ಫಿಶನ್ – ವಿದಳನ( ಒಡೆಯುವಿಕೆ) – ಪರಮಾಣು ಬೀಜಕೇಂದ್ರವು ಎರಡು ಅಥವಾ ಅದಕ್ಕಿಂತ ಹೆಚ್ಚು ಚೂರುಗಳಾಗಿ ಒಡೆದುಕೊಳ್ಳುವುದು (ವಿದಳನಗೊಳ್ಳುವುದು).

ಫಿಸ್ಸೈಲ್ ಮೇಟೀರಿಯಲ್ – ವಿದಳನ ವಸ್ತು –  ಬೀಜ ಕೇಂದ್ರ ವಿದಳನ ( ಒಡೆಯುವ) ಕ್ರಿಯೆಗೆ ಒಳಗಾಗುವ ವಸ್ತು ಅಥವಾ ಸಾಮಗ್ರಿ. ಕೆಲವು ಸಲ ಈ‌ ಕ್ರಿಯೆಯು ವಿದಳನ ವಸ್ತುವಿನಲ್ಲಿ ತನ್ನಂತಾನೇ ನಡೆಯುತ್ತದೆ‌. ಆದರೆ ಸಾಮಾನ್ಯವಾಗಿ ನ್ಯೂಟ್ರಾನ್‌ಗಳಿಂದ ವಿಕರಣೀಕರಿಸಿದಾಗ ಈ‌ ವಿದಳನ  ನಡೆಯುತ್ತದೆ.

ಫೈನ್ ಸ್ಟ್ರಕ್ಚರ್ – ವರ್ಣಪಟಲವೊಂದರ ಗೆರೆ ಅಥವಾ ಪಟ್ಟಿಯಲ್ಲಿರುವಂತಹ, ಹೆಚ್ಚಿನ ವಿಂಗಡಿಸುವಿಕೆಯಲ್ಲಿ‌ ಗೋಚರವಾಗುವ, ತುಂಬ ಹತ್ತಿರ ಹತ್ತಿರ ಇರುವ ಗೆರೆಗಳು. ಎಲೆಕ್ಟ್ರಾನು ಗಿರಕಿ ಅಥವಾ ಅಣುಗಳ ಕಂಪನಯುತ ಚಲನೆಯಿಂದಾಗಿ ಇಂತಹ ನಾಜೂಕು ರಚನೆಗಳು ಉಂಟಾಗುತ್ತವೆ‌.

ಫಿಲ್ಟರ್- ಸೋಸುಕ – ಇದು ಒಂದು ಉಪಕರಣ ಅಥವಾ ವಿದ್ಯುನ್ಮಂಡಲ‌ ; ಇದು ಕೆಲವು ನಿರ್ದಿಷ್ಟ ಆವರ್ತನಗಳನ್ನು ಮಾತ್ರ ಒಳಗೆ ಸರಿಯಲು ಬಿಟ್ಟು ಇನ್ನುಳಿದ ಆವರ್ತನಗಳ ಪರಿಣಾಮವನ್ನು ಕಡಿಮೆ ಮಾಡುತ್ತದೆ.

ಫಿಲಮೆಂಟ್ – ತಂತು (ದಾರದಂತಿರುವ ತಂತಿ) – ತುಂಬ ಹೆಚ್ಚಿನ ಕುದಿಬಿಂದು ಹೊಂದಿರುವ ‌ಟಂಗ್ ಸ್ಟನ್ ಅಥವಾ ಬೇರೆ ಲೋಹದ, ದಾರದಷ್ಟು ತೆಳುವಾಗಿರುವ ತಂತಿ.‌ ಇದನ್ನು ಪ್ರಕಾಶ ಬೀರುವಂತಹ ವಿದ್ಯುತ್ ದೀಪಗಳಲ್ಲಿ ಮತ್ತು ಉಷ್ಣಅಯಾನು ಕವಾಟಗಳಲ್ಲಿ ಬಳಸುತ್ತಾರೆ.

ಫೀಲ್ಡ್ ಮ್ಯಾಗ್ನೆಟ್ – ಕ್ಷೇತ್ರ ಅಯಸ್ಕಾಂತ – ಒಂದು ವಿದ್ಯುತ್ ಉಪಕರಣದಲ್ಲಿ ಕಾಂತಕ್ಷೇತ್ರವನ್ನು ನೀಡುವಂತಹ ಅಯಸ್ಕಾಂತ. ಕೆಲವು‌ ಚಿಕ್ಕ ವಿದ್ಯುಜ್ಜನಕ ಅಥವಾ ವಿದ್ಯುದುತ್ಪಾದಕ ಯಂತ್ರಗಳಲ್ಲಿ ಇದು ಶಾಶ್ವತ ಅಯಸ್ಕಾಂತವಾಗಿರುತ್ತದೆ‌, ಆದರೆ ಬಹುತೇಕ ಯಂತ್ರಗಳಲ್ಲಿ ಇದೊಂದು ವಿದ್ಯುತ್ ಕಾಂತವಾಗಿರುತ್ತದೆ.

ಫೀಲ್ಡ್ ಲೆನ್ಸ್ – ಕ್ಷೇತ್ರ ಮಸೂರ – ಬೆಳಕುವಿಜ್ಞಾನದ ಒಂದು ಉಪಕರಣದಲ್ಲಿನ ಮಸೂರಸಂಯೋಜನೆಗಳಲ್ಲಿ, ಕಣ್ಣಿನಿಂದ ಗರಿಷ್ಠ ದೂರದಲ್ಲಿರುವ ‌ಮಸೂರ.

ಫೀಲ್ಡ್ ಐಯೋನೈಸೇಷನ್ ಮೈಕ್ರೋಸ್ಕೋಪ್ – ಇದು ಕ್ಷೇತ್ರೀಯ ಹೊರಸೂಸುವಿಕೆಯುಳ್ಳ  ಸೂಕ್ಷ್ಮದರ್ಶಕದಂತೆಯೇ ಕೆಲಸ ಮಾಡುತ್ತದೆ. ಒಂದೇ ಒಂದು ವ್ಯತ್ಯಾಸವೆಂದರೆ, ಲೋಹದ ಚೂಪುತುದಿಯನ್ನು ನಿರ್ವಾತದಲ್ಲಿಡುವ ಬದಲು ಕಡಿಮೆ ಒತ್ತಡವುಳ್ಳ ಅನಿಲವೊಂದರಲ್ಲಿ ( ಉದಾಹರಣೆಗೆ ಹೀಲಿಯಂ) ಇಟ್ಟಿರುತ್ತಾರೆ.

ಫೀಲ್ಡ್ ಎಮಿಷನ್ ಮೈಕ್ರೋಸ್ಕೋಪ್ – ಕ್ಷೇತ್ರೀಯ ಹೊರಸೂಸುವಿಕೆಯುಳ್ಳ ಸೂಕ್ಷ್ಮದರ್ಶಕ – ಇದು ಒಂದು ರೀತಿಯ ಎಲೆಕ್ಟ್ರಾನ್ ಸೂಕ್ಷ್ಮದರ್ಶಕ. ಇದರಲ್ಲಿ ನಿರ್ವಾತದಲ್ಲಿರುವ ಲೋಹದ ಚೂಪುತುದಿಯೊಂದಕ್ಕೆ ಹೆಚ್ಚಿನ ವಿದ್ಯುತ್ ಸಾಮರ್ಥ್ಯವ್ಯತ್ಯಾಸವನ್ನು‌‌‌ ನೀಡಿ, ಎಲೆಕ್ಟ್ರಾನುಗಳು ಹೊರಸೂಸುವಂತೆ ಮಾಡಲಾಗುತ್ತದೆ.

ಫೀಲ್ಡ್ ಎಮಿಷನ್ – ಕ್ಷೇತ್ರೀಯ ಹೊರಸೂಸುವಿಕೆ – ಕಾಯಿಸಿದರೂ ತನ್ನ ತಾಪಮಾನವು ಹೆಚ್ಚಾಗದಿರುವ ಮೇಲ್ಮೈ ಯೊಂದರಿಂದ, ತನ್ನಲ್ಲಿರುವ ಪ್ರಬಲ ವಿದ್ಯುತ್ ಕ್ಷೇತ್ರದಿಂದಾಗಿ ಎಲೆಕ್ಟ್ರಾನುಗಳು ಹೊರಸೂಸುವುದು‌.