ಕನ್ನಡ ಕನ್ನಡಿ

ಲೈಟ್ ಇಯರ್ – ಬೆಳಕಿನ ವರ್ಷ( ಜ್ಯೋತಿರ್ವರ್ಷ) – ಖಗೋಳವಿಜ್ಞಾನದಲ್ಲಿ ಬಳಸುವ ದೂರವನ್ನಳೆಯುವ ಒಂದು ಮೂಲಮಾನ ಇದು‌. ನಿರ್ವಾತದಲ್ಲಿ ಒಂದು ವರ್ಷದ ಅವಧಿಯಲ್ಲಿ ಬೆಳಕು ಚಲಿಸಿದ ದೂರ.

ಲೈಟ್ನಿಂಗ್ – ಮಿಂಚು( ವಿದ್ಯುನ್ಮಾಲೆ) – ಒಂದು ಮೋಡದ ಎರಡು ವಿರುದ್ಧ ವಿದ್ಯುದೀಕೃತ ಪದರಗಳ ನಡುವೆ ಅಥವಾ ಎರಡು ವಿದ್ಯುದೀಕೃತ ಮೋಡಗಳ ನಡುವೆ ಅಥವಾ ಒಂದು ವಿದ್ಯುದೀಕೃತ ಮೋಡ ಹಾಗೂ ಭೂಮಿಯ ಮೇಲ್ಮೈಯಲ್ಲಿನ ಒಂದು ಬಿಂದುವಿನ ನಡುವೆ ಹಾಯುವಂತಹ ತುಂಬಾ ಶಕ್ತಿಯುಳ್ಳ ವಿದ್ಯುತ್ ವಿಸರ್ಜನೆ ಅಥವಾ ಹೊನಲು‌.

ಲೈಟ್ನಿಂಗ್ ಅರೆಸ್ಟರ್ – ಮಿಂಚು ಪ್ರತಿಬಂಧಕ‌ – ತನ್ನ ತುದಿಭಾಗಗಳಿಗೆ ಬಂದು ತಗಲುವ ಉಬ್ಬರದಲೆಯ ವಿದ್ಯುದ್ಬಲವನ್ನು ಕಡಿಮೆ ಮಾಡುವ ಗುಣವುಳ್ಳ ಉಪಕರಣ.

ಲೈಟ್ನಿಂಗ್ ಕಂಡಕ್ಟರ್ – ಮಿಂಚು ವಾಹಕ‌ – ಸಾಮಾನ್ಯವಾಗಿ ಕಟ್ಟಡಗಳಲ್ಲಿ ಮತ್ತು ಇನ್ನಿತರ ಕಟ್ಟೋಣಗಳಲ್ಲಿ ಮಿಂಚಿನಿಂದ ಆಗುವ ಅಪಾಯದಿಂದ ಅವುಗಳನ್ನು ರಕ್ಷಿಸುವುದಕ್ಕಾಗಿ ಸ್ಥಾಪಿಸಿಟ್ಟ ಒಂದು‌ ವಿದ್ಯುತ್ ವಾಹಕ.

ಲೈಟ್ನಿಂಗ್ ಸರ್ಜ್ – ಮಿಂಚಿನಲೆ ( ಮಿಂಚಿನ ಉಬ್ಬರದಲೆ) – ಒಂದು ವಿದ್ಯುನ್ಮಂಡಲ ದಲ್ಲಿ ಮಿಂಚಿನಿಂದಾಗಿ ಉಂಟಾಗುವ ತಾತ್ಕಾಲಿಕ ಅಡಚಣೆ ( ಕ್ಷೋಭೆ) ಯನ್ನು ಮಿಂಚಿನಲೆ ಎನ್ನುತ್ತಾರೆ.

ಲಿಮಿಟ್ – ಮಿತಿ – ಒಂದು ಸ್ವತಂತ್ರ ಚರಾಂಕವು‌ ಒಂದು ನಿಶ್ಚಿತ ಮೌಲ್ಯವನ್ಜು ಸಮೀಪಿಸುವಾಗ ಒಂದು ಗಣಿತ ಕ್ರಿಯೆಯು ಸಮೀಪಿಸುವ ಮೌಲ್ಯ.

ಲಿಮಿಟರ್ – ಮಿತಕಾರಕ – ಒಂದು ವ್ಯವಸ್ಥೆಯು ಹೊರಕ್ಕೆ ನೀಡುವಂತಹ ಯಾವುದಾದರೂ ಗುಣಲಕ್ಷಣ (ಉದಾಹರಣೆಗೆ ಆವರ್ತನ‌ ಗತಿ) ವನ್ನು ಒಂದು ನಿರ್ದಿಷ್ಟ ಮೌಲ್ಯವನ್ನು ದಾಟದಂತೆ, ತಾನೇ ತಕ್ಷಣ ಸ್ವಯಂಚಾಲಿತವಾಗಿ ತಡೆಯುವ ಉಪಕರಣ.

ಲಿಮಿಟಿಂಗ್ ಕರೆಂಟ್ (ಡಿಫ್ಯೂಷನ್ ಕರೆಂಟ್) – ಮಿತಗೊಳಿಸುವ ವಿದ್ಯುತ್ ( ಚೆಲ್ಲಾಪಿಲ್ಲಿ ಚಲನೆಯ ವಿದ್ಯುತ್) – ವಿದ್ಯುತ್ ವಿಭಜನೆಯಲ್ಲಿ ವಿದ್ಯುದ್ವಾರದ ಕಡೆಗೆ ಚೆಲ್ಲಾಪಿಲ್ಲಿಯಾಗಿ ಚಲಿಸುವ ವಿದ್ಯುದಣುಗಳ ಗತಿಯು ಅವು‌ ಉತ್ಪತ್ತಿಯಾಗಿ ಹೊರಬೀಳಿವ ಗತಿಗೆ ಸಮನಾಗಿರುವುದಿಲ್ಲ. ಹೀಗಾಗಿ ವಿದ್ಯುತ್ ವಿಭಜಕದ ಗುಣಲಕ್ಷಣಗಳು ಮತ್ತು ವಿದ್ಯುದಣುಗಳ ಕೇಂದ್ರೀಕರಣಗಳ ನಿರ್ದಿಷ್ಟ ಸನ್ನಿವೇಶಗಳನ್ನು ಅವಲಂಬಿಸಿ ನಾವು ಹರಿಯಿಸಬಲ್ಲ ವಿದ್ಯುತ್ತಿಗೆ ಒಂದು‌ ಮಿತಗೊಳಿಸುವ ಮೌಲ್ಯ ಇರುತ್ತದೆ.

ಲಿಮಿಟಿಂಗ್ ಫ್ರಿಕ್ಷನ್ – ಘರ್ಷಣೆಯ ಗರಿಷ್ಠ ಮಿತಿ‌ – ಒಂದು ವಸ್ತುವು ಇನ್ನೊಂದು ವಸ್ತುವಿನ ಮೇಲೆ ಚಲಿಸಿದಾಗ ಉಂಟಾಗುವ ಗರಿಷ್ಠ ಮಟ್ಟದ ಪ್ರತಿರೋಧ ಬಲ.

ಲೈನ್ ಆಫ್ ಫೋರ್ಸ್ ( ಎಲೆಕ್ಟ್ರಿಕ್) – ಬಲರೇಖೆ (ವಿದ್ಯುತ್) – ಒಂದು ವಿದ್ಯುತ್ ಕ್ಷೇತ್ರ ಅಥವಾ ಕಾಂತಕ್ಷೇತ್ರದಲ್ಲಿನ ಕಲ್ಪಿತ ರೇಖೆ ಇದು‌. ಇದರ ಯಾವುದೇ ಬಿಂದುವಿನಲ್ಲಿನ ಸ್ಪರ್ಶರೇಖೆಯು ( ಟ್ಯಾಂಜೆಂಟ್) ಆ ಬಿಂದುವಿನಲ್ಲಿನ ವಿದ್ಯುತ್ ಕ್ಷೇತ್ರದ ದಿಕ್ಕನ್ನು ತೋರಿಸುತ್ತದೆ‌ . ಈ ಬಲರೇಖೆಗಳು ಎಂದೂ ಒಂದನ್ನೊಂದು ದಾಟುವುದಿಲ್ಲ.