ಕನ್ನಡ ಕನ್ನಡಿ

ಇಂಗಾಲ ಚಕ್ರ –ಪರಮಾಣು ಬೀಜಕೇಂದ್ರಗಳ ನಡುವೆ ನಡೆಯುವ ರಾಸಾಯನಿಕ ಕ್ರಿಯೆಗಳ ಒಂದು ಸರಣಿ. ಜಲಜನಕ ಬೀಜಕೇಂದ್ರಗಳು ಹೀಲಿಯಂ ಬೀಜಕೇಂದ್ರವಾಗಲು ಸಂಯೋಗಗೊಳ್ಳುವಾಗ ಇಂಗಾಲವು ವೇಗವರ್ಧಕವಾಗಿ ವರ್ತಿಸುವಂತಹ ಕ್ರಿಯಾ ಸರಣಿ ಇದು.

ಇಂಗಾಲ ಕಾಲನಿರ್ಣಯ – ಜೀವಂತ ವಸ್ತುಗಳನ್ನು ಒಳಗೊಂಡ ಅದರಲ್ಲೂ ಭೂಮಿಯನ್ನು ಅಗೆಯುವುದರಿಂದ ದೊರೆಯುವ ಪಳೆಯುಳಿಕೆಗಳ ಕಾಲವನ್ನು ಕಂಡು ಹಿಡಿಯಲು ಬಳಸುವ ಒಂದು ವಿಧಾನ. ಜೀವಂತ ವಸ್ತುಗಳಲ್ಲಿರುವ ಇಂಗಾಲದ ಪರಮಾಣುವಿನ ವಿಕಿರಣ ಸೂಸುವ ಗುಣವನ್ನು ಆಧಾರವಾಗಿಟ್ಟುಕೊಂಡಂತಹ ವಿಧಾನ ಇದು.

ಇಂಗಾಲ ಧ್ವನಿವರ್ಧಕ – ಇಂಗಾಲದ ಹರಳುಗಳನ್ನು ಬಳಸಿಕೊಂಡು ತನ್ನ ಕೆಲಸ ಮಾಡುವಂತಹ ಒಂದು ಧ್ವನಿವರ್ಧಕ. 

ಮಿಶ್ರಕ ಕೊಳವೆ – ಆಂತರಿಕ ದಹನವುಳ್ಳ ಕಲ್ಲೆಣ್ಣೆ(ಪೆಟ್ರೋಲ್)ಯ ಚಾಲಕ ಯಂತ್ರದಲ್ಲಿ ವಾಯು ಮತ್ತು ಕಲ್ಲೆಣ್ಣೆಯನ್ನು ಸ್ಫೋಟನಕ್ಕೆ ಮುಂಚೆ ಬೆರೆಸುವ ಉಪಕರಣ.

ಪ್ರಧಾನ ಬಿಂದುಗಳು – ಒಂದು ದಪ್ಪ ಮಸೂರದ ಅಥವಾ ಸಮಾನ ಅಕ್ಷವುಳ್ಳ ಮಸೂರಗಳ ವ್ಯವಸ್ಥೆಯಲ್ಲಿನ ಆರು ಮುಖ್ಯ ಬಿಂದುಗಳು.

ಕರ‍್ನಾಟ್ ಚಕ್ರ – ಒಂದು ಪರಿಪೂರ್ಣವಾದ ತಾಪಯಂತ್ರದಲ್ಲಿ ಕಂಡುಬರುವ, ಒಂದು ಇನ್ನೊಂದನ್ನು ಹಿಂಬಾಲಿಸುವAತಹ ನಾಲ್ಕು ಭೌತಿಕ ಕ್ರಿಯೆಗಳ ಒಂದು ಚಕ್ರ.

ಕರ‍್ನಾಟ್‌ರ ಸಿದ್ಧಾಂತ – ಯಾವುದೇ ತಾಪಯಂತ್ರದ ಸಾಮರ್ಥ್ಯವು ಅದೇ ತಾಪಮಾನ ಶ್ರೇಣಿಯಲ್ಲಿ ಕೆಲಸ ಮಾಢುತ್ತಿರುವ, ಹಿಮ್ಮರಳಿಸಬಹುದಾದ ತಾಪಯಂತ್ರದ ಸಾಮರ್ಥ್ಯಕ್ಕಿಂತ ಹೆಚ್ಚಾಗಿರಲು ಸಾಧ್ಯ ಇಲ್ಲ.

ಒಯ್ಯಕ – ಒಂದು ಅರೆವಾಹಕದಲ್ಲಿ ಎಲೆಕ್ಟಾçನುಗಳು ಅಥವಾ ರಂಧ್ರಗಳು ತಮ್ಮ ಚಲನೆಯಿಂದಾಗಿ ವಿದ್ಯುತ್ ಉತ್ಪತ್ತಿಯಾಗಲು ಕಾರಣವಾಗುತ್ತವೆ. ಇವುಗಳನ್ನು ಒಯ್ಯಕಗಳು ಎಂದು ಕರೆಯುತ್ತಾರೆ.

ಒಯ್ಯಕ ಅಲೆ – ಆಕಾಶವಾಣಿ(ರೇಡಿಯೋ) ಪ್ರಸಾರಕವು ಸೂಸುವ ಒಂದು ನಿರಂತರ ವಿದ್ಯುತ್ಕಾಂತೀಯ ವಿಕರಣವಿದು. ಇದಕ್ಕೆ ಸ್ಥಿರವಾದ ಅಲೆಯೆತ್ತರ ಮತ್ತು ಆವರ್ತನ ಗತಿಗಳಿರುತ್ತವೆ. 

 ಸಂಗ್ರಾಹಕ ಸರಣಿ – ಒಂದಕ್ಕೊಂದು ಜೋಡಿಸಲ್ಪಟ್ಟ ವಿದ್ಯುತ್ ಸಂಗ್ರಾಹಕಗಳ ಸರಣಿ.