ಲೆಪ್ಟಾನ್ – ಲೆಪ್ಟಾನು – ಎಲೆಕ್ಟ್ರಾನು, ಮ್ಯೂಯಾನು ( ಮತ್ತೆ ವಿಭಜಿಸಲು ಸಾಧ್ಯವಿಲ್ಲದ, ಋಣ ವಿದ್ಯುದಂಶ ಹೊಂದಿದ ಆದರೆ ಅದಕ್ಕಿಂತ ಹೆಚ್ಚು ದ್ರವ್ಯರಾಶಿಯುಳ್ಳ ಒಂದು ಅಂತರ್ಪರಮಾಣು – ಅಂದರೆ ಪರಮಾಣುವಿನೊಳಗಿನ -ಮೂಲಭೂತ ಕಣ) ಮತ್ತು ನ್ಯೂಟ್ರಾನುಗಳನ್ನು ಒಟ್ಟಾಗಿ ಸೂಚಿಸುವ ಒಂದು ಪದ.

ಲೆಂಜ್ ಸ್ ಲಾ – ಲೆಂಜ್ ರ ನಿಯಮ – ಒಂದು ವಿದ್ಯುನ್ಮಂಡಲದಲ್ಲಿ ಪ್ರೇರಿತ ವಿದ್ಯುತ್ ಸಾಮರ್ಥ್ಯ (ವಿದ್ಯುತ್ ಚಾಲಕ ಬಲ)ದ  ದಿಕ್ಕು, ತನ್ನನ್ನು ಉತ್ಪಾದಿಸುವುದರ ದಿಕ್ಕಿಗೆ ವಿರುದ್ಧವಾಗಿರುತ್ತದೆ.

ಲೆನ್ಸ್ – ಮಸೂರ, ಬಾಗುಮೈ( ಯುಳ್ಳ) ಗಾಜು – ಬೆಳಕನ್ನು ಕೇಂದ್ರೀಕರಿಸುವ ಅಥವಾ ವಿಕೇಂದ್ರೀಕರಿಸುವ ಒಂದು ದೃಶ್ಯ ವಿಜ್ಞಾನೀಯ ಉಪಕರಣ ಅಥವಾ ಉಪಕರಣ ಭಾಗ.

ಲೆನಾರ್ಡ್ ಟ್ಯೂಬ್ – ಲೆನಾರ್ಡ್ ಕೊಳವೆ – ಋಣ ವಿದ್ಯುದ್ವಾರಕ್ಕೆ ಇದಿರಾಗಿ ಋಣ ವಿದ್ಯುದ್ವಾರದ ಕಿರಣಗಳು ದಾಟಿ ಹೋಗಲು ಅನುಕೂಲವಾಗುವಂತೆ ಕಿಟಕಿಯೊಂದನ್ನು ಹೊಂದಿರುವ ವಿಸರ್ಜನಾ ಕೊಳವೆ.

ಲೆನಾರ್ಡ್ ರೇಸ್ – ಲೇನಾರ್ಡ್ ಕಿರಣಗಳು – ಲೆನಾರ್ಡ್ ಕೊಳವೆಯ ಆಚೆಗೆ ಹೋಗಿರುವ ಋಣ ವಿದ್ಯುದ್ವಾರ ಕಿರಣಗಳು‌ ( ಫಿಲಿಪ್ ಎಡ್ಯುವರ್ಡ್ ಆಂಟನ್ ವಾನ್ ಲೆನಾರ್ಡ್ – ಋಣ ವಿದ್ಯುದ್ವಾರವನ್ನು ಕುರಿತು ಕೆಲಸ ಮಾಡಿದ್ದಕ್ಕಾಗಿ 1905 ರಲ್ಲಿ ನೊಬೆಲ್ ‌ಪ್ರಶಸ್ತಿ ಪಡೆದ ಜರ್ಮನಿ‌ ದೇಶದ ಭೌತವಿಜ್ಞಾನಿ : ಕಾಲ – 07-06-1862 ರಿಂದ 20-05-1947). 

ಲೀಸ್ ಡಿಸ್ಕ್ – ಲೀಯವರ ಬಿಲ್ಲೆ – ಕಡಿಮೆ ವಾಹಕತೆಯುಳ್ಳ ವಸ್ತುಗಳ ಉಷ್ಣವಾಹಕ ಸಾಮರ್ಥ್ಯವನ್ನು ಅಳೆಯಲು ಬಳಸುವ ಉಪಕರಣ. 

ಲೆಕ್ಲಾಂಚೆ ಸೆಲ್ – ಲೆಕ್ಲಾಂಚೆ ಕೋಶ – ಒಂದು ಮೂಲರೂಪೀ ವಿದ್ಯುತ್ ಕೋಶ. ಫ್ರಾನ್ಸ್ ನ ಯಂತ್ರಜ್ಞಾನಿಯಾದ ಜಾರ್ಜ್ ಲೆಕ್ಲಾಂಚೆಯು 1866 ನೇ ವರ್ಷದಲ್ಲಿ ನಿರ್ಮಿಸಿದ್ದರಿಂದ ಇದಕ್ಕೆ ಅವನ ಹೆಸರನ್ನೇ ಇಡಲಾಗಿದೆ‌. ಇದರಲ್ಲಿ ಒದ್ದೆ ಮತ್ತು ಒಣ ಎಂದು ಎರಡು ರೂಪಗಳಿರುತ್ತವೆ‌.