ಫ್ಲುಯಿಡಿಟಿ‌- ಪ್ರವಾಹಿ ಗುಣ( ದ್ರವತ್ವ) – ಸ್ನಿಗ್ಧತೆಯ ವಿರುದ್ಧ ಗುಣ ( ಸ್ನಿಗ್ಧತೆ = ಜಿಡ್ಡು, ಮಂದ). 

ಫ್ಲುಯಿಡ್ – ದ್ರವ( ಪ್ರವಾಹಿ) – ಪ್ರವಹಿಸಬಲ್ಲ ಅಂದರೆ ಹರಿಯುವ ಸಾಮರ್ಥ್ಯವಿರುವ ವಸ್ತುವಿಗೆ ಬಳಸುವ ಪದ.‌ ಇದು ಅನಿಲವೂ ಆಗಿರಬಹುದು.

ಫ್ಲೊಟೇಷನ್ ಲಾ – ತೇಲುವಿಕೆಯ ನಿಯಮ – ಒಂದು ದ್ರವದಲ್ಲಿ ತೇಲುತ್ತಿರುವ ವಸ್ತುವು ಸ್ಥಳಪಲ್ಲಟಿಸುವ  ಆ ದ್ರವದ ದ್ರವ್ಯರಾಶಿಯು ಆ ವಸ್ತುವಿನ ದ್ರವ್ಯರಾಶಿಗೆ ಸಮವಾಗಿರುತ್ತದೆ.‌ 

ಫ್ಲಿಂಟ್ ಗ್ಲಾಸ್ – ಚಕಮಕಿ‌ ಗಾಜು – ಸೀಸದ ಸಿಲಿಕೇಟ್ ಹೊಂದಿರುವ ಒಂದು ಬಗೆಯ ಗಾಜು. ಇದನ್ನು ಮಸೂರಗಳು, ಪಟ್ಟಕಗಳು ಮುಂತಾದವನ್ನು ತಯಾರು ಮಾಡುವ ಬೆಳಕುವಿಜ್ಞಾನದ ಗಾಜಾಗಿ ಬಳಸುತ್ತಾರೆ‌.

ಫ್ಲಿಕ್ಕರ್ ಫೋಟೋಮೀಟರ್ – ಮಿಣುಕು ಬೆಳಕುಮಾಪಕ – ಬೇರೆ ಬೇರೆ ಬೆಳಕಿನ ಆಕರಗಳ ಬೆಳಕನ್ನು  ಹೋಲಿಸಲು ಬಳಸುವ ಬೆಳಕುಮಾಪಕ.‌

ಫೀಲ್ಡ್ – ಕ್ಷೇತ್ರ‌- ಖಾಲಿ ಅವಕಾಶದಲ್ಲಿ ಕಣಗಳ ನಡುವೆ ನಡೆಯುವ ಅಂತರ್ ಕ್ರಿಯೆಯನ್ನು ವಿವರಿಸಲು ಪರಿಚಯಿಸಲ್ಪಟ್ಟ ಒಂದು ಪರಿಕಲ್ಪನೆ ಇದು. ಉದಾಹರಣೆಗೆ, ವಿದ್ಯುತ್ ಕ್ಷೇತ್ರ, ಕಾಂತ ಕ್ಷೇತ್ರ, ಗುರುತ್ವ ಕ್ಷೇತ್ರ.

ಫಿಶನ್ ಪ್ರಾಡಕ್ಟ್ಸ್ – ವಿದಳನ ಉತ್ಪನ್ನಗಳು – ಅಣುಬೀಜ ವಿದಳನದಿಂದ ಉತ್ಪತ್ತಿಯಾದ ಸ್ಥಿರ ಮತ್ತು ಅಸ್ಥಿರ ಸಮರೂಪಿಗಳು.

ಫಿಕ್ಸ್ಡ್ ಪಾಯಿಂಟ್ ‌- ನಿಶ್ಚಿತ ಬಿಂದು – ಹಿಮಬಿಂದು, ಆವಿಬಿಂದು…..ಈ ಮುಂತಾದವುಗಳಂತೆ ಬಹು ಕರಾರುವಾಕ್ಕಾಗಿ ಪುನರುತ್ಪಾದಿಸಬಹುದಾದ ಒಂದು ಸಮತೋಲಿತ ಉಷ್ಣತೆ.

ಫಿಶನ್ ಟ್ರ್ಯಾಕ್ ಡೇಟಿಂಗ್ – ವಿದಳನ ಜಾಡು ಕಾಲನಿಗದಿ‌ – ಗಾಜುಗಳು ಮತ್ತು ಇತರ ಖನಿಜಗಳು ಹೊಂದಿರುವ ಯುರೇನಿಯಂ ಮೂಲವಸ್ತುವು ತಂತಾನೇ ವಿದಳನಗೊಳ್ಳುವುದರಿಂದ ಉಂಟಾದ ಚೂರುಗಳು ಈ ಘನವಸ್ತುಗಳಲ್ಲಿ ಜಾಡುಗಳನ್ನು ಮಾಡಿರುತ್ತವೆ. ಈ ಜಾಡುಗಳನ್ನು ಅವಲಂಬಿಸಿ  ಈ ಘನವಸ್ತುಗಳ ಕಾಲವನ್ನು ಅಳೆಯುವ ವಿಧಾನವೇ ‘ವಿದಳನ ಜಾಡು ಕಾಲನಿಗದಿ’.

ಫಿಶನ್ ರಿಯಾಕ್ಟರ್ – ವಿದಳನ ಪರಮಾಣು ಸ್ಥಾವರ – ಬೀಜಕೇಂದ್ರದ ವಿದಳನದಿಂದ ಉತ್ಪತ್ತಿಯಾಗುವ ಶಕ್ತಿಯನ್ನು ಉಪಯುಕ್ತ ಶಕ್ತಿಯಾಗಿ ಬಳಸಲು ಅನುವು ಮಾಡಿಕೊಡುವ ಒಂದು‌ ಉಪಕರಣ.