ಕನ್ನಡ ಕನ್ನಡಿ

ಮ್ಯಾಗ್ನೆಟಿಕ್ ಪ್ರೋಬ್ – ಕಾಂತೀಯ ಪತ್ತೆ ಸಾಧನ – ಒಂದು ಚಿಕ್ಕ ವಾಹಕ ಸುರುಳಿ ಇದು. ಇದನ್ನು ಒಂದು ಕಾಂತಕ್ಷೇತ್ರದಲ್ಲಿ‌ ಇಟ್ಟು ಆ ಕಾಂತಕ್ಷೇತ್ರದ ಸಾಮರ್ಥ್ಯದಲ್ಲಿ‌ ಆಗುವ ಬದಲಾವಣೆಗಳನ್ನು ಅಳೆಯುತ್ತಾರೆ.

ಮ್ಯಾಗ್ನೆಟಿಕ್ ರೆಸಿಸ್ಟೆನ್ಸ್ – ಕಾಂತೀಯ ಪ್ರತಿರೋಧ – ಇದು ಕಾಂತೀಯ ಚಾಲಕ ಬಲಕ್ಕೂ ಕಾಂತೀಯ ಬಲರೇಖೆಗಳಿಗೂ ಇರುವ ಅನುಪಾತ. ಇದು ಕಾಂತೀಯ ಬಲರೇಖೆಗಳಿಗಿರುವ ವಿರೋಧವನ್ನು ಸೂಚಿಸುತ್ತದೆ.

ಮ್ಯಾಗ್ನೆಟಿಕ್ ಸ್ಕ್ಯಾಟರಿಂಗ್ – ಕಾಂತೀಯ ಚದುರುವಿಕೆ – ಪರಮಾಣುಗಳ ತಿರುಗುಬಲದೊಂದಿಗೆ ನ್ಯೂಟ್ರಾನುಗಳ ತಿರುಗುಬಲವು ಅಂತರ್ ಕ್ರಿಯೆ ನಡೆಸಿ ( ಅಂದರೆ ತೊಡಗಿಕೊಂಡು) ನ್ಯೂಟ್ರಾನುಗಳು ಚದುರುವಂತಹ ಪ್ರಕ್ರಿಯೆ ಇದು.

ಮ್ಯಾಗ್ನೆಟಿಕ್ ಶೀಲ್ಡಿಂಗ್ – ಕಾಂತೀಯ ತೆರೆ – ಅತಿ ಹೆಚ್ಚು ಪ್ರವೇಶಸಾಧ್ಯತೆ ಇರುವ ಒಂದು ವಸ್ತುವಿನಿಂದ ಮಾಡಲ್ಪಟ್ಟಂತಹ ಒಂದು‌ ಪರದೆ. ಇದನ್ನು ಯಾವುದಾದರೂ ಉಪಕರಣಗಳನ್ನು ಅನಗತ್ಯ ಕಾಂತಕ್ಷೇತ್ರಗಳ‌ ಪರಿಣಾಮದಿಂದ ರಕ್ಷಿಸಲು ಬಳಸುತ್ತಾರೆ.

ಮ್ಯಾಗ್ನೆಟಿಕ್ ಸಸ್ಸೆಪ್ಟೆಬಿಲಿಟಿ – ಕಾಂತೀಯ ಪರಿಣಾಮಸಾಧ್ಯತೆ – ಇದು ಒಂದು ಆಯಾಮರಹಿತ ಅನುಪಾತ ಸ್ಥಿರಾಂಕ. ಒಂದು ವಸ್ತುವು ಎಷ್ಟರ ಮಟ್ಟಿಗೆ ಅಯಸ್ಕಾಂತಗೊಳ್ಳುತ್ತದೆ ಎಂಬುದರ ಅಳತೆ ಇದು.

ಮ್ಯಾಗ್ನೆಟಿಕ್ ಟೇಪ್ – ಕಾಂತೀಯ ಪಟ್ಟೆದಾರ – ಧ್ವನಿಮುದ್ರಣ(ಟೇಪ್ ರೆಕಾರ್ಡರ್ ) ಗಳಲ್ಲಿ ಬಳಸುವಂತಹ ಒಂದು ಪ್ಲಾಸ್ಟಿಕ್ ಪಟ್ಟೆದಾರ ಅಥವಾ ಟೇಪು‌. ಇದಕ್ಕೆ ಒಂದು ಪ್ರಬಲ ಕಾಂತವಸ್ತುವಿನ ಪುಡಿಯನ್ನು ಲೇಪಿಸಿರುತ್ತಾರೆ‌. ಈ ಪಟ್ಟೆದಾರವನ್ನು ಕಾಂತೀಯ ಮಂಡಲದ ಮಧ್ಯೆ ಇರುವ ಎಡೆಯಲ್ಲಿ ಹುಗಿಸಿ ಮಾಹಿತಿ ದಾಖಲೆಗಾಗಿ ಬಳಸುತ್ತಾರೆ.

ಮ್ಯಾಗ್ನೆಟಿಕ್ ವೇರಿಯೇಷನ್ – ಕಾಂತೀಯ ಮಾರ್ಪಾಡು –  ಭೂಮಿಯ ಮೇಲ್ಮೈಯಲ್ಲಿನ ಒಂದು ಬಿಂದುವಿನಲ್ಲಿ ಸಮಯಕ್ಕೆ ಸಂಬಂಧಿಸಿ, ಅದರ ಕಾಂತೀಯ ಅಂಶಗಳಲ್ಲಿ ಉಂಟಾಗುವ ಮಾರ್ಪಾಟು‌.  ಈ ಮಾರ್ಪಾಡುಗಳಲ್ಲಿ ಕೆಲವು ನಿಧಾನವಾಗಿ, ನಿರಂತರವಾಗಿ ಆಗುತ್ತಿದ್ದರೆ, ಕೆಲವು ಸೂರ್ಯನಲ್ಲಿ ನಡೆಯುವ ಚಟುವಟಿಕೆಗಳಿಂದ ಉಂಟಾದಂತಹ ಕಾಂತ ಬಿರುಗಾಳಿಗಳಿಂದಾಗಿ ಇದ್ದಕ್ಕಿದ್ದಂತೆ ಆಗಿಬಿಡುತ್ತವೆ. ಈ ಪರಿಕಲ್ಪನೆಯನ್ನು ನೌಕಾಯಾನದಲ್ಲಿ ತುಂಬ ಬಳಸುತ್ತಾರೆ.

ಮ್ಯಾಗ್ನೆಟಿಸಂ – ಕಾಂತತೆ – ಕಾಂತಕ್ಷೇತ್ರಗಳಿಗೆ ಸಂಬಂಧಿಸಿದ ಕೆಲವು ವಿದ್ಯಮಾನಗಳ ಒಂದು ಕಟ್ಟು ಅದು. ಇದರಲ್ಲಿ ವಿರುದ್ಧ ಕಾಂತತೆ, ದುರ್ಬಲ ಕಾಂತತೆ,‌ ಪ್ರಬಲ ಕಾಂತತೆ, ಸ್ವಯಂ ವಿರುದ್ಧ ಕಾಂತತೆ ….. ಹೀಗೆ ಅನೇಕ ವಿಧಗಳಿವೆ.

ಮ್ಯಾಗ್ನೆಟೋ ಹೈಡ್ರೋಡೈನಮಿಕ್ಸ್ – ಕಾಂತೀಯ ದ್ರವ ಬಲವಿಜ್ಞಾನ – ವಾಹಕತೆಯುಳ್ಳ ದ್ರವಗಳ ಜೊತೆಗೆ ( ಉದಾಹರಣೆಗೆ, ಪ್ಲಾಸ್ಮಾ ಅಥವಾ ದ್ರವರೂಪೀ ಲೋಹ) ಹೇಗೆ ಕಾಂತಕ್ಷೇತ್ರಗಳು ವರ್ತಿಸುತ್ತವೆ ಎಂಬುದನ್ನು ಹೇಳುವ ವಿಜ್ಞಾನ.

ಮ್ಯಾಗ್ನೆಟೋ ಮೋಟಿವ್ ಫೋರ್ಸ್ ( ಮ್ಯಾಗ್ನೆಟಿಕ್ ಪೊಟೆನ್ಶಿಯಲ್ ) – ಕಾಂತೀಯ ಚಾಲಕ ಬಲ( ಕಾಂತೀಯ ಅಂತಃ ಸಾಮರ್ಥ್ಯ) – ವಿದ್ಯುನ್ಮಂಡಲದಲ್ಲಿ ವಿದ್ಯುತ್ ಚಾಲಕ ಬಲವಿದ್ದಂತೆ ಕಾಂತೀಯ ಮಂಡಲದಲ್ಲಿ ಕಾಂತೀಯ ಚಾಲಕ ಬಲ. ಇದು ಒಂದು ಪೂರ್ಣಪಥದಲ್ಲಿನ‌ ಕಾಂತಕ್ಷೇತ್ರದಲ್ಲಿನ  ಒಂದು ಗಣಿತೀಯ ಗುಣಕ ( ಇಂಟೆಗ್ರಲ್). ಇದರ ಮೂಲಮಾನ‌ ಆಂಪಿಯರ್ ಟರ್ನ್.