ಐಸೋಟ್ರೋಪಿಕ್ – ಸಮವರ್ತಿ – ಒಂದು ಮಾಧ್ಯಮದ ಗುಣಲಕ್ಷಣಗಳು ಎಲ್ಲ ದಿಕ್ಕುಗಳಲ್ಲೂ ಅವವೇ ಆಗಿದ್ದರೆ, ಅಂದರೆ, ಆ ಭೌತಿಕ ಗುಣಲಕ್ಷಣಗಳಿಗೂ ಅದರ ದಿಕ್ಕಿಗೂ ಸಂಬಂಧವಿಲ್ಲ ಎನ್ನುವುದಾದರೆ ಅದನ್ನು ಸಮವರ್ತಿ ಎನ್ನುತ್ತಾರೆ.

ಐಸೀಟೋಪಿಕ್( ಐಸೋ/ ಐಸೋಬಾರಿಕ್) ಸ್ಪಿನ್ – ಸಮಸ್ಥಾನೀ(ಸಮ/ಸಮಭಾರಿ) ಗಿರಕಿ – ಒಂದು ರೀತಿಯ ಮೂಲಭೂತ ಕಣಗಳಾದ ಹೇಡ್ರಾನುಗಳಿಗೆ ನೀಡುವಂತಹ ಒಂದು ಶಕ್ತಿಪೊಟ್ಟಣ ( ಕ್ವಾಂಟಂ) ಸಂಖ್ಯೆ. ಬಹಳಷ್ಟು ರೀತಿಗಳಲ್ಲಿ ಸಮನಾಗಿದ್ದು, ವಿದ್ಯುತ್ ಕಾಂತೀಯ ಗುಣಲಕ್ಷಣಗಳಲ್ಲಿ ಮಾತ್ರ ಭಿನ್ನವಾಗುವ ಕಣಗಳ ಒಂದು ಕಟ್ಟಿನ ಸದಸ್ಯರನ್ನು ಗುರುತಿಸಲು ಈ ಪದವನ್ನು ಬಳಸಲಾಗುತ್ತದೆ.

ಐಸೋಟೋಪಿಕ್ ನಂಬರ್ –  ನ್ಯೂಟ್ರಾನ್ ಎಕ್ಸೆಸ್ – ಸಮಸ್ಥಾನಿ ಸಂಖ್ಯೆ (ನ್ಯೂಟ್ರಾನ್ ಆಧಿಕ್ಯ) – ಒಂದು ಸಮಸ್ಥಾನಿಯಲ್ಲಿ ಪ್ರೋಟಾನುಗಳ ಸಂಖ್ಯೆಗೂ ನ್ಯೂಟ್ರಾನುಗಳ ಸಂಖ್ಯೆಗೂ ಇರುವ ವ್ಯತ್ಯಾಸ‌.

ಐಸೋಟೋಪ್ ಸೆಪರೇಷನ್ – ಸಮಸ್ಥಾನಿಗಳ ಪ್ರತ್ಯೇಕೀಕರಣ – ಒಂದು ವಸ್ತುವಿನ ಸಮಸ್ಥಾನಿಗಳನ್ನು ಅವುಗಳ ಭೌತಿಕ ಗುಣಲಕ್ಷಣಗಳಲ್ಲಿರುವ ತುಸು ವ್ಯತ್ಯಾಸದ ಆಧಾರದ ಮೇಲೆ ಪ್ರತ್ಯೇಕಗೊಳಿಸುವುದು. ಇದನ್ನು ಮಾಡಲು ಬೇರೆ ಬೇರೆ ವಿಧಾನಗಳನ್ನು ಅನುಸರಿಸುತ್ತಾರೆ.

ಐಸೋಟೋಪ್ಸ್ – ಸಮಸ್ಥಾನಿಗಳು –  ಒಂದೇ ಪರಮಾಣು ಸಂಖ್ಯೆಯಿದ್ದು ಬೇರೆ ಬೇರೆ ದ್ರವ್ಯರಾಶಿ ಸಂಖ್ಯೆಗಳುಳ್ಳ ಒಂದು ವಸ್ತುವಿನ ಪರಮಾಣುಗಳು. ಇಂತಹ ಪ್ರಭೇದಗಳ ಪ್ರೋಟಾನು ಸಂಖ್ಯೆಯು ಸಮವಾಗಿದ್ದು, ನ್ಯೂಟ್ರಾನುಗಳ ಸಂಖ್ಯೆ ಭಿನ್ನವಾಗಿರುತ್ತದೆ. ಇವುಗಳಿಗೆ ಸಮಾನ ರಾಸಾಯನಿಕ ಗುಣಲಕ್ಷಣಗಳು ಹಾಗೂ ಭಿನ್ನವಾದ ಭೌತಿಕ ಗುಣಲಕ್ಷಣಗಳಿರುತ್ತವೆ.

ಐಸೋಟೋನ್ಸ್ – ಸಮಸಾರಿಗಳು ಅಥವಾ ಸಮಕೇಂದ್ರೀಯಗಳು – ಒಂದೇ ಸಂಖ್ಯೆಯ ನ್ಯೂಟ್ರಾನುಗಳನ್ನು ಆದರೆ ಬೇರೆ ಬೇರೆ ಸಂಖ್ಯೆಯ ಪ್ರೋಟಾನುಗಳನ್ನು ಹೊಂದಿರುವ ಬೀಜಕೇಂದ್ರಗಳು (ನ್ಯೂಕ್ಲೈಡುಗಳು).

ಐಸೋಥರ್ಮಲ್ ಟ್ರ್ಯಾನ್ಸ್ಫಾರ್ಮೇಷನ್ – ಸಮೋಷ್ಣ ಪರಿವರ್ತನೆ – ಉಷ್ಣಚಲನಾ ಶಾಸ್ತ್ರದಲ್ಲಿ ಸರ್ವೇಸಾಮಾನ್ಯವಾಗಿ ಬಳಸುವ ಪದ. ಸ್ಥಿರವಾದ ಉಷ್ಣತೆಯಲ್ಲಿ ಒಂದು ವಸ್ತುವಿನಲ್ಲಿ ಉಂಟಾಗುವ ಬದಲಾವಣೆಯನ್ನು ಇದು ಹೇಳುತ್ತದೆ.

ಐಸೋಥರ್ಮಲ್ ಪ್ರೋಸೆಸ್ – ಸಮತಾಪ ಅಥವಾ ಸಮೋಷ್ಣ ಪ್ರಕ್ರಿಯೆ – ತನ್ನ ಉದ್ದಕ್ಕೂ ಉಷ್ಣತೆಯು ಸ್ಥಿರವಾಗಿರುವಂತಹ ಪ್ರಕ್ರಿಯೆ. ಇದರಲ್ಲಿ ವ್ಯವಸ್ಥೆಯು, ಬದಲಾವಣೆಯುದ್ದಕ್ಕೂ ತನ್ನ ಸುತ್ತಮುತ್ತಲ ಪರಿಸರದೊಂದಿಗೆ ಸಮತೋಲನದಲ್ಲಿರುತ್ತದೆ.

ಐಸೋಥರ್ಮ್ – ಸಮತಾಪರೇಖೆ – ಸಮ ಉಷ್ಣತೆಯುಳ್ಳ ಬಿಂದುಗಳು ಸೇರುತ್ತಾ ಹೋಗುವ ಒಂದು ರೇಖೆ ಅಥವಾ ರೇಖಾಚಿತ್ರ.

ಐಸೋಮಾರ್ಫಿಸಂ. – ಸಮರೂಪತೆ – ರಾಸಾಯನಿಕವಾಗಿ ಪರಸ್ಪರ ಸಂಬಂಧ ಹೊಂದಿರುವ ವಸ್ತುಗಳಲ್ಲಿನ ಹರಳುಗಳ ರೂಪ ಅಥವಾ ರಚನೆಯಲ್ಲಿನ ಸಮತೆ.