಯ ಬಲ – ಎರಡು ಅಣುಗಳ ನಡುವೆ ಕಣಗಳ ವಿನಿಮಯದಿಂದ ಉತ್ಪತ್ತಿಯಾಗುವ ಬಲ.‌ ಈ ಬಲದಿಂದಾಗಿ ಆ ಅಣುಗಳ ನಡುವೆ ಬಂಧವೊಂದು‌ ಸಾಧ್ಯವಾಗುತ್ತದೆ.