ಕನ್ನಡ ಕನ್ನಡಿ

ಮ್ಯಾಗ್ನೆಟಿಕ್ ಇಂಟೆನ್ಸಿಟಿ – ಕಾಂತೀಯ ತೀಕ್ಷ್ಣತೆ – ಒಂದು ಕಾಂತಕ್ಷೇತ್ರದ ಒಂದು ಬಿಂದುವಿನಲ್ಲಿ ‌ಇಟ್ಟಂತಹ ಏಕಘಟಕ ಉತ್ತರಧ್ರುವವು ಅನುಭವಿಸುವ ಬಲವನ್ನು ಕಾಂತೀಯ ತೀಕ್ಷ್ಣತೆ ಎನ್ನುತ್ತಾರೆ. ಇದರ ಮೂಲಮಾನ ಆಂಪಿಯರ್ ಪರ್ ಮೀಟರ್.

ಮ್ಯಾಗ್ನೆಟಿಕ್ ಮೆರಿಡಿಯನ್ – ಕಾಂತೀಯ ರೇಖಾಂಶ – ಭೂಮಿಯ ಕಾಂತಕ್ಷೇತ್ರದ ದಿಕ್ಕನ್ನು ತನ್ನಲ್ಲಿ‌ ಇಟ್ಟುಕೊಂಡಿರುವಂತಹ ಒಂದು ಲಂಬನೇರದ ಮೇಲ್ಮೈ.

ಮ್ಯಾಗ್ನೆಟಿಕ್ ಮಿರರ್ – ಕಾಂತೀಯ ಕನ್ನಡಿ – ಉಷ್ಣಬೀಜಕೇಂದ್ರ ಪ್ರಯೋಗದ ಉಪಕರಣಗಳಲ್ಲಿ ಪ್ಲಾಸ್ಮಾ ( ವಸ್ತುವಿನ ನಾಲ್ಕನೆಯ ಸ್ಥಿತಿ – ಅತ್ಯುನ್ನತ ವಿದ್ಯುದಣುಕೃತ ಅನಿಲ ಸ್ಥಿತಿ) ವನ್ನು ಹಿಡಿದಿಟ್ಟುಕೊಳ್ಳಲು ಬಳಸುವ ಒಂದು ಉಪಕರಣವಿದು. ಇದರಲ್ಲಿ ಒಂದು ಕೊಳವೆಯ ತುದಿಯಲ್ಲಿ ಅತಿಹೆಚ್ಚು ಕಾಂತಕ್ಷೇತ್ರಶಕ್ತಿಯಿರುವ ಪ್ರದೇಶವಿರುತ್ತದೆ. ಈ ಪ್ರದೇಶವನ್ನು ಪ್ರವೇಶಿಸುವ ವಿದ್ಯುದಣುಗಳು ಥಟ್ಟನೆ ತಮ್ಮ ಚಲನೆಯ ವಿರುದ್ಧ ದಿಕ್ಕಿಗೆ ತಿರುಗಿ, ತಾವು ಯಾವ ಪ್ಲಾಸ್ಮಾದಿಂದ ಹುಟ್ಟಿದ್ದವೋ ಅದಕ್ಕೆಯೇ ಹಿಮ್ಮರಳುತ್ತವೆ.

ಮ್ಯಾಗ್ನೆಟಿಕ್ ಮೊಮೆಂಟ್ – ಕಾಂತೀಯ ತಿರುಗುಬಲ‌ – ಇದು ಒಂದು ಕಾಂತಕ್ಷೇತ್ರದ ದಿಕ್ಕಿಗೆ ತಿರುಗಿಕೊಳ್ಳಲು ಒಂದು ವಸ್ತುವಿನಲ್ಲಿರುವ ಪ್ರವೃತ್ತಿ ಎಷ್ಟು ಎಂಬುದರ ಅಳತೆ.

ಮ್ಯಾಗ್ನೆಟಿಕ್  ಮೋನೋಪೋಲ್ – ಕಾಂತೀಯ ಏಕಧ್ರುವ – ಇರಬಹುದು ಎಂದು ಊಹಿಸಲಾದ  ಆದರೆ ಇನ್ನೂ ಪತ್ತೆ  ಮಾಡಲ್ಪಟ್ಟಿರದ ಒಂದು ಮೂಲಭೂತ ಕಣ. ಇದು ಪ್ರತ್ಯೇಕಿಸಲ್ಪಟ್ಟ ಉತ್ತರ ಧ್ರುವ ಅಥವಾ ದಕ್ಷಿಣ ಧ್ರುವಕ್ಕೆ ಸಮ.

ಮ್ಯಾಗ್ನೆಟಿಕ್ ಪೆಂಡ್ಯುಲಂ – ಕಾಂತೀಯ ಆಂದೋಲಕ – ದಾರದಿಂದ ತೂಗು ಹಾಕಲ್ಪಟ್ಟ ಒಂದು ಸರಳ ಆಯತಾಕಾರದ ಅಯಸ್ಕಾಂತ ಬಿಲ್ಲೆ. ಇದಕ್ಕೆ ಅಡ್ಡ ದಿಕ್ಕಿನಲ್ಲಿರುವ ಕಾಂತಕ್ಷೇತ್ರವನ್ನು ಹಾಯಿಸಿದಾಗ ಇದು ಲೋಲಕದಂತೆ ಆ ಕಡೆಗೊಮ್ಮೆ ಈ ಕಡೆಗೊಮ್ಮೆ ಚಲಿಸಲಾರಂಭಿಸುತ್ತದೆ‌.

ಮ್ಯಾಗ್ನೆಟಿಕ್ ಪರ್ಮಿಯೆಬಿಲಿಟಿ – ಕಾಂತೀಯ ಪ್ರವೇಶಸಾಧ್ಯತೆ – ಕಾಂತಕ್ಷೇತ್ರವೊಂದು ಎಷ್ಟರ ಮಟ್ಟಿಗೆ ಒಂದು ವಸ್ತುವಿನೊಳಗೆ ಪ್ರವೇಶಿಸಬಹುದು ಎಂಬುದರ ಅಳತೆ ಇದು‌. 

ಮ್ಯಾಗ್ನೆಟಿಕ್ ಪೋಲ್ – ಕಾಂತೀಯ ಧ್ರುವ ( ಕಾಂತ ಧ್ರುವ) – ಒಂದು ಅಯಸ್ಕಾಂತದ ಪ್ರತಿಯೊಂದು ತುದಿಯಲ್ಲೂ ಕಾಂತಕ್ಷೇತ್ರವು ಅತ್ಯಂತ ಪ್ರಬಲವಾಗಿರುತ್ತದೆ‌. ಈ ತುದಿಯನ್ನು ಕಾಂತೀಯ ಧ್ರುವ ಅಥವಾ ಕಾಂತ ಧ್ರುವ ಎನ್ನುತ್ತಾರೆ.

ಮ್ಯಾಗ್ನೆಟಿಕ್ ಪೋಲ್ ಸ್ಟ್ರೆಂಗ್ತ್ – ಕಾಂತೀಯ ಧ್ರುವ ಶಕ್ತಿ – ಒಂದು ಅಯಸ್ಕಾಂತದ ಧ್ರುವಶಕ್ತಿಯನ್ನು ಆ ಅಯಸ್ಕಾಂತಕ್ಕೆ ವಸ್ತುಗಳು ಆಕರ್ಷಿತವಾಗುವ ಬಲವೆಂದು ವ್ಯಾಖ್ಯಾನಿಸಲಾಗುತ್ತದೆ.

ಮ್ಯಾಗ್ನೆಟಿಕ್ ಪೊಟೆನ್ಶಿಯಲ್ – ಕಾಂತೀಯ ಅಂತಸ್ಥ ಬಲ – ಕಾಂತೀಯ ಚಾಲಕ ಬಲ‌. ಇದು ಒಂದು ವಿದ್ಯುನ್ಮಂಡಲದಲ್ಲಿನ ಚಾಲಕ ಬಲಕ್ಕೆ  ಸಂವಾದಿಯಾಗಿರುವಂಥದ್ದು ಎನ್ನಬಹುದು.