ಕನ್ನಡ ಕನ್ನಡಿ

ಹಾಲ್ ಎಫೆಕ್ಟ್ – ಹಾಲ್ ಪರಿಣಾಮ ‌- ಅಡ್ಡಡ್ಡವಾಗಿರುವ ಬಲವಾದ ಕಾಂತಕ್ಷೇತ್ರ ಇರುವಾಗ ಒಂದು ವಾಹಕ ಅಥವಾ ಅರೆವಾಹಕದಲ್ಲಿ ವಿದ್ಯುತ್ ಕಾಂತೀಯ ಬಲವು ಉತ್ಪತ್ತಿ ಆಗುವುದು.  ಇದನ್ನು‌ ಕಂಡುಹಿಡಿದ ವಿಜ್ಞಾನಿ – ಎಡ್ವಿನ್ ಹರ್ಬರ್ಟ್ ಹಾಲ್(1855-1938) ಎಂಬ ಅಮೆರಿಕಾದ ಭೌತಶಾಸ್ತ್ರಜ್ಞ.

ಹಾಲ್ ಮೊಬಿಲಿಟಿ – ಹಾಲ್ ರ ಚಲನಗುಣ – ಕಾಂತಕ್ಷೇತ್ರ ಮತ್ತು ವಿದ್ಯುತ್ ಕ್ಷೇತ್ರ ಎರಡಕ್ಕೂ ಲಂಬಕೋನದಲ್ಲಿ ಚಲಿಸುವ  ವಿದ್ಯುತ್ ಕಣಗಳ ಹರಿವಿನ ಪ್ರಮಾಣ‌.

ಹ್ಯಾಲೀಸ್ ಕಾಮೆಟ್ – ಹ್ಯಾಲೀ ಧೂಮಕೇತು – ಹದಿನೆಂಟನೆಯ ಶತಮಾನದಲ್ಲಿ ದ್ದ ಎಡ್ಮಂಡ್ ಹ್ಯಾಲಿ ಎಂಬ, ಇಂಗ್ಲಿಷ್ ಖಗೋಳ ಶಾಸ್ತ್ರಜ್ಞರು 1705 ರಲ್ಲಿ ಕಂಡುಹಿಡಿದ, 76 ವರ್ಷಗಳ ಭ್ರಮಣ ಕಾಲಾವಧಿ ಇರುವ  ಒಂದು ಪ್ರಕಾಶಮಾನವಾದ ಧೂಮಕೇತು. ‌1910 ಮತ್ತು 1986 ರಲ್ಲಿ ಇದು ಬಂದಿತ್ತು. ಗ್ರಹಗಳು ಸೂರ್ಯನ ಸುತ್ತ ಸುತ್ತುವ ದಿಕ್ಕಿಗೆ ವಿರುದ್ಧ ದಿಕ್ಕಿನಲ್ಲಿ ಈ ಧೂಮಕೇತು ಸುತ್ತುತ್ತದೆ. 

ಹಾಲ್  ವಾಕ್ಸ್ ಎಫೆಕ್ಟ್ ‌- ಹಾಲ್ ವಾಕ್ ರ ಪರಿಣಾಮ ‌- ನಿರ್ವಾತದಲ್ಲಿರುವ, ಋಣಾತ್ಮಕವಾಗಿ ವಿದ್ಯುತ್ ಕರಣಗೊಂಡಿರುವ ವಸ್ತುವು ಅತಿನೇರಳೆ ಕಿರಣಗಳಿಗೆ ಇದಿರುಗೊಂಡಾಗ (ತೆರೆದುಕೊಂಡಾಗ) ವಿದ್ಯುದಂಶವನ್ನು ಕಳೆದುಕೊಳ್ಳುತ್ತೆ.

ಹೇಲೋ – ಪ್ರಭಾಮಂಡಲ – ಸೂರ್ಯ ಅಥವಾ ಚಂದ್ರನ ಸುತ್ತ ಕೆಲವು ಸಲ ಕಾಣಸಿಗುವ ಪ್ರಕಾಶಮಾನವಾದ ಹೊಳೆಯುವ ಉಂಗುರ. ಇದಕ್ಕೆ ಕಾರಣವೇನೆಂದರೆ ಭೂಮಿಯ ವಾತಾವರಣದಲ್ಲಿನ ಕಣಗಳು ಆ ಆಕಾಶಕಾಯಗಳ ಬೆಳಕನ್ನು ಹಬ್ಬಿಸುವ ಪ್ರಕ್ರಿಯೆ ( ಡಿಪ್ರ್ಯಾಕ್ಷನ್).

ಹಾರ್ಡ್ ಫೆರ್ರೋಮ್ಯಾಗ್ನೆಟಿಕ್ ಮೆಟೀರಿಯಲ್ಸ್ – ಕಠಿಣ ಪ್ರಬಲ ಅಯಸ್ಕಾಂತೀಯ ವಸ್ತುಗಳು – ಬಾಹ್ಯ ಕಾಂತಕ್ಷೇತ್ರವನ್ನು ತೆಗೆದ ನಂತರವೂ ತಮ್ಮ ಅಯಸ್ಕಾಂತತೆಯನ್ನು ಉಳಿಸಿಕೊಳ್ಳುವ ನಿಕ್ಕಲ್ ನಂತಹ ಕೆಲವು ವಸ್ತುಗಳು.

ಹಾರ್ಡ್ ರೇಡಿಯೇಷನ್ – ಕಠಿಣ ವಿಕಿರಣ – ತೀಕ್ಷ್ಣ ವಾದ ಒಳಪ್ರವೇಶಿಕ ಸಾಮರ್ಥ್ಯ ಇರುವಂತಹ ವಿಕಿರಣಕಾರಕ ಬೆಳಕು ಅಥವಾ ಕಿರಣಗಳು, ಅಥವಾ ಚಿಕ್ಕ ತರಂಗಾಂತರವುಳ್ಳ ಕ್ಷ-ಕಿರಣಗಳು.

ಹಾರ್ಡ್( ಹೈ) ವ್ಯಾಕ್ಯೂಮ್ – ಕಠಿಣ (ಉನ್ನತ) ನಿರ್ವಾತ – ನೂರು‌ ಮಿಲಿ ಪ್ಯಾಸ್ಕಲ್ ಗಳಿಗಿಂತ ಕಡಿಮೆ ಒತ್ತಡವುಳ್ಳ ನಿರ್ವಾತ.

ಹಾರ್ಡ್‌ವೇರ್ – (ಗಣಕಯಂತ್ರದ) ಯಂತ್ರಾಂಶ – ಗಣಕಯಂತ್ರದಲ್ಲಿ ವಾಸ್ತವಿಕವಾಗಿ ಬಳಸುವ ವಿದ್ಯುನ್ಮಾನೀಯ ಅಥವಾ ಯಾಂತ್ರಿಕ ಉಕಕರಣಗಳು‌( ಸಾಪ್ಟ್ ವೇರ್ ಅಂದರೆ ತಂತ್ರಾಂಶ = ದತ್ತಾಂಶ ಹಾಗೂ ಕಾರ್ಯಕ್ರಮ ಪಟ್ಟಿಗಳು).

ಹಾರ್ಮೋನಿಕ್ – ಸಮರಸ, ಸಮರೂಪೀ ಅಲೆ – ಒಂದು ಸಂಕೀರ್ಣ ಅಲೆರೂಪ ಅಥವಾ  ಕಂಪನದ ಸಂದರ್ಭದಲ್ಲಿ ಸಾಧ್ಯವಾಗುವ ಸರಳ ಅಲೆರೂಪೀ ಭಾಗ‌‌. ಇದು ಸೈನ್ ಅಲೆಯ  ರೂಪದಲ್ಲಿ ಇರುತ್ತದೆ. ಇದರಲ್ಲಿ ಏರುತಗ್ಗಿನ ಪ್ರಮಾಣ ಒಂದೇ ಸಮನಾಗಿರುತ್ತದೆ.