ಐಯಾನು – ವಿದ್ಯುದಣು ಅಥವಾ ಅಯಾನು – ವಿದ್ಯುದಂಶವುಳ್ಳ ಒಂದು ಕಣ‌. ಇದರಲ್ಲಿ ಒಂದು ಪರಮಾಣು ಅಥವಾ ಪರಮಾಣುಗಳ ಒಂದು ಗುಂಪು ಇದ್ದು, ಇವು ಒಂದೋ ಎಲೆಕ್ಟ್ರಾನುಗಳನ್ನು ಕಳೆದುಕೊಂಡಿರುತ್ತವೆ ಅಥವಾ ಪಡೆದುಕೊಂಡಿರುತ್ತವೆ.‌

ಇನ್ವರ್ಟಿಂಗ್ ಪ್ರಿಸಂ ( ಎರೆಕ್ಟಿಂಗ್ ಪ್ರಿಸಂ) – ತಲೆಕೆಳಗೆ ಮಾಡುವ ಪಟ್ಟಕ (ನೇರ ನಿಲ್ಲಿಸುವ ಪಟ್ಟಕ) – ದೃಶ್ಯವಿಜ್ಞಾನ ವ್ಯವಸ್ಥೆಯಲ್ಲಿ ಒಂದು ಬಿಂಬವನ್ನು  ಅದರ ಆಕಾರ ಅಥವಾ ಗಾತ್ರವನ್ನು ಬದಲಾಯಿಸದೆ ತಲೆಕೆಳಗೆ ಮಾಡಲು ಬಳಸುವ ಪಟ್ಟಕ. ಆಂತರಿಕ ಪ್ರತಿಫಲನದಿಂದಾಗಿ ಈ ಪಟ್ಟಕವು ಈ ರೀತಿ ಕೆಲಸ ಮಾಡುತ್ತದೆ. 

ಇನ್ ವರ್ಟರ್ ಗೇಟ್  ( ನಾಟ್ ಗೇಟ್) – ವಿಲೋಮ ಕವಾಟ – ಒಂದು ಸರಳ ವಿದ್ಯುನ್ಮಂಡಲ‌. ಇದನ್ನು, ಹೆಚ್ಚಿನ ಒಳಹಾಕುವ ವಿದ್ಯುತ್ತನ್ನು ಕಡಿಮೆ ಹೊರಬರುವ ವಿದ್ಯುತ್ತಾಗಿಸಲು ಮತ್ತು ಇದರ ವಿರುದ್ಧ ಕ್ರಿಯೆಯನ್ನು ಸಾಧ್ಯ ಮಾಡಲು ಬಳಸುತ್ತಾರೆ‌. ಸರಳ ತಾರ್ಕಿಕ ಪ್ರಕ್ರಿಯೆಗಳನ್ನು ಮಾಡಲು ಇಂತಹ ಸರಳವಾದ ವಿದ್ಯುನ್ಮಂಡಲ‌ಗಳನ್ನು ಬಳಸುತ್ತಾರೆ.