ಎಚ್.ಎಫ್.( ಹೈ ಫ್ರೀಕ್ವೆನ್ಸಿ) ವೆಲ್ಡಿಂಗ್ – ಉಚ್ಚ ಆವರ್ತನ ಬೆಸುಗೆ – ತಾಪ ಪ್ಲಾಸ್ಟಿಕ್ ವಸ್ತುಗಳಿಗೆ ಬೆಸುಗೆ ಹಾಕುವ ವಿಧಾನ. ಇದರಲ್ಲಿ ವಸ್ತುಗಳನ್ನು ಒಟ್ಟಿಗೆ ಬೆಸೆಯುವ ತಾಪವನ್ಜು ವಿದ್ಯುತ್ ಕಾಂತೀಯ ಆವರ್ತನ ವಿಕಿರಣದಿಂದ ಉತ್ಪತ್ತಿ ಮಾಡಲಾಗುತ್ತದೆ.

ಹಿಸ್ಟಿರಿಸಿಸ್ ಲಾಸ್ – ವಿಲಂಬನ ನಷ್ಟ – ವಿಲಂಬನ ಪರೊಣಾಮದಿಂದಾಗಿ ಉಂಟಾಗುವ ಶಕ್ತಿನಷ್ಟ.

ಹಿಸ್ಟಿರಿಸಿಸ್ ಲೂಪ್ – ಉಳಿಕೆ ಪರಿಣಾಮ ( ವಿಲಂಬನ) ಸುತ್ತು – ಪ್ರಾರಂಭದಲ್ಲಿ ನಿಷ್ಕಾಂತಗೊಳಿಸಿದ ಪ್ರಬಲ ಕಾಂತವಸ್ತುವೊಂದನ್ನು ಕಾಂತಕ್ಷೇತ್ರ ವ್ಯತ್ಯಾಸಗಳ ಆವರ್ತನಗಳಿಗೆ ಒಳಪಡಿಸಿದಾಗ ಉಂಟಾಗುವ ಒಂದು‌ ಕಾಂತಮಂಡಲ.

ಹಿಸ್ಟಿರಿಸಿಸ್ – ಉಳಿಕೆ ಪರಿಣಾಮ ( ವಿಲಂಬನ) – ಯಾವುದಾದರೊಂದು ಪರಿಣಾಮವುಂಟಾದಾಗ ಅದು ಮುಗಿದ ನಂತರವೂ ಉಳಿಯುವ ‘ಉಳಿಕೆ ವಿಷಯ’. ಉದಾಹರಣೆಗೆ, ಪ್ರಬಲ ಕಾಂತ ವಸ್ತುಗಳನ್ನು ಕಾಂತಗೊಳಿಸಿಯಾದ ಮೇಲೆ, ಆ ಕಾಂತತ್ವವನ್ನು ತೆಗೆದ ಮೇಲೂ ಅವುಗಳಲ್ಲಿ ಸ್ವಲ್ಪ ಕಾಂತೀಯತೆ ಉಳಿದಿರುತ್ತದೆ. ಇದನ್ನು ಉಳಿಕೆ ಪರಿಣಾಮ ಎನ್ನುತ್ತಾರೆ. 

 ಹೈಪರ್ಸಾನಿಕ್ – ಶಬ್ದಾತೀತ – ಶಬ್ದಾತೀತ ಪ್ರವಾಹಗಳಿಗೆ ಸಂಬಂಧ ಪಟ್ಟದ್ದು. ಮಾಚ್ ( ದ್ರವಗಳ ವೇಗಕ್ಕೆ ಸಂಬಂಧಪಟ್ಟ ಒಂದು ಸಂಖ್ಯೆ) 5 ಅಥವಾ ಅದಕ್ಕಿಂತ ಹೆಚ್ಚಿನ ವೇಗಗಳಿಗೆ ಸಂಬಂಧಿಸಿರುತ್ತೆ.

ಹಿಪ್ಸೋಮೀಟರ್ – ಕುದಿಬಿಂದು ಮಾಪಕ – ಒಂದು ದ್ರವದ ಕುದಿಬಿಂದುವನ್ನು ಅಳೆಯಲು ಬಳಸುವ ಉಪಕರಣ. ಆವಿಯ ಉಷ್ಣತೆಯಲ್ಲಿ ಉಷ್ಣಮಾಪಕಗಳ ಮೇಲೆ ಗುರುತುಗಳನ್ನು ಮಾಡಲು ಸಹ ಇದನ್ನು ಬಳಸುತ್ತಾರೆ.

ಹೈಪರಾನ್ – ಹೈಪರಾನು – ತುಂಬ ಕಡಿಮೆ ಹೊತ್ತು ಅಸ್ತಿತ್ವದಲ್ಲಿರುವ ಒಂದು ಮೂಲಭೂತ ಕಣ. ಇದು ಬೇರ್ಯಾನುಗಳ ಪಟ್ಟಿಗೆ ಸೇರುತ್ತದೆ ಮತ್ತು ಸೊನ್ನೆಯಲ್ಲದ ವಿಲಕ್ಷಣತೆ (strangeness)ಯನ್ನು ಹೊಂದಿರುತ್ತದೆ.

ಹೈಪರ್ ಮೆಟ್ರೋಪಿಯಾ (ಹೈಪರೋಪಿಯಾ) – ದೂರದೃಷ್ಟಿ ದೋಷ – ಒಂದು ದೃಷ್ಟಿದೋಷ. ಇದರಲ್ಲಿ ಅಕ್ಷಿಪಟಲದ ಮೇಲೆ ಹತ್ತಿರದ ವಸ್ತುಗಳ  ಬಿಂಬವು ಸರಿಯಗಿ ಬೀಳದಿರುವುದರಿಂದ ಅವು ಸರಿಯಾಗಿ ಕಾಣುವುದಿಲ್ಲ. ಉಬ್ಬುಮಸೂರ ( ಕಾನ್ವೆಕ್ಸ್ ಲೆನ್ಸ್) ಇರುವ ಕನ್ನಡಕವನ್ನು ಹಾಕಿಕೊಂಡು ಈ  ದೋಷವನ್ನು ಸರಿಪಡಿಸಬೇಕು.

ಹೈಪರ್  ಫೈನ್ ಸ್ಟ್ರಕ್ಚರ್ – ಅತಿ ಸೂಕ್ಷ್ಮ ರಚನೆ – ವರ್ಣಪಟಲದ ಗೆರೆ ಅಥವಾ ಪಟ್ಟಿಯಲ್ಲಿ,  ಪರಮಾಣುವಿನ ಶಕ್ತಿಮಟ್ಟವನ್ನು ಪರಮಾಣು ಬೀಜಕೇಂದ್ರವು ಪರಿಣಮಿಸಿದಾಗ ಉಂಟಾಗುವ ತುಂಬ ಸೂಕ್ಷ್ಮವಾದ ಗೆರೆಗಳು.

ಹೈಪರ್ ಛಾರ್ಜ್ – ಅತಿ ವಿದ್ಯುದಂಶ – ಬೇರಿಯಾನ್ಸ್ ಎಂಬ ಅಂತರ್ ಪರಮಾಣು ಅಂದರೆ ಪರಮಾಣುವಿನ ಒಳಗಿರುವ ಕಣಗಳ ಒಂದು ಗುಣಲಕ್ಷಣವನ್ನು ಹೇಳಲು ಬಳಸುವ ಪದ ಇದು.  ಪರಮಾಣುಗಳ ಒಳಗೆ ಪ್ರಬಲ ಅಂತರ್ ಕ್ರಿಯೆಗಳು ಉಂಟಾಗುವ ಸಂದರ್ಭಗಳಲ್ಲಿ ಕೆಲವು ಸಲ ನಿರೀಕ್ಷಿತ ಒಡೆಯುವಿಕೆಗಳು ನಡೆಯದೆ ವಿಚಿತ್ರ ಪರಿಸ್ಥಿತಿ ನಿರ್ಮಾಣ ಆದಾಗ, ಅದನ್ನು ವಿವರಿಸಲು ಬಳಸುವ ಒಂದು ಪರಿಮಾಣಾತ್ಮಕ ( ಕ್ವಾಂಟೈಜ್ಡ್) ಗುಣಲಕ್ಷಣ. ಅತಿ ವಿದ್ಯುದಂಶವು ದುರ್ಬಲ ಅಂತರ್ ಕ್ರಿಯೆಗಳಲ್ಲಿ ವಿನಿಮಯಗೊಳ್ಳುವುದಿಲ್ಲ.