ಇಮ್ಯಾಜಿನರಿ ನಂಬರ್ – ಕಲ್ಪಿತ ಸಂಖ್ಯೆ – -1 ರ ವರ್ಗಮೂಲದ ಗುಣಕವಾಗಿರುವ ಒಂದು‌ ಸಂಖ್ಯೆ‌. ಇದನ್ನು ‘i’ ಯಿಂದ ಸೂಚಿಸಲಾಗುತ್ತದೆ‌.

ಇಮೇಜ್ ಫೋರ್ಸ್ – ಪ್ರತಿಬಿಂಬ ಬಲ ಅಥವಾ ಪ್ರತಿ ಬಲ‌ – ಒಂದು ವಿದ್ಯುದಂಶವು ತನ್ನ ಸಮೀಪ ಇರುವ ವಾಹಕಗಳು ಅಥವಾ ಅವಾಹಕಗಳಲ್ಲಿ ಪ್ರಚೋದಿಸುವ ವಿದ್ಯುದಂಶಗಳಿಂದಾಗಿ, ಆ ವಿದ್ಯುದಂಶದ ಮೇಲೆ ಉಂಟಾಗುವ ಅಥವಾ ವರ್ತಿಸುವ ಬಲ.

ಇಮೇಜ್ – ಬಿಂಬ – ಮಸೂರ, ಕನ್ನಡಿ ಅಥವಾ ಇನ್ಯಾವುದಾದರೂ ದೃಶ್ಯಸಂಬಂಧೀ ಉಪಕರಣದಿಂದ ಮೂಡಿಸಿದಂತಹ,  ವಸ್ತುವೊಂದರ ರೂಪ.

ಇಲ್ಯೂಮಿನೆನ್ಸ್ ( ಇಲ್ಯೂಮಿನೇಷನ್), ಸಿಂಬಲ್ ‘E’ – ಪ್ರಕಾಶ, ಸಂಕೇತ ‘E’ – ಕಣ್ಣಿಗೆ ಕಾಣುವ ಬೆಳಕಿನ ರೂಪದಲ್ಲಿರುವ ಶಕ್ತಿ. ಇದನ್ನು lux ಎಂಬ ಮೂಲಮಾನದಿಂದ ಅಳೆಯುತ್ತಾರೆ.

ಇಗ್ನಿಷನ್ ಟೆಂಪರೇಚರ್ – ಉರಿ ಹತ್ತುವ ಉಷ್ಣಾಂಶ – ಒಂದು ವಸ್ತುವು ಹತ್ತಿಕೊಂಡು ಉರಿಯಲು ಬೇಕಾದಂತಹ ಉಷ್ಣಾಂಶ.

ಐಡಿಯಲ್ ಗ್ಯಾಸ್ ( ಪರ್ಫೆಕ್ಟ್ ಗ್ಯಾಸ್) – ಆದರ್ಶ ಅನಿಲ ( ಪರಿಪೂರ್ಣ ಅನಿಲ) – ಬಾಯ್ಲ್ ನ ನಿಯಮವನ್ನು ಪಾಲಿಸುವ ಅನಿಲ. ಇದಕ್ಕೆ ತನ್ನ ಪರಿಮಾಣದ ಮೇಲೆ ಯಾವ ಅವಲಂಬನೆಯೂ ಇರದಂತಹ ಆಂತರಿಕ ಶಕ್ತಿ ಇರುತ್ತದೆ.

ಐಡಿಯಲ್ ಕ್ರಿಸ್ಟಲ್ – ಆದರ್ಶ ಸ್ಫಟಿಕ ಅಥವಾ ಆದರ್ಶ ಹರಳು – ಪರಿಪೂರ್ಣ ಹಾಗೂ ಅನಂತ ಎಂದು‌ ಪರಿಗಣಿಸಲಾದ ಹರಳು ರಚನೆ.

ಐಕೋನೋಸ್ಕೋಪ್ – ಸಮಬಿಂಬ ದರ್ಶಕ – ಇದು ಒಂದು ರೀತಿಯ ದೂರದರ್ಶನ ಯಂತ್ರದ ಛಾಯಾಗ್ರಾಹಕ ಕೊಳವೆ‌. ಇದರಲ್ಲಿ ತುಂಬ ಹೆಚ್ಚು ವೇಗವನ್ನು ಹೊಂದಿರುವ ಎಲೆಕ್ಟ್ರಾನು ಕಿರಣಪುಂಜವು ಬೆಳಕಿಗೆ ಸ್ಪಂದಿಸುವ ಚಿತ್ರಸಮೂಹವನ್ನು ಹಾಯ್ದು ಬರುತ್ತದೆ‌‌. ಈ ಚಿತ್ರಸಮೂಹಕ್ಕೆ ವಿದ್ಯುತ್ ಸಂಗ್ರಹ ಮಾಡುವ ಸಾಮರ್ಥ್ಯ ಇರುತ್ತದೆ.

ಐಸ್ ಪಾಯಿಂಟ್ – ಮಂಜುಗಟ್ಟುವ ಬಿಂದು – ಒಂದು ಪ್ರಮಾಣೀಕೃತ ಹವಾಮಾನೀಯ ಒತ್ತಡದಲ್ಲಿ ಮಂಜುಗಡ್ಡೆಯು ಕರಗುವ ಬಿಂದು. ಇದಕ್ಕೆ ೦(ಸೊನ್ನೆ) ಡಿಗ್ರಿ ಸೆಂಟಿಗ್ರೇಡ್ ಮೌಲ್ಯವನ್ನು ಕೊಟ್ಟಿದ್ದಾರೆ.

ಐಸ್ – ಮಂಜುಗಡ್ಡೆ – ನೀರಿನ ಘನ ರೂಪ.