ಇಂಡೆಕ್ಸ್ – ಸೂಚ್ಯಂಕ – ಆಯಾಮರಹಿತವಾದ ಒಂದು ಅಂಕಿ‌ ಪರಿಮಾಣ.‌ ಇದನ್ನು ಭೌತಶಾಸ್ತ್ರೀಯ ಪರಿಣಾಮವೊಂದರ ಪರಿಮಾಣವನ್ನು ಸೂಚಿಸಲು ಬಳಸುತ್ತಾರೆ.  ಉದಾಹರಣೆಗೆ ಒಂದು ವಸ್ತುವಿನ ವಕ್ರೀಭವನ ಸೂಚ್ಯಂಕ.

ಇನ್ಕ್ಯುಬೇಟರ್ – ಕಾವು ಪೆಟ್ಟಿಗೆ – ತಾಪಸ್ಥಾಪಕವನ್ನು ಉಪಯೋಗಿಸಿಕೊಂಡು ಸ್ಥಿರವಾದ ಆಂತರಿಕ ಉಷ್ಣತೆಯನ್ನು ಕಾಪಾಡಿಕೊಂಡು ಬರುವ ಸಾಮರ್ಥ್ಯವನ್ನು ಹೊಂದಿರುವಂತೆ ವಿನ್ಯಾಸ ಮಾಡಿರುವ ಒಂದು ಪೆಟ್ಟಿಗೆ. ಕೋಳಿಮರಿಗಳನ್ನು ಬೆಳೆಸಲು, ಅವಧಿಗೆ ಮುನ್ನ ಹುಟ್ಟಿದ ಎಳೆಶಿಶುಗಳನ್ನು ಸುರಕ್ಷಿತವಾಗಿ ಬೆಳೆಸಲು ಮತ್ತು ಬ್ಯಾಕ್ಟೀರಿಯಾಶಾಸ್ತ್ರದಲ್ಲಿ ಇದನ್ಬು ಬಳಸುತ್ತಾರೆ.

ಇನ್ಕೋಹೆರೆಂಟ್ ಹೋಲೋಗ್ರಫಿ – ಸುಸಂಬದ್ಧವಲ್ಲದ ಪೂರ್ಣಚಿತ್ರಗ್ರಹಣ –  ಪ್ರಾರಂಭದಲ್ಲಿ ತೆಗೆಯಲಾಗುತ್ತಿದ್ದ ಸುಸಂಬದ್ಧವಲ್ಲದ ಪೂರ್ಣಚಿತ್ರಗಳು‌.‌ ಇವುಗಳನ್ನು ಸಾಂಪ್ರದಾಯಿಕ ಛಾಯಾಚಿತ್ರಗಳನ್ನು ಹಾಗೂ ಸುಸಂಬದ್ಧವಲ್ಲದ ದೃಶ್ಯವಿಜ್ಞಾನದ ವ್ಯವಸ್ಥೆಗಳನ್ನು ಬಳಸಿ ತೆಗೆಯುತ್ತಿದ್ದರು.

ಇನ್ಕ್ಲಿನೇಷನ್( ಆಂಗಲ್ ಆಫ್ ಡಿಪ್) – ಇಳಿಜಾರು ( ಇಳಿಜಾರು ಕೋನ) – ಭೂಮಿಯ ಕಾಂತಕ್ಷೇತ್ರಕ್ಕೂ ಮತ್ತು ಅದರ ಮೇಲ್ಮೈಯಲ್ಲಿನ ಅಡ್ಡರೇಖೆಗೂ, ಬಿಂದುವೊಂದರಲ್ಲಿ ಉಂಟಾಗುವ ಕೋನ. ಸಮಯದೊಂದಿಗೆ ಇದು ತುಸು ಬದಲಾಗುತ್ತದೆ.

ಇನ್ಕಾಂಡೆಸೆನ್ಸ್- ಪ್ರಜ್ವಲ ಬೆಳಕು  – ತುಂಬ ಹೆಚ್ಚು ತಾಪಮಾನ ಹೊಂದಿರುವ ಮೇಲ್ಮೈಯಿಂದ ಸೂಸುವಂತಹ ಬೆಳಕು. ನಾವು ಮನೆಗಳಲ್ಲಿ ಬಳಸುವ, ಟಂಗ್ಸ್ಟನ್ ತಂತುವನ್ನು ಹೊಂದಿರುವ ವಿದ್ಯುತ್ ದೀಪವು ಇದಕ್ಕೆ ಉದಾಹರಣೆಯಾಗಿದೆ.

ಇಂಪಲ್ಸ್ ( ಇಂಪಲ್ಸಿವ್ ಫೋರ್ಸ್) – ಹಠಾತ್ತಾದ ಕ್ರಿಯೆ (ಹಠಾತ್ತಾಗಿ ವರ್ತಿಸುವ ಬಲ) – ಢಿಕ್ಕಿ ಹೊಡೆದಾಗ ಆಗುವಂತೆ ತುಂಬ ಕಡಿಮೆ ಕಾಲದಲ್ಲಿ ವರ್ತಿಸುವ ಬಲ.

ಇಂಪೀರಿಯಲ್ ಯೂನಿಟ್ಸ್ – ರಾಜಪ್ರಭುತ್ವದ ಮೂಲಮಾನಗಳು – ಗಜ ( ಯಾರ್ಡ್) ಮತ್ತು ಪೌಂಡ್ ಗಳ ಮೇಲೆ ಆಧಾರಿತವಾದ ಅಳತೆಯ ವ್ಯವಸ್ಥೆ. IPS – ಇಂಚು – ಪೌಂಡ್ – ಸೆಕೆಂಡ್ ವ್ಯವಸ್ಥೆಯು ಈ ರಾಜಪ್ರಭುತ್ವದ ಮೂಲಮಾನಗಳ ಮೇಲೆ ಆಧಾರಿತವಾದ ಅಳತೆ ವ್ಯವಸ್ಥೆಯಾಗಿದೆ.