ಕನ್ನಡ ಕನ್ನಡಿ

ಫ್ಯೂಸ್ ಎಲೆಕ್ಟ್ರಿಕಲ್ – ವಿದ್ಯುತ್ ತಂತಿತುಂಡು – ಒಂದು ವಿದ್ಯುನ್ಮಂಡಲದಲ್ಲಿ  ಅಗತ್ಯಕ್ಕಿಂತ ಹೆಚ್ಚು ವಿದ್ಯುತ್ತು ಹರಿಯುವುದನ್ನು ತಡೆಯುವ ಒಂದು ತುಂಡುತಂತಿ‌ ಇದು. ಇದು, ಕಡಿಮೆ ಕರಗುಬಿಂದುವುಳ್ಳ ವಾಹಕದ ಒಂದು ತಂತಿಯ ತುಂಡು. ತುಂಬ ಹೆಚ್ಚು ವಿದ್ಯುತ್ ಹರಿದಾಗ ಈ ತಂತಿತುಂಡಿನ ತಾಪಮಾನವು ಹೆಚ್ಚುವುದರಿಂದ ಇದು ಕರಗಿ, ವಿದ್ಯುನ್ಮಂಡಲ ಮುರಿಯುತ್ತದೆ.

ಫ್ಯೂಸಿಬಲ್ ಅಲ್ಲೋಯ್ಸ್ – ಕರಗುವ ಮಿಶ್ರಲೋಹಗಳು – ಕಡಿಮೆ ಉಷ್ಣತೆ ( ಸುಮಾರು ನೂರು ಡಿಗ್ರಿ ಸೆಂಟಿಗ್ರೇಡ್) ಯಲ್ಲಿ ಕರಗುವ ಮಿಶ್ರಲೋಹಗಳು‌. ಬೆಂಕಿ‌ ಆರಿಸುವ ಕೊಳವೆಗಳು ಮುಂತಾದ ಅನೇಕ ವಸ್ತುಗಳ ತಯಾರಿಕೆಯಲ್ಲಿ‌‌ ಇವನ್ನು‌ ಉಪಯೋಗಿಸುತ್ತಾರೆ. ಬಿಸ್ಮತ್, ತವರ, ಸೀಸ ಮತ್ತು ಕ್ಯಾಡ್ಮಿಯಂಗಳ ‘ಉತ್ತಮ ಕರಗು ಮಿಶ್ರಣ’ದಿಂದ ಸಾಮಾನ್ಯವಾಗಿ ಇವನ್ನು ತಯಾರಿಸಲಾಗುತ್ತದೆ.

ಪ್ಯೂಷನ್ – ಬೆರೆಯುವಿಕೆ (ಸಂಯೋಗ) – ಎರಡು ಪರಮಾಣು ಬೀಜಕೇಂದ್ರಗಳು ಸಂಯೋಗಗೊಂಡು ಒಂದು ದೊಡ್ಡ ಬೀಜಕೇಂದ್ರವಾಗುವುದು‌.‌ 

ಫ್ಯೂಷನ್ ರಿಯಾಕ್ಟರ್ – ಸಂಯೋಗ ಪರಮಾಣು ಸ್ಥಾವರ – ಬೀಜಕೇಂದ್ರಗಳ ಸಂಯೋಗದಿಂದ ಉಂಟಾಗುವ ಉಷ್ಣತೆ/ಶಕ್ತಿಯನ್ನು ಉತ್ಪಾದಿಸುವ ಉಪಕರಣಗಳು. ಈ ಶಕ್ತಿಯನ್ನು ಬಳಸಿ ವಿದ್ಯುಚ್ಛಕ್ತಿಯನ್ನು ತಯಾರಿಸುತ್ತಾರೆ.

ಗೈನ್ – ಲಾಭ – ಬಲವರ್ಧಕವೊಂದರಲ್ಲಿ  ಒಳಹಾಕುವ ವಿದ್ಯುತ್ತಿಗೂ ಹೊರಬರುವ ವಿದ್ಯುತ್ತಿಗೂ ಇರುವ  ಅನುಪಾತ.

ಗ್ಯಾಲಕ್ಸಿ – ಆಕಾಶಗಂಗೆ – ನಕ್ಷತ್ರಗಳು, ಧೂಳು ಮತ್ತು ಅನಿಲಗಳ ಒಂದು ಬೃಹತ್ ಮೊತ್ತವಿದು. ಇವೆಲ್ಲವೂ ತಮ್ಮಲ್ಲಿನ ಪರಸ್ಪರ ಗುರುತ್ವಾಕರ್ಷಣ ಬಲದಿಂದಾಗಿ ಒಟ್ಟಿಗೆ ಇರುತ್ತವೆ.

ಗೆಲಿಲಿಯನ್ ಇನ್ವೇರಿಯನ್ಸ್ – ಗೆಲಿಲಿಯವರ ನಿತ್ಯಸತ್ಯ ಸಿದ್ಧಾಂತ ‌- ಒಂದು ಇನ್ನೊಂದಕ್ಕೆ ಸಂಬಂಧಿಸಿದಂತೆ, ಏಕರೂಪವಾದ  ವೇಗದಲ್ಲಿ ಚಲಿಸುತ್ತಿರುವ ಎರಡು ವಸ್ತುಗಳ ಮಟ್ಟಿಗಿನ ಭೌತಶಾಸ್ತ್ರದ ನಿಯಮಗಳು ಎಲ್ಲಾ ಪರಾಮರ್ಶನ ವ್ಯವಸ್ಥೆಗಳಲ್ಲೂ  ಒಂದೇ ಆಗಿರುತ್ತವೆ, ಬದಲಾಗುವುದಿಲ್ಲ. 

ಗೆಲೆಲಿಯನ್ ಟೆಲಿಸ್ಕೋಪ್ – ಗೆಲೆಲಿಯವರ ದೂರದರ್ಶಕ‌ – ನೇರ ಬಿಂಬವನ್ನು ಉಂಟುಮಾಡುವ, ಬೇರೆ ಬೇರೆ ಸಂಗಮದೂರಗಳನ್ನು ಹೊಂದಿರುವ ಎರಡು ಮಸೂರಗಳನ್ನು ಹೊಂದಿರುವ, ಗೆಲಿಲಿಯೋ ಗೆಲಿಲಿ ಎಂಬ ವಿಜ್ಞಾನಿಯು ಕಂಡುಹಿಡಿದಿರುವ ದೂರದರ್ಶಕ ಇದು. 

ಗ್ಯಾಲ್ವನೈಝ್ಡ್ ಐರನ್ – ಲೋಹ ಲೇಪಿತ ಕಬ್ಬಿಣ – ತುಕ್ಕು ಹಿಡಿಯದಂತೆ,  ಸತುವಿನ ಪದರವೊಂದನ್ನು ಲೇಪಿಸಿರುವ ಕಬ್ಬಿಣ ಅಥವಾ ಉಕ್ಕು.

ಗ್ಯಾಲ್ವನೋಮೀಟರ್ – ಗ್ಯಾಲ್ವನೋಮೀಟರು ಅಥವಾ ಕಿರುವಿದ್ಯುತ್ ಪತ್ತೆಯಂತ್ರ – ತುಂಬ ಕಡಿಮೆ ಪ್ರಮಾಣದ ವಿದ್ಯುತ್ತನ್ನು ಕಂಡು ಹಿಡಿಯಲು ಬಳಸುವ ಒಂದು ಉಪಕರಣ.