ಕನ್ನಡ ಕನ್ನಡಿ

ಐಸೋಟೋನ್ಸ್ – ಸಮಸಾರಿಗಳು ಅಥವಾ ಸಮಕೇಂದ್ರೀಯಗಳು – ಒಂದೇ ಸಂಖ್ಯೆಯ ನ್ಯೂಟ್ರಾನುಗಳನ್ನು ಆದರೆ ಬೇರೆ ಬೇರೆ ಸಂಖ್ಯೆಯ ಪ್ರೋಟಾನುಗಳನ್ನು ಹೊಂದಿರುವ ಬೀಜಕೇಂದ್ರಗಳು (ನ್ಯೂಕ್ಲೈಡುಗಳು).

ಐಸೋಟೋಪ್ ಸೆಪರೇಷನ್ – ಸಮಸ್ಥಾನಿಗಳ ಪ್ರತ್ಯೇಕೀಕರಣ – ಒಂದು ವಸ್ತುವಿನ ಸಮಸ್ಥಾನಿಗಳನ್ನು ಅವುಗಳ ಭೌತಿಕ ಗುಣಲಕ್ಷಣಗಳಲ್ಲಿರುವ ತುಸು ವ್ಯತ್ಯಾಸದ ಆಧಾರದ ಮೇಲೆ ಪ್ರತ್ಯೇಕಗೊಳಿಸುವುದು. ಇದನ್ನು ಮಾಡಲು ಬೇರೆ ಬೇರೆ ವಿಧಾನಗಳನ್ನು ಅನುಸರಿಸುತ್ತಾರೆ.

ಐಸೋಟೋಪ್ಸ್ – ಸಮಸ್ಥಾನಿಗಳು –  ಒಂದೇ ಪರಮಾಣು ಸಂಖ್ಯೆಯಿದ್ದು ಬೇರೆ ಬೇರೆ ದ್ರವ್ಯರಾಶಿ ಸಂಖ್ಯೆಗಳುಳ್ಳ ಒಂದು ವಸ್ತುವಿನ ಪರಮಾಣುಗಳು. ಇಂತಹ ಪ್ರಭೇದಗಳ ಪ್ರೋಟಾನು ಸಂಖ್ಯೆಯು ಸಮವಾಗಿದ್ದು, ನ್ಯೂಟ್ರಾನುಗಳ ಸಂಖ್ಯೆ ಭಿನ್ನವಾಗಿರುತ್ತದೆ. ಇವುಗಳಿಗೆ ಸಮಾನ ರಾಸಾಯನಿಕ ಗುಣಲಕ್ಷಣಗಳು ಹಾಗೂ ಭಿನ್ನವಾದ ಭೌತಿಕ ಗುಣಲಕ್ಷಣಗಳಿರುತ್ತವೆ.

ಐಸೋಟೋಪಿಕ್ ನಂಬರ್ –  ನ್ಯೂಟ್ರಾನ್ ಎಕ್ಸೆಸ್ – ಸಮಸ್ಥಾನಿ ಸಂಖ್ಯೆ (ನ್ಯೂಟ್ರಾನ್ ಆಧಿಕ್ಯ) – ಒಂದು ಸಮಸ್ಥಾನಿಯಲ್ಲಿ ಪ್ರೋಟಾನುಗಳ ಸಂಖ್ಯೆಗೂ ನ್ಯೂಟ್ರಾನುಗಳ ಸಂಖ್ಯೆಗೂ ಇರುವ ವ್ಯತ್ಯಾಸ‌.

ಐಸೀಟೋಪಿಕ್( ಐಸೋ/ ಐಸೋಬಾರಿಕ್) ಸ್ಪಿನ್ – ಸಮಸ್ಥಾನೀ(ಸಮ/ಸಮಭಾರಿ) ಗಿರಕಿ – ಒಂದು ರೀತಿಯ ಮೂಲಭೂತ ಕಣಗಳಾದ ಹೇಡ್ರಾನುಗಳಿಗೆ ನೀಡುವಂತಹ ಒಂದು ಶಕ್ತಿಪೊಟ್ಟಣ ( ಕ್ವಾಂಟಂ) ಸಂಖ್ಯೆ. ಬಹಳಷ್ಟು ರೀತಿಗಳಲ್ಲಿ ಸಮನಾಗಿದ್ದು, ವಿದ್ಯುತ್ ಕಾಂತೀಯ ಗುಣಲಕ್ಷಣಗಳಲ್ಲಿ ಮಾತ್ರ ಭಿನ್ನವಾಗುವ ಕಣಗಳ ಒಂದು ಕಟ್ಟಿನ ಸದಸ್ಯರನ್ನು ಗುರುತಿಸಲು ಈ ಪದವನ್ನು ಬಳಸಲಾಗುತ್ತದೆ.

ಐಸೋಟ್ರೋಪಿಕ್ – ಸಮವರ್ತಿ – ಒಂದು ಮಾಧ್ಯಮದ ಗುಣಲಕ್ಷಣಗಳು ಎಲ್ಲ ದಿಕ್ಕುಗಳಲ್ಲೂ ಅವವೇ ಆಗಿದ್ದರೆ, ಅಂದರೆ, ಆ ಭೌತಿಕ ಗುಣಲಕ್ಷಣಗಳಿಗೂ ಅದರ ದಿಕ್ಕಿಗೂ ಸಂಬಂಧವಿಲ್ಲ ಎನ್ನುವುದಾದರೆ ಅದನ್ನು ಸಮವರ್ತಿ ಎನ್ನುತ್ತಾರೆ.

ಜರ್ಕ್ – ಕುಲುಕು – ಯಂತ್ರಚಲನ ಶಾಸ್ತ್ರದಲ್ಲಿ ಬಳಸುವ ಪದ‌. ಇದನ್ನು ಒಂದು ವ್ಯವಸ್ಥೆಯ ವೇಗೋತ್ಕರ್ಷದ ಗತಿಯಲ್ಲಿ ಉಂಟಾಗುವ ಬದಲಾವಣೆ ಎಂದು ನಿರೂಪಿಸಲಾಗುತ್ತದೆ.

ಜೆಟ್ ಪ್ರೊಪಲ್ಶನ್(ರಿಯಾಕ್ಷನ್ ಪ್ರೊಪಲ್ಶನ್) – ಧಾರಾಬುಗ್ಗೆಯಿಂದ ಮುನ್ನೂಕುವಿಕೆ –  ಧಾರಾಬುಗ್ಗೆಯ ರೂಪದಲ್ಲಿ ದ್ರವವೊಂದನ್ನು ಚಿಮ್ಮಿಸುವ ಮೂಲಕ ಉತ್ಪತ್ತಿಯಾದ ಬಲಗಳಿಂದ ಒಂದು ವಸ್ತುವನ್ನು ಮುನ್ನೂಕುವುದು.‌ ಇಲ್ಲಿ, ಹಿಂದು ಹಿಂದಕ್ಕೆ ಚಲಿಸುವ ಧಾರಾಬುಗ್ಗೆಯು ತನ್ನನ್ನು ಉತ್ಪತ್ತಿ ಮಾಡಿದ ವಸ್ತುವನ್ನು, ನ್ಯೂಟನ್ ರ ಮೂರನೆಯ ನಿಯಮದ ಪ್ರಕಾರ ಮುಂದುಮುಂದಕ್ಕೆ ನೂಕುತ್ತದೆ.

ಜಿಟ್ಟರ್ಸ್ – ಅದುರುವ ಚಿತ್ರದೋಷ – ಕ್ರಿಪ್ರ ವೀಕ್ಷಕ ಹಾಗೂ ದಾಖಲೆದಾರ ಉಪಕರಣದ ನಡುವೆ ಆಗುವುದಕ್ಕೆ ಹೊಂದಾಣಿಕೆಯ ವ್ಯತ್ಯಾಸದಿಂದಾಗಿ ದೂರದರ್ಶನದ ಚಿತ್ರದಲ್ಲಿ ಅಥವಾ ಪ್ರತಿಬಿಂಬ ಚಿತ್ರದಲ್ಲಿ ಉಂಟಾದ ಕ್ಷಣಿಕ ದೋಷಗಳು‌.

ಜಾಗಿಂಗ್ – ಜಗ್ಗಾಡಿಸುವುದು – ಚಲಾಯಿಸಲು ‌ಆರಂಭಿಸಿರುವ ಒಂದು ಯಂತ್ರದಲ್ಲಿ ಚಲನೆಯನ್ನುಂಟು ಮಾಡಲಿಕ್ಕಾಗಿ ವಿದ್ಯುನ್ಮಂಡಲವನ್ನು ಬೇಗ ಬೇಗ, ಮತ್ತೆ ಮತ್ತೆ ತೆರೆಯುವ ಮತ್ತು ಮುಚ್ಚುವ ಕ್ರಿಯೆ.