ಕನ್ನಡ ಕನ್ನಡಿ

ಲೆಂಜ್ ಸ್ ಲಾ – ಲೆಂಜ್ ರ ನಿಯಮ – ಒಂದು ವಿದ್ಯುನ್ಮಂಡಲದಲ್ಲಿ ಪ್ರೇರಿತ ವಿದ್ಯುತ್ ಸಾಮರ್ಥ್ಯ (ವಿದ್ಯುತ್ ಚಾಲಕ ಬಲ)ದ  ದಿಕ್ಕು, ತನ್ನನ್ನು ಉತ್ಪಾದಿಸುವುದರ ದಿಕ್ಕಿಗೆ ವಿರುದ್ಧವಾಗಿರುತ್ತದೆ.

ಲೆಪ್ಟಾನ್ – ಲೆಪ್ಟಾನು – ಎಲೆಕ್ಟ್ರಾನು, ಮ್ಯೂಯಾನು ( ಮತ್ತೆ ವಿಭಜಿಸಲು ಸಾಧ್ಯವಿಲ್ಲದ, ಋಣ ವಿದ್ಯುದಂಶ ಹೊಂದಿದ ಆದರೆ ಅದಕ್ಕಿಂತ ಹೆಚ್ಚು ದ್ರವ್ಯರಾಶಿಯುಳ್ಳ ಒಂದು ಅಂತರ್ಪರಮಾಣು – ಅಂದರೆ ಪರಮಾಣುವಿನೊಳಗಿನ -ಮೂಲಭೂತ ಕಣ) ಮತ್ತು ನ್ಯೂಟ್ರಾನುಗಳನ್ನು ಒಟ್ಟಾಗಿ ಸೂಚಿಸುವ ಒಂದು ಪದ.

ಲೆಥಾರ್ಜಿ – ನಿಶ್ಯಕ್ತಿ – ನಿರ್ದಿಷ್ಟ ಪ್ರಮಾಣೀಕೃತ ಶಕ್ತಿ ಹಾಗೂ ಒಂದು ನ್ಯೂಟ್ರಾನಿನ ಶಕ್ತಿ(E)ಯ ಅನುಪಾತದ ಋಣಾತ್ಮಕ ಸಹಜ ಕ್ರಮವಿಧಿ ( ಕ್ರಮವಿಧಿ = logarithm). ಸಾಮಾನ್ಯ ಪದಗಳಲ್ಲಿ ಹೇಳಬೇಕೆಂದರೆ ನಿಶ್ಯಕ್ತಿ ಅಂದರೆ ಶಕ್ತಿಯ ತೀವ್ರ ಕೊರತೆಯ ಸ್ಥಿತಿ.

ಲಿವರ್ – ಮೀಟುಗೋಲು ಅಥವಾ ಸನ್ನೆಗೋಲು – ಭದ್ರವಾಗಿ ನೆಲೆಯೂರಿಸಿದ ಒಂದು ಆಧಾರದ ಸುತ್ತ ತಿರುಗಿಸಲು ಸಾಧ್ಯವಿರುವ ಒಂದು ಗಟ್ಟಿ ಕೋಲು. ಇದರಿಂದ ಭಾರಗಳನ್ನು ಎತ್ತುವುದು ಸುಲಭವಾಗುತ್ತದೆ‌.

ಎಲ್ಎಫ್(ಲೋ ಫ್ರೀಕ್ವೆನ್ಸಿ) –  30-300 ಕಿಲೋ ಹರ್ಟ್ಝ್ ಆವರ್ತನಗತಿಯುಳ್ಳ (  ಅಂದರೆ 1 -10ಕಿ.ಮೀ.ತರಂಗಾಂತರವುಳ್ಳ) ವಿದ್ಯುತ್ಕಾಂತೀಯ ಅಲೆಗಳು.

ಲಿಬ್ರೇಷನ್ – ಓಲಾಟ – ಇದು ಖಗೋಳವಿಜ್ಞಾನದ ಒಂದು ವಿದ್ಯಮಾನ‌. ಭೂಮಿಯಿಂದ ನೋಡಿದಾಗ,  ಕೆಲವು ಸಲ, ಚಂದ್ರನ,  ತೋರುವ  ಅಥವಾ ನಿಜವಾದ ಓಲಾಟದಿಂದಾಗಿ ಸಾಮಾನ್ಯವಾಗಿ ಕಾಣದ ಅದರ ( ಚಂದ್ರನ) ಅಂಚುಗಳು ಭೂಮಿಯಲ್ಲಿರುವವರಿಗೆ ಕಾಣುತ್ತವೆ. ಈ ಓಲಾಟದಿಂದಾಗಿ ಚಂದ್ರನ 59% ಮೇಲ್ಮೈಯನ್ನು ನಾವು‌ 30 ವರ್ಷಗಳ ಅವಧಿಯುದ್ದಕ್ಕೂ ನೋಡಬಹುದು.

ಲೈಟ್ – ಬೆಳಕು – ಇದು ವಿದ್ಯುತ್ಕಾಂತೀಯ ಅಲೆಯ ಒಂದು ವಿಧ. ಇದಕ್ಕೆ ಮಾನವ ಕಣ್ಣು ಸ್ಪಂದಿಸುತ್ತದೆ. ಇದರ ಮೇಲೆಯೇ ನಮ್ಮ‌ ದೃಷ್ಟಿಪ್ರಜ್ಞೆಯು ಅವಲಂಬಿತವಾಗಿರುತ್ತದೆ. ಪ್ರಪಂಚವನ್ನು ನಾವು ನಮ್ಮ ಕಣ್ಣಿಂದ ನೋಡಲು ಸಾಧ್ಯವಾಗುವುದು ಸಹ ಇದರಿಂದಲೇ. ನಾವು ಬಣ್ಣಗಳನ್ನು ಗುರುತಿಸಲು ಸಾಧ್ಯವಾಗುವುದು ಸಹ ಇದರಿಂದಲೇ.

ಲೈಟ್ ಬಲ್ಬ್ – ಗಾಜಿನ ಬುರುಡೆಯ ವಿದ್ಯಿದ್ದೀಪ ( ಬಲ್ಬು) – ವಿದ್ಯುತ್ತಿನಿಂದ ಬೆಳಕನ್ನು ಪಡೆಯಲು ಬಳಸುವ ಉಪಕರಣ. ಇದರಲ್ಲಿ, ಒಂದು ಗಾಜಿನ ಬುರುಡೆಯಲ್ಲಿ ಒಂದು ಟಂಗ್ಸ್ಟನ್ ತಂತು ಮತ್ತು ಒಂದು ಜಡ ಅನಿಲ‌ ಇರುತ್ತವೆ. ಈ ತಂತುವಿನಲ್ಲಿ ವಿದ್ಯುತ್ತನ್ನು‌ ಹಾಯಿಸಿದಾಗ ಅದು ಕಾದು ಬೆಳ್ಳಗಾಗುತ್ತದೆ. ಟಂಗ್ಸ್ಟನ್ ಲೋಹವು ಆವಿಯಗಿ ಗಾಜಿನ ಬುರುಡೆಯು ಕಪ್ಪಾಗುವುದನ್ನು ಆದಷ್ಟೂ ತಡೆಯಲು ಜಡ ಅನಿಲವನ್ನು ಬಳಸುತ್ತಾರೆ.

ಲೈಟ್ ವಾಟರ್ ರಿಯಾಕ್ಟರ್ – ಸಾಮಾನ್ಯ ನೀರಿನ ಅಣುಸ್ಥಾವರ – ತಂಪುಕಾರಕವಾಗಿ ಸಾಮಾನ್ಯ ನೀರನ್ನು ಬಳಸುವ ಒಂದು‌‌ ವಿಶೇಷ ರೀತಿಯ ಅಣುಸ್ಥಾವರ.

ಲೈಟ್ ವ್ಯಾಟ್ –  ಬೆಳಕು ವ್ಯಾಟ್ – ದೃಶ್ಯಬೆಳಕು ವಿಜ್ಞಾನದಲ್ಲಿ ಒಂದು ಬೆಳಕಿನ ಆಕರದ ಪ್ರಕಾಶ ಸಾಮರ್ಥ್ಯವನ್ನು ವ್ಯಕ್ತಪಡಿಸಲು ಬಳಸುವ ಒಂದು ಪದ.