ಲೈಟ್ನಿಂಗ್ ಕಂಡಕ್ಟರ್ – ಮಿಂಚು ವಾಹಕ‌ – ಸಾಮಾನ್ಯವಾಗಿ ಕಟ್ಟಡಗಳಲ್ಲಿ ಮತ್ತು ಇನ್ನಿತರ ಕಟ್ಟೋಣಗಳಲ್ಲಿ ಮಿಂಚಿನಿಂದ ಆಗುವ ಅಪಾಯದಿಂದ ಅವುಗಳನ್ನು ರಕ್ಷಿಸುವುದಕ್ಕಾಗಿ ಸ್ಥಾಪಿಸಿಟ್ಟ ಒಂದು‌ ವಿದ್ಯುತ್ ವಾಹಕ.

ಲೈಟ್ನಿಂಗ್ ಅರೆಸ್ಟರ್ – ಮಿಂಚು ಪ್ರತಿಬಂಧಕ‌ – ತನ್ನ ತುದಿಭಾಗಗಳಿಗೆ ಬಂದು ತಗಲುವ ಉಬ್ಬರದಲೆಯ ವಿದ್ಯುದ್ಬಲವನ್ನು ಕಡಿಮೆ ಮಾಡುವ ಗುಣವುಳ್ಳ ಉಪಕರಣ.

ಲೈಟ್ನಿಂಗ್ – ಮಿಂಚು( ವಿದ್ಯುನ್ಮಾಲೆ) – ಒಂದು ಮೋಡದ ಎರಡು ವಿರುದ್ಧ ವಿದ್ಯುದೀಕೃತ ಪದರಗಳ ನಡುವೆ ಅಥವಾ ಎರಡು ವಿದ್ಯುದೀಕೃತ ಮೋಡಗಳ ನಡುವೆ ಅಥವಾ ಒಂದು ವಿದ್ಯುದೀಕೃತ ಮೋಡ ಹಾಗೂ ಭೂಮಿಯ ಮೇಲ್ಮೈಯಲ್ಲಿನ ಒಂದು ಬಿಂದುವಿನ ನಡುವೆ ಹಾಯುವಂತಹ ತುಂಬಾ ಶಕ್ತಿಯುಳ್ಳ ವಿದ್ಯುತ್ ವಿಸರ್ಜನೆ ಅಥವಾ ಹೊನಲು‌.

ಲೈಟ್ ಬಲ್ಬ್ – ಗಾಜಿನ ಬುರುಡೆಯ ವಿದ್ಯಿದ್ದೀಪ ( ಬಲ್ಬು) – ವಿದ್ಯುತ್ತಿನಿಂದ ಬೆಳಕನ್ನು ಪಡೆಯಲು ಬಳಸುವ ಉಪಕರಣ. ಇದರಲ್ಲಿ, ಒಂದು ಗಾಜಿನ ಬುರುಡೆಯಲ್ಲಿ ಒಂದು ಟಂಗ್ಸ್ಟನ್ ತಂತು ಮತ್ತು ಒಂದು ಜಡ ಅನಿಲ‌ ಇರುತ್ತವೆ. ಈ ತಂತುವಿನಲ್ಲಿ ವಿದ್ಯುತ್ತನ್ನು‌ ಹಾಯಿಸಿದಾಗ ಅದು ಕಾದು ಬೆಳ್ಳಗಾಗುತ್ತದೆ. ಟಂಗ್ಸ್ಟನ್ ಲೋಹವು ಆವಿಯಗಿ ಗಾಜಿನ ಬುರುಡೆಯು ಕಪ್ಪಾಗುವುದನ್ನು ಆದಷ್ಟೂ ತಡೆಯಲು ಜಡ ಅನಿಲವನ್ನು ಬಳಸುತ್ತಾರೆ.

ಲೈಟ್ – ಬೆಳಕು – ಇದು ವಿದ್ಯುತ್ಕಾಂತೀಯ ಅಲೆಯ ಒಂದು ವಿಧ. ಇದಕ್ಕೆ ಮಾನವ ಕಣ್ಣು ಸ್ಪಂದಿಸುತ್ತದೆ. ಇದರ ಮೇಲೆಯೇ ನಮ್ಮ‌ ದೃಷ್ಟಿಪ್ರಜ್ಞೆಯು ಅವಲಂಬಿತವಾಗಿರುತ್ತದೆ. ಪ್ರಪಂಚವನ್ನು ನಾವು ನಮ್ಮ ಕಣ್ಣಿಂದ ನೋಡಲು ಸಾಧ್ಯವಾಗುವುದು ಸಹ ಇದರಿಂದಲೇ. ನಾವು ಬಣ್ಣಗಳನ್ನು ಗುರುತಿಸಲು ಸಾಧ್ಯವಾಗುವುದು ಸಹ ಇದರಿಂದಲೇ.

ಲಿಬ್ರೇಷನ್ – ಓಲಾಟ – ಇದು ಖಗೋಳವಿಜ್ಞಾನದ ಒಂದು ವಿದ್ಯಮಾನ‌. ಭೂಮಿಯಿಂದ ನೋಡಿದಾಗ,  ಕೆಲವು ಸಲ, ಚಂದ್ರನ,  ತೋರುವ  ಅಥವಾ ನಿಜವಾದ ಓಲಾಟದಿಂದಾಗಿ ಸಾಮಾನ್ಯವಾಗಿ ಕಾಣದ ಅದರ ( ಚಂದ್ರನ) ಅಂಚುಗಳು ಭೂಮಿಯಲ್ಲಿರುವವರಿಗೆ ಕಾಣುತ್ತವೆ. ಈ ಓಲಾಟದಿಂದಾಗಿ ಚಂದ್ರನ 59% ಮೇಲ್ಮೈಯನ್ನು ನಾವು‌ 30 ವರ್ಷಗಳ ಅವಧಿಯುದ್ದಕ್ಕೂ ನೋಡಬಹುದು.

ಎಲ್ಎಫ್(ಲೋ ಫ್ರೀಕ್ವೆನ್ಸಿ) –  30-300 ಕಿಲೋ ಹರ್ಟ್ಝ್ ಆವರ್ತನಗತಿಯುಳ್ಳ (  ಅಂದರೆ 1 -10ಕಿ.ಮೀ.ತರಂಗಾಂತರವುಳ್ಳ) ವಿದ್ಯುತ್ಕಾಂತೀಯ ಅಲೆಗಳು.