ಮ್ಯಾಗ್ನಿಫೈಯಿಂಗ್ ಗ್ಲಾಸ್ – ವರ್ಧನಾ ಮಸೂರ – ಒಂದು ಉಬ್ಬು ಮಸೂರ. ಇದನ್ನು ಸೂಕ್ಷ್ಮದರ್ಶಕದಲ್ಲಿ‌ ಬಳಸುತ್ತಾರೆ.

ಮ್ಯಾಗ್ನಿಫಿಕೇಷನ್ – (ಬಿಂಬ) ವರ್ಧನ – ಒಂದು ಮಸೂರ, ಕನ್ನಡಿ ಅಥವಾ  ಯಾವುದೇ ಉಪಕರಣವು ಒಂದು ವಸ್ತುವಿನ ಬಿಂಬವನ್ನು ವರ್ಧಿಸುವ ಅಳತೆ/ ಪ್ರಕ್ರಿಯೆ ಇದು.

ಮ್ಯಾಗ್ನೆಟ್ರಾನ್ – ಕಾಂತೀಯ ಕಣವೇಗವರ್ಧಕ – ಇದೊಂದು ನಿರ್ವಾತ ಕೊಳವೆ ; ಇದರಲ್ಲಿ ಅಪೇಕ್ಷಿತ ವಿದ್ಯುತ್ ಕಾಂತೀಯ ಅಲೆಗಳನ್ನು ( ಆವರ್ತನಗತಿಗಳನ್ನು) ಪಡೆಯಲು, ಎಲೆಕ್ಟ್ರಾನುಗಳ ಪ್ರವಾಹವನ್ನು ಆನ್ವಯಿಕ ಕಾಂತಕ್ಷೇತ್ರದಿಂದ ನಿರ್ಬಂಧಿಸಲಾಗುತ್ತದೆ.

ಮ್ಯಾಗ್ನೆಟೋಸ್ಫಿಯರ್ – ಕಾಂತಗೋಳ ಅಥವಾ ಕಾಂತಮಂಡಲ – ಇದು ಭೂಮಿ ಮತ್ತು ಅದರಂತಹ ಇತರ ಕಾಂತಗುಣೀ ಗ್ರಹಗಳನ್ನು ಸುತ್ತುವರಿದಿರುವ ಧೂಮಕೇತು ಆಕಾರದ ಪ್ರದೇಶ. ಇದರಲ್ಲಿನ ಸೌರವ್ಯೂಹ ಸಂಬಂಧೀ ವಿದ್ಯುದಂಶಗಳನ್ನು ಸೂರ್ಯನ ಕಾಂತಕ್ಷೇತ್ರವು ನಿಯಂತ್ರಿಸುವುದಕ್ಕಿಂತ ಹೆಚ್ಚಾಗಿ ಆ ಗ್ರಹದ ಕಾಂತಕ್ಷೇತ್ರವೇ ನಿಯಂತ್ರಿಸುತ್ತದೆ.

ಮ್ಯಾಗ್ನೆಟೋ ರೆಸಿಸ್ಟೆನ್ಸ್ ಎಫೆಕ್ಟ್ – ಕಾಂತೀಯ ನಿರೋಧಕ ಪರಿಣಾಮ – ಬಾಹ್ಯ ಕಾಂತಕ್ಷೇತ್ರವು ಬದಲಾದಾಗ ಪ್ರಯೋಗಕ್ಕೆ ಆಯ್ದ ವಸ್ತುವಿನ‌ ವಿದ್ಯುತ್ ನಿರೋಧಕತೆಯಲ್ಲಿ ಉಂಟಾಗುವಂತಹ ಬದಲಾವಣೆ‌.

ಮ್ಯಾಗ್ನೆಟೋ ಆಪ್ಟಿಕಲ್ ಎಫೆಕ್ಟ್ಸ್ – ಕಾಂತೀಯ ದೃಶ್ಯಬೆಳಕು ಪರಿಣಾಮಗಳು – ಬಾಹ್ಯ ಕಾಂತಕ್ಷೇತ್ರವು ಬದಲಾದಾಗ ವಸ್ತುವಿನ ದೃಶ್ಯಬೆಳಕು ವರ್ತನೆಗಳಲ್ಲಿ ಆಗುವ ಪರಿಣಾಮಗಳು‌, ಉದಾಹರಣೆಗೆ, ಫ್ಯಾರಡೇ ಪರಿಣಾಮ ಹಾಗೂ ಕೆನ್ ಪರಿಣಾಮ.

ಮ್ಯಾಗ್ನೆಟಾನ್ – ಮ್ಯಾಗ್ನೆಟಾನ್  – ಬೀಜಕೇಂದ್ರೀಯ ಪರಮಾಣು ಅಥವಾ ಅಣು ಅಯಸ್ಕಾಂತದ ಕಾಂತೀಯ ತಿರುಗುಬಲವನ್ನು ಅಳೆಯಲು ಬಳಸುವ ಒಂದು ಮೂಲಮಾನ.

ಮ್ಯಾಗ್ನೆಟೋ ಮೋಟಿವ್ ಫೋರ್ಸ್ ( ಮ್ಯಾಗ್ನೆಟಿಕ್ ಪೊಟೆನ್ಶಿಯಲ್ ) – ಕಾಂತೀಯ ಚಾಲಕ ಬಲ( ಕಾಂತೀಯ ಅಂತಃ ಸಾಮರ್ಥ್ಯ) – ವಿದ್ಯುನ್ಮಂಡಲದಲ್ಲಿ ವಿದ್ಯುತ್ ಚಾಲಕ ಬಲವಿದ್ದಂತೆ ಕಾಂತೀಯ ಮಂಡಲದಲ್ಲಿ ಕಾಂತೀಯ ಚಾಲಕ ಬಲ. ಇದು ಒಂದು ಪೂರ್ಣಪಥದಲ್ಲಿನ‌ ಕಾಂತಕ್ಷೇತ್ರದಲ್ಲಿನ  ಒಂದು ಗಣಿತೀಯ ಗುಣಕ ( ಇಂಟೆಗ್ರಲ್). ಇದರ ಮೂಲಮಾನ‌ ಆಂಪಿಯರ್ ಟರ್ನ್.