ಎಕ್ಸ್ ಕ್ಲೂಷನ್ ಪ್ರಿನ್ಸಿಪಲ್ (ಪೌಲೀಸ್) –  (ಪೌಲಿಯವರ) ಬೇರೆಗೊಳಿಸುವ ಸಿದ್ಧಾಂತ – ಒಂದು ವ್ಯವಸ್ಥೆಯಲ್ಲಿನ‌ ಯಾವ ಎರಡು ಕಣಗಳೂ, ಉದಾಹರಣೆಗೆ ಒಂದು ಪರಮಾಣುವಿನಲ್ಲಿನ‌ ಎರಡು ಎಲೆಕ್ಟ್ರಾನುಗಳು ಏಕರೂಪಿಯಾದ (ಒಂದೇ ಅಂದರೆ ಅದದೇ) ಕ್ವಾಂಟಂ ಸಂಖ್ಯೆಗಳನ್ನು ಹೊಂದಿರಲು ಸಾಧ್ಯ ಇಲ್ಲ ಎಂಬ ಸಿದ್ಧಾಂತ ಇದು. 

ಎಕ್ಸೈಟಾನ್ – ಉತ್ತೇಜಿತ ಪರಮಾಣುವಿನಂತೆ ವರ್ತಿಸುವಂತಹ ಒಂದು ಎಲೆಕ್ಟ್ರಾನು‌ ಹಾಗೂ ಒಂದು ರಂಧ್ರಗಳ ಕಣಜೋಡಿ.

ಎಕ್ಸೈಟೇಷನ್ – ಉತ್ತೇಜನ‌ – ಒಂದು ಬೀಜಕೇಂದ್ರ/ ಎಲೆಕ್ಟ್ರಾನು/ ಅಣು/ವಿದ್ಯುದಂಶವು ಶಕ್ತಿಯನ್ನು ಪಡೆದುಕೊಂಡು ತಾನು ಇರುವ ಸಾಮಾನ್ಯ ಸ್ಥಿತಿಗಿಂತ ಹೆಚ್ಚು ಶಕ್ತಿಯ (ಕ್ವಾಂಟಂ -ಶಕ್ತಿ ಪೊಟ್ಟಣ) ಸ್ಥಿತಿಗೆ ಏರುವುದು.

ಎಕ್ಸ್ ಚೇಂಜ್ ಫೋರ್ಸ್ – ವಿನಿಮಯ ಬಲ – ಎರಡು ಅಣುಗಳ ನಡುವೆ ಕಣಗಳ ವಿನಿಮಯದಿಂದ ಉತ್ಪತ್ತಿಯಾಗುವ ಬಲ.‌ ಈ ಬಲದಿಂದಾಗಿ ಆ ಅಣುಗಳ ನಡುವೆ ಬಂಧವೊಂದು‌ ಸಾಧ್ಯವಾಗುತ್ತದೆ.

ಎವಾಪೊರೇಷನ್ – ಆವಿಯಾಗುವಿಕೆ – ಘನ‌ ಅಥವಾ ದ್ರವ ಸ್ಥಿತಿಯಿಂದ ವಸ್ತುವು ಅನಿಲ ಸ್ಥಿತಿಗೆ ಬದಲಾಗುವ ಪ್ರಕ್ರಿಯೆ.

ಯೂಲರ್ ಫೋರ್ಸ್ – ಎರಡೂ ಪಕ್ಕಗಳಲ್ಲೂ ಎರಡು ಕಂಬಗಳ ಆಧಾರದ ಮೇಲೆ ನಿಂತಿರುವಂತಹ ತೊಲೆಯನ್ನು ಬಗ್ಗಿಸಲು ಬೇಕಾದ ನಿರ್ಣಾಯಕ ಬಲ.‌

ಈಥರ್ – ಒಂದು ಕಾಲ್ಪನಿಕ ದ್ರವ. ಮುಂಚಿನ ಕಾಲದಲ್ಲಿ,  ಇದು ಇಡೀ ಖಗೋಳ ವಿಶ್ವವನ್ನು ವ್ಯಾಪಿಸಿದೆ ಮತ್ತು ವಿದ್ಯುತ್ ಕಾಂತೀಯ ಅಲೆಗಳ ಚಲನೆಗೆ ಮಾಧ್ಯಮವಾಗಿದೆ  ಎಂದು ತಿಳಿಯಲಾಗಿತ್ತು.

ಎಲೆಕ್ಟ್ರಾನ್ ಸ್ಪಿನ್ ರೆಸೋನೆನ್ಸ್ – ಎಲೆಕ್ಟ್ರಾನು ಗಿರಕಿ ಅನುರಣನ‌ – ವರ್ಣಪಟಲ ದರ್ಶಕ ವ್ಯವಸ್ಥೆ ( spectroscopy) ಯಲ್ಲಿ ಬಳಸುವ ಒಂದು ಕಾರ್ಯವಿಧಾನ ಇದು. ಎಲೆಕ್ಟ್ರಾನಿನ ಗಿರಕಿಯನ್ನು ಮತ್ತು ಅದಕ್ಕೆ ಸಂಬಂಧಿಸಿದ ಕಾಂತೀಯ ತಿರುಗುಬಲವನ್ನು ಆಧರಿಸಿ, ಅಣು ವೊಂದರಲ್ಲಿ ಎಲೆಕ್ಟ್ರಾನೊಂದು ಎಲ್ಲಿದೆ ಎಂದು ತಿಳಿಯುವಲ್ಲಿ ಈ ವಿಧಾನವು ಸಹಾಯ ಮಾಡುತ್ತದೆ.

ಎಲೆಕ್ಟ್ರೋಸ್ಟ್ಯಾಟಿಕ್ ಯೂನಿಟ್ – ಸ್ಥಾಯಿ ವಿದ್ಯುತ್ ಮೂಲಮಾನ – ಸಿಜಿಎಸ್( ಸೆಂಟಿಮೀಟರ್, ಗ್ರಾಂ, ಸೆಕೆಂಡ್) ಮೂಲಮಾನ ವ್ಯವಸ್ಥೆಯಲ್ಲಿನ ಸ್ಥಾಯಿವಿದ್ಯುತ್ ಮೂಲಮಾನಗಳು. ಉದಾಹರಣೆಗೆ ಸ್ಟ್ಯಾಟ್ ಕೂಲಂಬ್, ಸ್ಟ್ಯಾಟ್ ವೋಲ್ಟ್.