ಮ್ಯಾಗ್ನೆಟಿಕ್ ಶೀಲ್ಡಿಂಗ್ – ಕಾಂತೀಯ ತೆರೆ – ಅತಿ ಹೆಚ್ಚು ಪ್ರವೇಶಸಾಧ್ಯತೆ ಇರುವ ಒಂದು ವಸ್ತುವಿನಿಂದ ಮಾಡಲ್ಪಟ್ಟಂತಹ ಒಂದು‌ ಪರದೆ. ಇದನ್ನು ಯಾವುದಾದರೂ ಉಪಕರಣಗಳನ್ನು ಅನಗತ್ಯ ಕಾಂತಕ್ಷೇತ್ರಗಳ‌ ಪರಿಣಾಮದಿಂದ ರಕ್ಷಿಸಲು ಬಳಸುತ್ತಾರೆ.

ಮ್ಯಾಗ್ನೆಟಿಕ್ ಸ್ಕ್ಯಾಟರಿಂಗ್ – ಕಾಂತೀಯ ಚದುರುವಿಕೆ – ಪರಮಾಣುಗಳ ತಿರುಗುಬಲದೊಂದಿಗೆ ನ್ಯೂಟ್ರಾನುಗಳ ತಿರುಗುಬಲವು ಅಂತರ್ ಕ್ರಿಯೆ ನಡೆಸಿ ( ಅಂದರೆ ತೊಡಗಿಕೊಂಡು) ನ್ಯೂಟ್ರಾನುಗಳು ಚದುರುವಂತಹ ಪ್ರಕ್ರಿಯೆ ಇದು.

ಮ್ಯಾಗ್ನೆಟಿಕ್ ರೆಸಿಸ್ಟೆನ್ಸ್ – ಕಾಂತೀಯ ಪ್ರತಿರೋಧ – ಇದು ಕಾಂತೀಯ ಚಾಲಕ ಬಲಕ್ಕೂ ಕಾಂತೀಯ ಬಲರೇಖೆಗಳಿಗೂ ಇರುವ ಅನುಪಾತ. ಇದು ಕಾಂತೀಯ ಬಲರೇಖೆಗಳಿಗಿರುವ ವಿರೋಧವನ್ನು ಸೂಚಿಸುತ್ತದೆ.

ಮ್ಯಾಗ್ನೆಟಿಕ್ ಪ್ರೋಬ್ – ಕಾಂತೀಯ ಪತ್ತೆ ಸಾಧನ – ಒಂದು ಚಿಕ್ಕ ವಾಹಕ ಸುರುಳಿ ಇದು. ಇದನ್ನು ಒಂದು ಕಾಂತಕ್ಷೇತ್ರದಲ್ಲಿ‌ ಇಟ್ಟು ಆ ಕಾಂತಕ್ಷೇತ್ರದ ಸಾಮರ್ಥ್ಯದಲ್ಲಿ‌ ಆಗುವ ಬದಲಾವಣೆಗಳನ್ನು ಅಳೆಯುತ್ತಾರೆ.

ಮ್ಯಾಗ್ನೆಟಿಕ್ ಪೊಟೆನ್ಶಿಯಲ್ – ಕಾಂತೀಯ ಅಂತಸ್ಥ ಬಲ – ಕಾಂತೀಯ ಚಾಲಕ ಬಲ‌. ಇದು ಒಂದು ವಿದ್ಯುನ್ಮಂಡಲದಲ್ಲಿನ ಚಾಲಕ ಬಲಕ್ಕೆ  ಸಂವಾದಿಯಾಗಿರುವಂಥದ್ದು ಎನ್ನಬಹುದು.

ಮ್ಯಾಗ್ನೆಟಿಕ್ ಪೋಲ್ ಸ್ಟ್ರೆಂಗ್ತ್ – ಕಾಂತೀಯ ಧ್ರುವ ಶಕ್ತಿ – ಒಂದು ಅಯಸ್ಕಾಂತದ ಧ್ರುವಶಕ್ತಿಯನ್ನು ಆ ಅಯಸ್ಕಾಂತಕ್ಕೆ ವಸ್ತುಗಳು ಆಕರ್ಷಿತವಾಗುವ ಬಲವೆಂದು ವ್ಯಾಖ್ಯಾನಿಸಲಾಗುತ್ತದೆ.

ಮ್ಯಾಗ್ನೆಟಿಕ್ ಪೋಲ್ – ಕಾಂತೀಯ ಧ್ರುವ ( ಕಾಂತ ಧ್ರುವ) – ಒಂದು ಅಯಸ್ಕಾಂತದ ಪ್ರತಿಯೊಂದು ತುದಿಯಲ್ಲೂ ಕಾಂತಕ್ಷೇತ್ರವು ಅತ್ಯಂತ ಪ್ರಬಲವಾಗಿರುತ್ತದೆ‌. ಈ ತುದಿಯನ್ನು ಕಾಂತೀಯ ಧ್ರುವ ಅಥವಾ ಕಾಂತ ಧ್ರುವ ಎನ್ನುತ್ತಾರೆ.