ಹಾಲ್ ಎಫೆಕ್ಟ್ – ಹಾಲ್ ಪರಿಣಾಮ ‌- ಅಡ್ಡಡ್ಡವಾಗಿರುವ ಬಲವಾದ ಕಾಂತಕ್ಷೇತ್ರ ಇರುವಾಗ ಒಂದು ವಾಹಕ ಅಥವಾ ಅರೆವಾಹಕದಲ್ಲಿ ವಿದ್ಯುತ್ ಕಾಂತೀಯ ಬಲವು ಉತ್ಪತ್ತಿ ಆಗುವುದು.  ಇದನ್ನು‌ ಕಂಡುಹಿಡಿದ ವಿಜ್ಞಾನಿ – ಎಡ್ವಿನ್ ಹರ್ಬರ್ಟ್ ಹಾಲ್(1855-1938) ಎಂಬ ಅಮೆರಿಕಾದ ಭೌತಶಾಸ್ತ್ರಜ್ಞ.

ಅರ್ಧ ಅಗಲ‌ – ಒಂದು ವರ್ಣಪಟಲ ರೇಖೆಯ ಅಗಲದ ಅರ್ಧ ಅಥವಾ ಕೆಲವು ಸಂದರ್ಭಗಳಲ್ಲಿ, ಅದರ ಪೂರ್ತಿ ಅಗಲವನ್ನು ಅರ್ಧ ಎತ್ತರದಲ್ಲಿ ಅಳೆಯುವಂಥದ್ದು.

ಹಾಫ್ ವೇವ್ ರೆಕ್ಟಿಫೈಯರ್ – ಅರ್ಧ ಅಲೆ ಏಕದಿಶಾಕಾರಕ – ವಿದ್ಯುತ್ತನ್ನು ಒಂದೇ ದಿಕ್ಕಿಗೆ ಹರಿಯುವಂತೆ ಮಾಡುವ ಉಪಕರಣ‌.  ಇದು ವಿದ್ಯುತ್ ಅಲೆಯ ಅರ್ಧಭಾಗವನ್ನು ಮಾತ್ರ ಹರಿಯಲು‌ ಬಿಟ್ಟು ಇನ್ನುಳಿದ ಅರ್ಧ ಭಾಗವನ್ನು ತಡೆಯುತ್ತದೆ.

ಹಾಫ್ ವೇವ್ ಪ್ಲೇಟ್ – ಅರ್ಧ ಅಲೆ ಫಲಕ – ಬೆಳಕಿನ ಧ್ರುವೀಕರಣದ ಸ್ಥಾನಾಂತರ ಮಾಡುವುದಕ್ಕಾಗಿ ಬಳಸುವಂತಹ ಒಂದು ತೆಳುವಾದ ಫಲಕ. ಇದನ್ನು ದುಪ್ಪಟ್ಟು ವಕ್ರೀಭವನ ಸಾಮರ್ಥ್ಯವುಳ್ಳ ವಸ್ತುವಿನಿಂದ ಮಾಡಿದ್ದು, ಇದರಲ್ಲಿ ಮೇಲ್ಮೈಗಳ ಸಮಾನಾಂತರ ಜೋಡಣೆ ಇರುತದೆ.

ಹಾಫ್ ಲೈಫ್ –  ಅರ್ಧಾಯುಷ್ಯ- ಒಂದು ದತ್ತ ವಿಕಿರಣ ವಸ್ತುವಿನ ಒಟ್ಟು ಪ್ರಮಾಣದ ಅರ್ಧ ಭಾಗವು ವಿದಳನಗೊಳ್ಳಲು ಅವಶ್ಯಕವಾಗಿರುವ ಸಮಯ‌. ಒಂದು ವಸ್ತುವಿನ ಅರ್ಧಾಯುಷ್ಯವು‌ ಎಷ್ಟು ಹೆಚ್ಚಿಸುತ್ತದೋ ಅದು ಅಷ್ಟು ಸ್ಥಿರವಾಗಿರುತ್ತದೆ.

ಹಾಫ್ ಸೆಲ್ – ಅರ್ಧಕೋಶ – ವಿದ್ಯುತ್ ರಾಸಾಯನಿಕ ಕೋಶ ಅಥವಾ ವಿದ್ಯುತ್ ವಿಭಜಕ‌ ಕೋಶದಲ್ಲಿನ ಒಂದು ವಿದ್ಯುದ್ವಾರ ಮತ್ತು ಅದರ ಸಂಪರ್ಕದಲ್ಲಿರುವ ವಿದ್ಯುತ್ ವಿಭಜಕ ದ್ರಾವಣ.