ಕನ್ನಡ ಕನ್ನಡಿ

ಇನ್ಕಾಂಡೆಸೆನ್ಸ್- ಪ್ರಜ್ವಲ ಬೆಳಕು  – ತುಂಬ ಹೆಚ್ಚು ತಾಪಮಾನ ಹೊಂದಿರುವ ಮೇಲ್ಮೈಯಿಂದ ಸೂಸುವಂತಹ ಬೆಳಕು. ನಾವು ಮನೆಗಳಲ್ಲಿ ಬಳಸುವ, ಟಂಗ್ಸ್ಟನ್ ತಂತುವನ್ನು ಹೊಂದಿರುವ ವಿದ್ಯುತ್ ದೀಪವು ಇದಕ್ಕೆ ಉದಾಹರಣೆಯಾಗಿದೆ.

ಇನ್ಕ್ಲಿನೇಷನ್( ಆಂಗಲ್ ಆಫ್ ಡಿಪ್) – ಇಳಿಜಾರು ( ಇಳಿಜಾರು ಕೋನ) – ಭೂಮಿಯ ಕಾಂತಕ್ಷೇತ್ರಕ್ಕೂ ಮತ್ತು ಅದರ ಮೇಲ್ಮೈಯಲ್ಲಿನ ಅಡ್ಡರೇಖೆಗೂ, ಬಿಂದುವೊಂದರಲ್ಲಿ ಉಂಟಾಗುವ ಕೋನ. ಸಮಯದೊಂದಿಗೆ ಇದು ತುಸು ಬದಲಾಗುತ್ತದೆ.

ಇನ್ಕೋಹೆರೆಂಟ್ ಹೋಲೋಗ್ರಫಿ – ಸುಸಂಬದ್ಧವಲ್ಲದ ಪೂರ್ಣಚಿತ್ರಗ್ರಹಣ –  ಪ್ರಾರಂಭದಲ್ಲಿ ತೆಗೆಯಲಾಗುತ್ತಿದ್ದ ಸುಸಂಬದ್ಧವಲ್ಲದ ಪೂರ್ಣಚಿತ್ರಗಳು‌.‌ ಇವುಗಳನ್ನು ಸಾಂಪ್ರದಾಯಿಕ ಛಾಯಾಚಿತ್ರಗಳನ್ನು ಹಾಗೂ ಸುಸಂಬದ್ಧವಲ್ಲದ ದೃಶ್ಯವಿಜ್ಞಾನದ ವ್ಯವಸ್ಥೆಗಳನ್ನು ಬಳಸಿ ತೆಗೆಯುತ್ತಿದ್ದರು.

ಇನ್ಕ್ಯುಬೇಟರ್ – ಕಾವು ಪೆಟ್ಟಿಗೆ – ತಾಪಸ್ಥಾಪಕವನ್ನು ಉಪಯೋಗಿಸಿಕೊಂಡು ಸ್ಥಿರವಾದ ಆಂತರಿಕ ಉಷ್ಣತೆಯನ್ನು ಕಾಪಾಡಿಕೊಂಡು ಬರುವ ಸಾಮರ್ಥ್ಯವನ್ನು ಹೊಂದಿರುವಂತೆ ವಿನ್ಯಾಸ ಮಾಡಿರುವ ಒಂದು ಪೆಟ್ಟಿಗೆ. ಕೋಳಿಮರಿಗಳನ್ನು ಬೆಳೆಸಲು, ಅವಧಿಗೆ ಮುನ್ನ ಹುಟ್ಟಿದ ಎಳೆಶಿಶುಗಳನ್ನು ಸುರಕ್ಷಿತವಾಗಿ ಬೆಳೆಸಲು ಮತ್ತು ಬ್ಯಾಕ್ಟೀರಿಯಾಶಾಸ್ತ್ರದಲ್ಲಿ ಇದನ್ಬು ಬಳಸುತ್ತಾರೆ.

ಇನ್‌ಡೆಟರ್ಮಿನೆನ್ಸಿ ಪ್ರಿನ್ಸಿಪ್ಲ್( ಅನ್ಸರ್ಟೈನಿಟಿ ಪ್ರಿನ್ಸಿಪ್ಲ್) – ಅನಿರ್ದಿಷ್ಟತಾ ಸಿದ್ಧಾಂತ ( ಹೈಸನ್ ಬರ್ಗ್ ರ ಅನಿಶ್ಚಿತತೆಯ ಸಿದ್ಧಾಂತ )‌ – ಒಂದು ಕಣದ ಸ್ಥಾನಬಿಂದು ಹಾಗೂ ದ್ರವ್ಯವೇಗವನ್ನು  ಏಕಕಾಲಕ್ಕೆ ನಿಖರವಾಗಿ ಅರಿಯಲು ಸಾಧ್ಯ ಇಲ್ಲ ಎಂದು ಹೇಳುವ ಸಿದ್ಧಾಂತ ಇದು. ಇದನ್ನು 1927 ರಲ್ಲಿ ಇದನ್ನು ವರ್ನರ್ ಹೈಸನ್ಬರ್ಗ್( 1901-1976) ರು ಕಂಡುಹಿಡಿದರು.

ಇಂಡೆಕ್ಸ್ – ಸೂಚ್ಯಂಕ – ಆಯಾಮರಹಿತವಾದ ಒಂದು ಅಂಕಿ‌ ಪರಿಮಾಣ.‌ ಇದನ್ನು ಭೌತಶಾಸ್ತ್ರೀಯ ಪರಿಣಾಮವೊಂದರ ಪರಿಮಾಣವನ್ನು ಸೂಚಿಸಲು ಬಳಸುತ್ತಾರೆ.  ಉದಾಹರಣೆಗೆ ಒಂದು ವಸ್ತುವಿನ ವಕ್ರೀಭವನ ಸೂಚ್ಯಂಕ.

ಇಂಡೆಕ್ಸ್ ಎರರ್( ಝೀರೋ ಎರರ್) – ಸೂಚ್ಯಾಂಕ ದೋಷ ಅಥವಾ ಶೂನ್ಯ ದೋಷ – ಅಳೆಯುವ ಉಪಕರಣವೊಂದರಲ್ಲಿ ಕಂಡುಬರುವ ಒಂದು ಅಳತೆಮಾನದ ದೋಷ ಇದು. ಇದರಲ್ಲಿ ಏನಾಗುತ್ತದೆಂದರೆ ಉಪಕರಣವು ಸೊನ್ನೆ ನಮೂದನ್ನು ತೋರಿಸಬೇಕಾದ ಕಡೆ ಈ ನಮೂದನ್ನು ತೋರಿಸುತ್ತದೆ.‌

ಇಂಡಿಕೇಟರ್ ಡಯಾಗ್ರಮ್ – ಸೂಚಕ ಚಿತ್ರ – ಒಂದು ಚಾಲಕಯಂತ್ರದ ಗುಂಡುಕಂಬ (ಸಿಲಿಂಡರ್)ದೊಳಗಿರುವ ಚಲಿಸುವ ಭಾಗವು( ಪಿಸ್ಟನ್) ರೇಖಿಸಿದ ರೇಖಾಕಾರದ ಚಿತ್ರ. ‌ಈ ಚಿತ್ರವನ್ನು ಚಾಲಕಯಂತ್ರದ ಕಾರ್ಯದಕ್ಷತೆಯನ್ನು ಅಂದಾಜು ಮಾಡಲು ಬಳಸುತ್ತಾರೆ.

ಇಂಡಕ್ಟೆನ್ಸ್ – ವಿದ್ಯುತ್ ಪ್ರೇರಕತೆ – ಒಂದು ವಿದ್ಯುನ್ಮಂಡಲ ಅಥವಾ ಉಪಕರಣ ಭಾಗದ ವಿದ್ಯುತ್ ಪ್ರೇರಿಸುವ ಗುಣ ಇದು‌. ಇದರಿಂದಾಗಿ, ವಿದ್ಯುನ್ಮಂಡಲದಲ್ಲಿ ಹರಿಯುತ್ತಿರುವ ವಿದ್ಯುತ್ ಬದಲಾದಾಗ ವಿದ್ಯುತ್ ಚಾಲಕ ಶಕ್ತಿಯ ಉತ್ಪಾದನೆಯಾಗುತ್ತದೆ.

ಇಂಡಕ್ಟೆನ್ಸ್ ಮೀಟರ್ – ವಿದ್ಯುತ್ ಪ್ರೇರಕತಾ ಮಾಪಕ – ಒಂದು ವಿದ್ಯುನ್ಮಂಡಲದ ಸ್ವಯಂಪ್ರೇರಕತೆಯನ್ನು ಅಥವಾ ಜೋಡಿ ಮಾಡಲ್ಪಟ್ಟ ಎರಡು ವಿದ್ಯುನ್ಮಂಡಲಗಳ ಪರಸ್ಪರ ಪ್ರೇರಕತೆಯನ್ನು ಕಂಡು ಹಿಡಿಯಲು ಬಳಸುವ ಒಂದು ವಿದ್ಯುತ್ ಉಪಕರಣ.