ಫ್ರೀಝಿಂಗ್ ಮಿಕ್ಸ್ಚರ್‌ – ಹೆಪ್ಪುಗಟ್ಟುವ ಮಿಶ್ರಣ – ತುಂಬಾ ಶೀತತೆಯನ್ನು ಅಂದರೆ ಅತ್ಯಂತ ಕಡಿಮೆ ಉಷ್ಣತೆಯನ್ನು ಉತ್ಪತ್ತಿ‌ ಮಾಡಲು ಬಳಸುವಂತಹ ಒಂದು ವಸ್ತುಮಿಶ್ರಣ ಇದು. ಉದಾಹರಣೆಗೆ, ಮಂಜುಗಡ್ಡೆ ಮತ್ತು ಉಪ್ಪಿನ ಮಿಶ್ರಣ.

ಫ್ರೀಝಿಂಗ್ – ಹೆಪ್ಪುಗಟ್ಟುವಿಕೆ – ದ್ರವ ಸ್ಥತಿಯಿಂದ ಘನ ಸ್ಥಿತಿಗೆ ಮಾರ್ಪಾಡಾಗುವ ಪ್ರಕ್ರಿಯೆ.

ಫ್ರೀ ಸರ್ಫೇಸ್‌‌ ಎನರ್ಜಿ – ಮುಕ್ತ ಮೇಲ್ಮೈ ಶಕ್ತಿ – ತೆರೆದುಕೊಂಡ ಒಂದು ಮೇಲ್ಮೈ ಯಲ್ಲಿನ ಏಕಘಟಕ ಪ್ರದೇಶವು ಹೊಂದಿರುವ ಶಕ್ತಿ.

ಫ್ರೀ ಆಸ್ಸಿಲೇಷನ್ –  ಮುಕ್ತ ಆವರ್ತನ –  ಒಂದು ವ್ಯವಸ್ಥೆ ಅಥವಾ ವಸ್ತುವಿನ ಸಹಜ ಆವರ್ತನದಲ್ಲಿ ಇರುವ ಆಂದೋಲನ.‌ ಲೋಲಕವೊಂದರ  ಈ ಮುಕ್ತ ಆಂದೋಲನವು ಅದರ ಉದ್ದ ಮತ್ತು ದ್ರವ್ಯರಾಶಿಯನ್ನು ಅವಲಂಬಿಸಿರುತ್ತದೆ.

ಫ್ರೀ ಎನರ್ಜಿ – ಮುಕ್ತ ಶಕ್ತಿ – ಉಪಯುಕ್ತ ಕೆಲಸ ಮಾಡಲು ಒಂದು ವ್ಯವಸ್ಥೆಗೆ  ಇರುವ ಸಾಮರ್ಥ್ಯ.

ಫ್ರಾನ್ ಹಾಫರ್ ಲೈನ್ಸ್ – ಫ್ರಾನ್ ಹಾಫರ್ ಗೆರೆಗಳು – ಸೂರ್ಯನ ಬೆಳಕಿನಿಂದ ಉಂಟಾಗುವ ವರ್ಣಪಟಲದಲ್ಲಿನ ಗಾಢ ಕಪ್ಪು ಗೆರೆಗಳು. ಈ ಗೆರೆಗಳ ತರಂಗಾಂತರಗಳನ್ನು, ತರಂಗಾಂತರಗಳೊಂದಿಗೆ ಬದಲಾಗುವ ಪರಿಮಾಣಗಳನ್ನು ಗುರುತಿಸಲು ಪರಾಮರ್ಶನ‌ ಮಾನದಂಡಗಳಾಗಿ ಬಳಸುತ್ತಾರೆ. ‌ಉದಾಹರಣೆಗೆ, ವಕ್ರೀಭವನ ಸ್ಥಿರಾಂಕಗಳು.‌

ಫ್ರೇಮ್ ಆಫ್ ರೆಫರೆನ್ಸ್ – ಪರಾಮರ್ಶನ ಚೌಕಟ್ಟು – ಇದು ನಿರ್ದೇಶಕ ಅಕ್ಷರೇಖೆಗಳ ಒಂದು ಚೌಕಟ್ಟು. ಇದರ ಸಹಾಯದಿಂದ ಸಮಯದೊಂದಿಗೆ ಬದಲಾಗುವ ವಸ್ತುವಿನ ಸ್ಥಾನವನ್ನು ಗುರುತಿಸಬಹುದು. 

ಫೋವಿಯಾ ( ಯೆಲ್ಲೋ‌ ಸ್ಪಾಟ್) – ಕುಳಿ ( ಹಳದಿ ಕುಳಿ) – ಅಕ್ಷಿ ಪರದೆಯ (ರೆಟಿನಾ) ಮೇಲೆ ಶಂಕುಗಳು ಅತಿ ಹೆಚ್ಚಾಗಿ, ಒತ್ತೊತ್ತಾಗಿ ಸಂಗ್ರಹಿತವಾಗಿರುವ ಒಂದು ಚಿಕ್ಕ ಪ್ರದೇಶ ಇದು (ಕಾಲು ಮಿಲಿಮೀಟರ್ ). ಕಣ್ಣಿನಲ್ಲಿ ದೃಷ್ಟಿಯು ಅತ್ಯಂತ ತೀಕ್ಷ್ಣ ವಾಗಿರುವ ಸ್ಥಳವೆಂದರೆ ಇದೇ.