ಇಮ್ಮಡಿ ವಕ್ರೀಭವನ  ಕ್ಯಾಲ್ಸೈಟ್‌ನಂತಹ ಕೆಲವು ವಸ್ತುಗಳ ಹರಳುಗಳ ಮೂಲಕ ಬೆಳಕು ಹಾಯುವಾಗ ಪರಸ್ಪರ ಲಂಬವಾಗಿರುವ ಎರಡು ದಿಕ್ಕುಗಳಲ್ಲಿ ಸೀಳಿಕೊಳ್ಳುತ್ತದೆ. ಇವುಗಳಲ್ಲಿ ಒಂದನ್ನು ಸಾಮಾನ್ಯ ಕಿರಣ ಮತ್ತು ಇನ್ನೊಂದನ್ನು ಅಸಾಮಾನ್ಯ ಕಿರಣ ಎನ್ನುತ್ತಾರೆ. ಇದೇ ಇಮ್ಮಡಿ ವಕ್ರೀಭವನ.

ದ್ವಿಸ್ಥಿರಸ್ಥಿತಿ(ಹೀಗೊಮ್ಮೆ ಹಾಗೊಮ್ಮೆ ಲಾಗ ಹೊಡೆವ) ವಿದ್ಯುನ್ಮಂಡಲ – ಇದು ಎರಡೆರಡು ಸ್ಥಿರಸ್ಥಿತಿಯುಳ್ಳ ವಿದ್ಯುನ್ಮಂಡಲ. ಸಾಮಾನ್ಯವಾಗಿ ಇದು ಒಮ್ಮೆ ಹೀಗೆ ಒಮ್ಮೆ ಹಾಗೆ ಲಾಗ ಹೊಡೆಯುವ ಬಹುಕಂಪಕವಾಗಿರುತ್ತದೆ. ಇದನ್ನು ಗಣಕಯಂತ್ರಗಳಲ್ಲಿ ೦ ಮತ್ತು ೧ (ಜೋಡಿ ಅಂಕಿಗಳು) ಗಳನ್ನು ಸಂಗ್ರಹಿಸಲು ಮತ್ತು ಎಣಿಸಲು ಬಳಸುತ್ತಾರೆ.

ಜೋಡಿಕೊಳವೆ ದೂರದರ್ಶಕ – ಎರಡು ಕಣ್ಣುಗಳಿಗೂ ಒಂದೊಂದು ನೋಡುಕೊಳವೆಯನ್ನು ನೀಡಿ, ದೂರದಲ್ಲಿರುವ ವಸ್ತುಗಳು ದೊಡ್ಡದಾಗಿ ಮತ್ತು ಸ್ಪಷ್ಟವಾಗಿ ಕಾಣುವಂತೆ ಮಾಡುವ ದೃಷ್ಟಿವಿಜ್ಞಾನದ ಒಂದು ಉಪಕರಣ.

ದ್ವಿನಯನ ದೃಷ್ಟಿ  ಎರಡೂ ಕಣ್ಣುಗಳನ್ನು ಬಳಸಿಕೊಳ್ಳುವ ದೃಷ್ಟಿ. ನಮ್ಮ ಮೆದುಳು ಎರಡು ಬೇರೆ ಬೇರೆ ಬಿಂಬಗಳಿಂದ ಮೂರು ಆಯಾಮಗಳ, ಏಕೀಭವಿಸಿದ ನೋಟವನ್ನು ನಿರ್ಮಿಸುತ್ತದೆ.

ದ್ವಿಪದೋಕ್ತಿ ಪ್ರಮೇಯ – ಎರಡು ಚರಾಕ್ಷರಗಳಿರುವ ಗಣಿತೋಕ್ತಿ ಅಥವಾ ದ್ವಿಪದೋಕ್ತಿಯನ್ನು ವಿಸ್ತರಿಸುವಾಗ ಬಳಸುವ ನಿಯಮ.

ಜೀವಿಸೂಸಿತ ಪ್ರಕಾಶ – ಜೀವಿಗಳು ಹೊರಸೂಸುವ ತಾಪರಹಿತ ಬೆಳಕು. ಮಿಂಚುಹುಳುಗಳು, ಬ್ಯಾಕ್ಟೀರಿಯಾ, ಅಣಬೆಗಳು ಮತ್ತು ಸಮುದ್ರದಾಳದಲ್ಲಿರುವ ಅನೇಕ ಮೀನುಗಳು ಇಂತಹ ಬೆಳಕನ್ನು ಹೊರಸೂಸುತ್ತವೆ.

ಜೈವಿಕ ಭೌತಶಾಸ್ತ್ರ  ಜೀವಶಾಸ್ತ್ರೀಯ ವಿದ್ಯಮಾನ(ಆಗುಹೋಗುಗಳಿಗೆ) ಭೌತಶಾಸ್ತ್ರದ ನಿಯಮಗಳನ್ನು ಅನ್ವಯಿಸುವ ಜ್ಞಾನಶಿಸ್ತು.