ಕನ್ನಡ ಕನ್ನಡಿ

ಐಸೋಲೇಟಿಂಗ್ ಟ್ರ್ಯಾನ್ಸ್ಫಾರ್ಮರ್ – ಪ್ರತ್ಯೇಕಗೊಳಿಸುವ ವಿದ್ಯುತ್ ಪರಿವರ್ತಕ – ಯಾವುದಾದರೂ ವಿದ್ಯುನ್ಮಂಡಲ ಅಥವಾ ಉಪಕರಣವನ್ನು ತನ್ನ ವಿದ್ಯುತ್ ಸರಬರಾಜಿನಿಂದ ಪ್ರತ್ಯೇಕಗೊಳಿಸುವ (ಬೇರೆ ಮಾಡುವ) ಪರಿವರ್ತಕ.

ಐಸೋಲೇಟರ್ – ಪ್ರತ್ಯೇಕ‌ಕಾರಕ – ವಿದ್ಯುತ್ ಕಾಂತೀಯ ಶಕ್ತಿಯನ್ನು ಒಂದು ದಿಕ್ಕಿನಲ್ಲಿ ಹರಿಯಲು ಬಿಟ್ಟು ಅದರ ವಿರುದ್ಧ ದಿಕ್ಕಿನಲ್ಲಿ ವಿದ್ಯುತ್ ಸಾಮರ್ಥ್ಯವನ್ನು ಹೀರಿಕೊಳ್ಳುವ ಉಪಕರಣ.

ಐಸೋಮ್ಯಾಗ್ನೆಟಿಕ್ ಲೈನ್ಸ್ – ಕಾಂತಬಲವು ಸಮಾನವಾಗಿರುವ ಬಿಂದುಗಳನ್ನು ಜೋಡಿಸುವ ರೇಖೆಗಳು‌.

ಐಸೋಮರ್ಸ್ – ಸಮಾಂಗಿಗಳು – ಸಮಾನ ಅಣುತೂಕ ಮತ್ತು  ಸಮಾನ ಶೇಕಡಾವಾರು ವಸ್ತುಸಂಯೋಜನೆಗಳನ್ನು ಹೊಂದಿದ್ದು, ತಮ್ಮ ಕೆಲವು ರಾಸಾಯನಿಕ ಮತ್ತು ಭೌತಿಕ ಗುಣಲಕ್ಷಣಗಳಲ್ಲಿ ಭಿನ್ನವಾಗಿರುವ ಸಂಯುಕ್ತಗಳು.

ಐಸೋಮೆಟ್ರಿಕ್ ಚೇಂಜ್ – ಪರಿಮಾಣೀಯ ಬದಲಾವಣೆ – ಸ್ಥಿರಪರಿಮಾಣದ ಒಂದು ಅನಿಲದಲ್ಲಿ ಉಂಟಾಗುವ ಬದಲಾವಣೆ.

ಐಸೋಮಾರ್ಫಿಸಂ. – ಸಮರೂಪತೆ – ರಾಸಾಯನಿಕವಾಗಿ ಪರಸ್ಪರ ಸಂಬಂಧ ಹೊಂದಿರುವ ವಸ್ತುಗಳಲ್ಲಿನ ಹರಳುಗಳ ರೂಪ ಅಥವಾ ರಚನೆಯಲ್ಲಿನ ಸಮತೆ.

ಐಸೋಥರ್ಮ್ – ಸಮತಾಪರೇಖೆ – ಸಮ ಉಷ್ಣತೆಯುಳ್ಳ ಬಿಂದುಗಳು ಸೇರುತ್ತಾ ಹೋಗುವ ಒಂದು ರೇಖೆ ಅಥವಾ ರೇಖಾಚಿತ್ರ.

ಐಸೋಥರ್ಮಲ್ ಪ್ರೋಸೆಸ್ – ಸಮತಾಪ ಅಥವಾ ಸಮೋಷ್ಣ ಪ್ರಕ್ರಿಯೆ – ತನ್ನ ಉದ್ದಕ್ಕೂ ಉಷ್ಣತೆಯು ಸ್ಥಿರವಾಗಿರುವಂತಹ ಪ್ರಕ್ರಿಯೆ. ಇದರಲ್ಲಿ ವ್ಯವಸ್ಥೆಯು, ಬದಲಾವಣೆಯುದ್ದಕ್ಕೂ ತನ್ನ ಸುತ್ತಮುತ್ತಲ ಪರಿಸರದೊಂದಿಗೆ ಸಮತೋಲನದಲ್ಲಿರುತ್ತದೆ.

ಐಸೋಥರ್ಮಲ್ ಟ್ರ್ಯಾನ್ಸ್ಫಾರ್ಮೇಷನ್ – ಸಮೋಷ್ಣ ಪರಿವರ್ತನೆ – ಉಷ್ಣಚಲನಾ ಶಾಸ್ತ್ರದಲ್ಲಿ ಸರ್ವೇಸಾಮಾನ್ಯವಾಗಿ ಬಳಸುವ ಪದ. ಸ್ಥಿರವಾದ ಉಷ್ಣತೆಯಲ್ಲಿ ಒಂದು ವಸ್ತುವಿನಲ್ಲಿ ಉಂಟಾಗುವ ಬದಲಾವಣೆಯನ್ನು ಇದು ಹೇಳುತ್ತದೆ.

ಐಸೋಟೋನ್ಸ್ – ಸಮಸಾರಿಗಳು ಅಥವಾ ಸಮಕೇಂದ್ರೀಯಗಳು – ಒಂದೇ ಸಂಖ್ಯೆಯ ನ್ಯೂಟ್ರಾನುಗಳನ್ನು ಆದರೆ ಬೇರೆ ಬೇರೆ ಸಂಖ್ಯೆಯ ಪ್ರೋಟಾನುಗಳನ್ನು ಹೊಂದಿರುವ ಬೀಜಕೇಂದ್ರಗಳು (ನ್ಯೂಕ್ಲೈಡುಗಳು).