ಫ್ಯೂಷನ್ ರಿಯಾಕ್ಟರ್ – ಸಂಯೋಗ ಪರಮಾಣು ಸ್ಥಾವರ – ಬೀಜಕೇಂದ್ರಗಳ ಸಂಯೋಗದಿಂದ ಉಂಟಾಗುವ ಉಷ್ಣತೆ/ಶಕ್ತಿಯನ್ನು ಉತ್ಪಾದಿಸುವ ಉಪಕರಣಗಳು. ಈ ಶಕ್ತಿಯನ್ನು ಬಳಸಿ ವಿದ್ಯುಚ್ಛಕ್ತಿಯನ್ನು ತಯಾರಿಸುತ್ತಾರೆ.

ಪ್ಯೂಷನ್ – ಬೆರೆಯುವಿಕೆ (ಸಂಯೋಗ) – ಎರಡು ಪರಮಾಣು ಬೀಜಕೇಂದ್ರಗಳು ಸಂಯೋಗಗೊಂಡು ಒಂದು ದೊಡ್ಡ ಬೀಜಕೇಂದ್ರವಾಗುವುದು‌.‌ 

ಫ್ಯೂಸಿಬಲ್ ಅಲ್ಲೋಯ್ಸ್ – ಕರಗುವ ಮಿಶ್ರಲೋಹಗಳು – ಕಡಿಮೆ ಉಷ್ಣತೆ ( ಸುಮಾರು ನೂರು ಡಿಗ್ರಿ ಸೆಂಟಿಗ್ರೇಡ್) ಯಲ್ಲಿ ಕರಗುವ ಮಿಶ್ರಲೋಹಗಳು‌. ಬೆಂಕಿ‌ ಆರಿಸುವ ಕೊಳವೆಗಳು ಮುಂತಾದ ಅನೇಕ ವಸ್ತುಗಳ ತಯಾರಿಕೆಯಲ್ಲಿ‌‌ ಇವನ್ನು‌ ಉಪಯೋಗಿಸುತ್ತಾರೆ. ಬಿಸ್ಮತ್, ತವರ, ಸೀಸ ಮತ್ತು ಕ್ಯಾಡ್ಮಿಯಂಗಳ ‘ಉತ್ತಮ ಕರಗು ಮಿಶ್ರಣ’ದಿಂದ ಸಾಮಾನ್ಯವಾಗಿ ಇವನ್ನು ತಯಾರಿಸಲಾಗುತ್ತದೆ.

ಫ್ಯೂಸ್ ಎಲೆಕ್ಟ್ರಿಕಲ್ – ವಿದ್ಯುತ್ ತಂತಿತುಂಡು – ಒಂದು ವಿದ್ಯುನ್ಮಂಡಲದಲ್ಲಿ  ಅಗತ್ಯಕ್ಕಿಂತ ಹೆಚ್ಚು ವಿದ್ಯುತ್ತು ಹರಿಯುವುದನ್ನು ತಡೆಯುವ ಒಂದು ತುಂಡುತಂತಿ‌ ಇದು. ಇದು, ಕಡಿಮೆ ಕರಗುಬಿಂದುವುಳ್ಳ ವಾಹಕದ ಒಂದು ತಂತಿಯ ತುಂಡು. ತುಂಬ ಹೆಚ್ಚು ವಿದ್ಯುತ್ ಹರಿದಾಗ ಈ ತಂತಿತುಂಡಿನ ತಾಪಮಾನವು ಹೆಚ್ಚುವುದರಿಂದ ಇದು ಕರಗಿ, ವಿದ್ಯುನ್ಮಂಡಲ ಮುರಿಯುತ್ತದೆ.

ಫಂಡಮೆಂಟಲ್ ಫ್ರೀಕ್ವೆನ್ಸಿ – ಮೂಲಭೂತ ಕಂಪನ – ಒಂದು ವಸ್ತುವು ಕಂಪಿಸಬಲ್ಲ ಅತ್ಯಂತ ಸರಳ ರೀತಿ ಇದು. ಈ ಕಂಪನದ ಆವರ್ತನವೇ ಮೂಲಭೂತ ಆವರ್ತನ.

ಫ್ಯೂಸ್ ಅಲಾರ್ಮ್ – ರಕ್ಷಕ ತಂತಿ‌ ಎಚ್ಚರಗಂಟೆ – ರಕ್ಷಕ ತಂತಿಯು ಸುಟ್ಟುಹೋದಾಗ ಶ್ರವ್ಯ ಅಥವಾ ದೃಶ್ಯ ಸಂಕೇತವನ್ನು ಕೊಡುವಂತಹ ವಿದ್ಯುನ್ಮಂಡಲ.

ಫಂಡಮೆಂಟಲ್ ಯೂನಿಟ್ಸ್ – ಮೂಲಭೂತ( ಮೂಲಾಧಾರ) ಮೂಲಮಾನಗಳು – ಉದ್ದ, ದ್ರವ್ಯರಾಶಿ ಮತ್ತು ಸಮಯದ ಮೂಲಮಾನಗಳು‌. ಇವು ಬಹುತೇಕ ಮೂಲಮಾನ ವ್ಯವಸ್ಥೆಗಳ ಆಧಾರಸ್ತಂಭಗಳಾಗಿವೆ. ಬಹು ಪ್ರಚಲಿತವಾಗಿರುವ ಎಸ್.ಐ. ಮೂಲಮಾನ ವ್ಯವಸ್ಥೆ ( ಸಿಸ್ಟಮೆ ಇಂಟರ್ ನ್ಯಾಷನಲ್) ಯಲ್ಲಿರುವ ಮೂಲಭೂತ ಮೂಲಮಾನಗಳೆಂದರೆ ಮೀಟರ್, ಕಿಲೋಗ್ರಾಂ ಮತ್ತು ಸೆಕೆಂಡ್.

ಫಂಡಮೆಂಟಲ್ ಪಾರ್ಟಿಕಲ್ಸ್  – ಮೂಲಭೂತ ಕಣಗಳು( ಮೂಲ ಕಣಗಳು) – ಕಣಭೌತಶಾಸ್ತ್ರದಲ್ಲಿ ನಿರೂಪಿಸುವ ಪ್ರಕಾರ ಮೂಲಭೂತ ಕಣಗಳು ಅಂದರೆ ಪರಮಾಣುಗಳ ಒಳಗಿರುವ, ಹಾಗೂ ಬೇರೆ ಯಾವುದೇ ಕಣಗಳ ಸಂಯೋಜನೆಯಿಂದ ಉಂಟಾಗಿರದ ಕಣಗಳು.

ಫಂಡಮೆಂಟಲ್ ಕಾನ್ಸ್ಟೆಂಟ್ಸ್ (ಯೂನಿವರ್ಸಲ್ ಕಾನ್ಸ್ಟೆಂಟ್ಸ್) – ಮೂಲಭೂತ ಸ್ಥಿರಾಂಕಗಳು ( ಸಾರ್ವತ್ರಿಕ ಸ್ಥಿರಾಂಕಗಳು) – ಯಾವುದೇ ಗೊತ್ತಾದ ಸನ್ನಿವೇಶದಲ್ಲಿಯಾದರೂ ಎಂದೂ ಬದಲಾಗದೆಯೇ ಉಳಿಯುವ ಪರಿಮಾಣಗಳು. ಉದಾಹರಣೆಗೆ ನಿರ್ವಾತ ಪ್ರದೇಶದಲ್ಲಿ ಬೆಳಕಿನ ವೇಗ ಮತ್ತು ಎಲೆಕ್ಟ್ರಾನಿನ ವಿದ್ಯುದಂಶ. 

ಫಂಕ್ಷನ್ – ಗಣಿತ ಕ್ರಿಯೆ – ಒಂದು ಚರಾಂಕವನ್ನು ಇನ್ನೊಂದು ಚರಾಂಕ ಅಥವಾ ಇನ್ನು ಕೆಲವು ಬೇರೆ ಚರಾಂಕಗಳೊಂದಿಗೆ ಜೋಡಿಸುವ ಯಾವುದಾದರೂ ಗಣಿತ ಕ್ರಿಯೆ ಅಥವಾ ಕಾರ್ಯವಿಧಾನ.