ಕನ್ನಡ ಕನ್ನಡಿ

ಜೀವಿಸೂಸಿತ ಪ್ರಕಾಶ – ಜೀವಿಗಳು ಹೊರಸೂಸುವ ತಾಪರಹಿತ ಬೆಳಕು. ಮಿಂಚುಹುಳುಗಳು, ಬ್ಯಾಕ್ಟೀರಿಯಾ, ಅಣಬೆಗಳು ಮತ್ತು ಸಮುದ್ರದಾಳದಲ್ಲಿರುವ ಅನೇಕ ಮೀನುಗಳು ಇಂತಹ ಬೆಳಕನ್ನು ಹೊರಸೂಸುತ್ತವೆ.

ಜೈವಿಕ ಭೌತಶಾಸ್ತ್ರ  ಜೀವಶಾಸ್ತ್ರೀಯ ವಿದ್ಯಮಾನ(ಆಗುಹೋಗುಗಳಿಗೆ) ಭೌತಶಾಸ್ತ್ರದ ನಿಯಮಗಳನ್ನು ಅನ್ವಯಿಸುವ ಜ್ಞಾನಶಿಸ್ತು.

ದ್ವಿಧ್ರುವ ವಿದ್ಯುದ್ವಾರ  ವಿದ್ಯುತ್ ರಾಸಾಯನಿಕ ಕೋಶವೊಂದರಲ್ಲಿ ವಿದ್ಯುತ್ ಹರಿಯುವ ಒಂದು ಲೋಹದ ಪಟ್ಟಿ. ಆದರೆ ಇದನ್ನು ಆ ಕೋಶದ ಧನವಿದ್ಯುದ್ವಾರಕ್ಕಾಗಲೀ ಋಣವಿದ್ಯುದ್ವಾರಕ್ಕಾಗಲೀ ಜೋಡಿಸಿರುವುದಿಲ್ಲ. ಏಕೆಂದರೆ ವಿದ್ಯುತ್ ಹರಿಯುವಾಗ ಈ ಪಟ್ಟಿಯ ಒಂದು ಮುಖವು ಸಹಕಾರೀ ಋಣವಿದ್ಯುದ್ವಾರವಾಗಿ ಕೆಲಸ ಮಾಡಿದರೆ ಇನ್ನೊಂದು ಮುಖವು ಧನವಿದ್ಯುದ್ವಾರವಾಗಿ ಕೆಲಸ ಮಾಡುತ್ತದೆ.

ದ್ವಿಧ್ರುವ ಟ್ರ್ಯಾನ್ಸಿಸ್ಟರು _ ಎಲೆಕ್ಟ್ರಾನುಗಳು ಮತ್ತು ರಂಧ್ರಗಳು ತುಂಬ ಅವಶ್ಯಕವಾದ ಪಾತ್ರಗಳನ್ನು ನಿರ್ವಹಿಸುವ ಒಂದು ಟ್ರ್ಯಾನ್ಸಿಸ್ಟರು, ಉದಾಹರಣೆಗೆ ಒಂದು ಕೂಡುಸ್ಥಳ(ಜಂಕ್ಷನ್) ಟ್ರ್ಯಾನ್ಸಿಸ್ಟರು.

(ಪ್ರೆಸ್ನೆಲ್‌ರ) ಇಮ್ಮಡಿ ಪಟ್ಟಕ – ಬೆಳಕಿನ ಪ್ರವೇಶದ ಅಗತ್ಯವುಳ್ಳ ಪ್ರಯೋಗಗಳಲ್ಲಿ ಎರಡು ನಿಜಭಾಸ(ವರ್‍ಚುವಲ್) ಹಾಗೂ  ಸಮಂಜಸ(ಕೊಹೆರೆಂಟ್) ಆಕರಗಳನ್ನು ಉತ್ಪತ್ತಿ ಮಾಡುವಂತಹ ದೊಡ್ಡ ಕೋನವುಳ್ಳ ಒಂದು ಗಾಜಿನ ಪಟ್ಟಕ. ಪ್ರಾನ್ಸಿನ ಕಟ್ಟಡ ಯಂತ್ರಜ್ಞಾನಿಯಾಗಿದ್ದ ಆಗಸ್ಟಿನ್ ಜೀನ್ ಫ್ರೆಸ್ನೆಲ್‌ರು(ಕಾಲ : ೧೦-೦೫-೧೭೮೮ ರಿಂದ ೧೪-೦೭-೧೮೨೭) ಇದನ್ನು ಕಂಡುಹಿಡಿದರು.

ಇಮ್ಮಡಿ ವಕ್ರೀಭವನ  ಕ್ಯಾಲ್ಸೈಟ್‌ನಂತಹ ಕೆಲವು ವಸ್ತುಗಳ ಹರಳುಗಳ ಮೂಲಕ ಬೆಳಕು ಹಾಯುವಾಗ ಪರಸ್ಪರ ಲಂಬವಾಗಿರುವ ಎರಡು ದಿಕ್ಕುಗಳಲ್ಲಿ ಸೀಳಿಕೊಳ್ಳುತ್ತದೆ. ಇವುಗಳಲ್ಲಿ ಒಂದನ್ನು ಸಾಮಾನ್ಯ ಕಿರಣ ಮತ್ತು ಇನ್ನೊಂದನ್ನು ಅಸಾಮಾನ್ಯ ಕಿರಣ ಎನ್ನುತ್ತಾರೆ. ಇದೇ ಇಮ್ಮಡಿ ವಕ್ರೀಭವನ.

ದ್ವಿಸ್ಥಿರಸ್ಥಿತಿ(ಹೀಗೊಮ್ಮೆ ಹಾಗೊಮ್ಮೆ ಲಾಗ ಹೊಡೆವ) ವಿದ್ಯುನ್ಮಂಡಲ – ಇದು ಎರಡೆರಡು ಸ್ಥಿರಸ್ಥಿತಿಯುಳ್ಳ ವಿದ್ಯುನ್ಮಂಡಲ. ಸಾಮಾನ್ಯವಾಗಿ ಇದು ಒಮ್ಮೆ ಹೀಗೆ ಒಮ್ಮೆ ಹಾಗೆ ಲಾಗ ಹೊಡೆಯುವ ಬಹುಕಂಪಕವಾಗಿರುತ್ತದೆ. ಇದನ್ನು ಗಣಕಯಂತ್ರಗಳಲ್ಲಿ ೦ ಮತ್ತು ೧ (ಜೋಡಿ ಅಂಕಿಗಳು) ಗಳನ್ನು ಸಂಗ್ರಹಿಸಲು ಮತ್ತು ಎಣಿಸಲು ಬಳಸುತ್ತಾರೆ.

ಕಪ್ಪು ವಸ್ತು – ತನ್ನ ಮೇಲೆ ಬೀಳುವ ಎಲ್ಲ ಬೆಳಕನ್ನೂ ಸಂಪೂರ್ಣವಾಗಿ ಹೀರಿಕೊಳ್ಳುವ ವಸ್ತು.

ಕಪ್ಪು ಕುಳಿ – ಬಾಹ್ಯಾಕಾಶದಲ್ಲಿರುವ ಒಂದು ವಸ್ತು ಇದು. ತನ್ನದೇ ಗುರುತ್ವಶಕ್ತಿಗಳ ಅಡಿಯಲ್ಲಿ ಕುಸಿದಂತಹ ವಸ್ತು. ಇದು ಎಷ್ಟರ ಮಟ್ಟಿಗೆ ಕುಸಿದಿರುತ್ತದೆಂದರೆ ಇದರ ವಿಮೋಚನಾ ವೇಗವು ಬೆಳಕಿನ ವೇಗಕ್ಕೆ ಸಮನಾಗಿರುತ್ತದೆ (ವಿಮೋಚನಾ ವೇಗ = ಒಂದು ವಸ್ತುವಿನ ಗುರುತ್ವಾಕರ್ಷಣೆಯಿಂದ ಇನ್ನೊಂದು ವಸ್ತುವು ತಪ್ಪಿಸಿಕೊಂಡು ಹೋಗಲು ಹೊಂದಿರಬೇಕಾದ ಕನಿಷ್ಠ ವೇಗ).

ಕಪ್ಪು ಬೆಳಕು – ಇದು ವಿದ್ಯುತ್ಕಾಂತೀಯ ಅದೃಶ್ಯ ವಿಕಿರಣ(ಬೆಳಕು). ಇದು ಹೊಳಪಿನ ಕಾಂತಿ ಬೀರಬಲ(ಫ್ಲೋರೋಸೆಂಟ್) ವಸ್ತುಗಳ ಮೇಲೆ ಬಿದ್ದಾಗ ಅವು ಕಣ್ಣಿಗೆ ಕಾಣುವ ಬೆಳಕನ್ನು ಸೂಸುವಂತೆ ಮಾಡುತ್ತದೆ.