ಕನ್ನಡ ಕನ್ನಡಿ

ಹಾಟ್ ವಯರ್ ಮೈಕ್ರೋಫೋನ್ – ಧ್ವನಿಶಕ್ತಿ ಮಾಪಕ – ಶಬ್ಧದ ಅಲೆಗಳ ಎತ್ತರ ಮತ್ತು ತೀಕ್ಷ್ಣತೆಯನ್ನು ಅಳೆಯಲು ಬಳಸುವಂತಹ ಉಪಕರಣ. ಇದರಲ್ಲಿ ವಿದ್ಯುತ್ತಿನ ಮೂಲಕ  ಕಾಯಿಸಲಾದ ಒಂದು ತಂತಿಗೆ ಶಬ್ಧದ ಅಲೆಗಳನ್ನು ಹಾಯಿಸಿದಾಗ ಅದರ ಪ್ರತಿರೋಧವು ಕಡಿಮೆಯಾಗುವುದನ್ನು ಅವಲಂಬಿಸಿ‌, ಶಬ್ಧದ ತೀಕ್ಷ್ಣತೆಯನ್ನು ಅಳೆಯಲಾಗುತ್ತದೆ.

ಹಮ್ಮ್ – ಗುಂಯ್ ಎಂಬ ಸದ್ದು – ವಿದ್ಯುತ್ ಬಲವರ್ಧಕವು ನೀಡುವ ಹೊರಹರಿವಿನಲ್ಲಿ ( ಔಟ್ ಪುಟ್) ಉಂಟಾಗುವ ಬಾಹ್ಯ, ಪರ್ಯಾಯ ವಿದ್ಯುತ್ ಪ್ರವಾಹಗಳು‌. ಇವುಗಳ ಮೂಲವು ನಮ್ಮ ಗಮನದಲ್ಲಿರುವ ಉಪಕರಣಕ್ಕೆ ಜೋಡಿಸಲಾದ ಒಂದು ಉಪಕರಣ ಅಥವಾ ಅದಕ್ಕೆ ಹತ್ತಿರದಲ್ಲಿ ಇರಿಸಿರುವ ವಿದ್ಯುನ್ಮಂಡಲಗಳಲ್ಲಿ ಇರುತ್ತದೆ.

ಹ್ಯೂಮಿಡಿಟಿ – ತೇವಾಂಶ – ಗಾಳಿಯಲ್ಲಿರುವ ನೀರಿನ ಆವಿಯ ಅಂಶದ ಅಳತೆ ಇದು. ‘ಪರಮ ತೇವಾಂಶ’ವನ್ನು ವಾಯುವಿನ ಏಕಘಟಕ ಪರಿಮಾಣದಲ್ಲಿರುವ ನೀರಿನ ಆವಿಯ ಪ್ರಮಾಣವೆಂದು ನಿರೂಪಿಸಲಾಗುತ್ತದೆ.

ಹೈಗನ್ಸ್ ಕನ್ಸಟ್ರಕ್ಷನ್ – ಹೈಗನ್ ರ (ಅಲೆ)ನಿರ್ಮಿತಿ – ಈಗಾಗಲೇ ಇರುವ ಅಲೆಯೊಂದರಿಂದ ಅದರ ನಂತರ ಏಳುವ ಮತ್ತೊಂದು ಅಲೆಯನ್ನು ನಿರ್ಮಿಸುವ ಒಂದು ವಿಧಾನ. ಹೈಗನ್ ರ ಸಿದ್ಧಾಂತವು ಅಲೆಗಳ ಅಡ್ಡ ಹಾಯುವಿಕೆ( ಇಂಟರ್ ಫರೆನ್ಸ್) ಮತ್ತು ಹಬ್ಬುವಿಕೆ ( ಡಿಫ್ರ್ಯಾಕ್ಷನ್)ಗಳಿಗೆ  ಉತ್ತಮವಾದ ವಿವರಣೆಯನ್ನು ನೀಡುತ್ತದೆ.

ಹೈಗನ್ಸ್ ಪ್ರಿನ್ಸಿಪಲ್ – ಹೈಗನ್ಸ್ ರ ಸಿದ್ಧಾಂತ – ಒಂದು ಅಲೆಯ ಮೇಲಿನ ಪ್ರತಿಯೊಂದು ಬಿಂದುವನ್ನು ಸಹ ಅದರಿಂದ ಹುಟ್ಟುವ ಆನುಷಂಗಿಕ ( ಪುಟ್ಟ ಹೊಸ) ಅಲೆಗಳ ಕೇಂದ್ರವೆಂಬಂತೆ ಪರಿಗಣಿಸಬಹುದು‌. ಈ ಹೊಸ ಆನುಷಂಗಿಕ ಅಲೆಗಳ ಅಡ್ಡಹಾಯುವಿಕೆಯ ಫಲಿತವಾಗಿ ಹುಟ್ಟುವ ಅಲೆಗಳು ಮೂಲ ಅಲೆಗಳ ತರಹವೇ ಇರುತ್ತವೆ‌.

ಹೈಬ್ರಿಡ್ ಐ ಸಿ – ಮಿಶ್ರ ವಿದ್ಯುನ್ಮಂಡಲ – ಒಂದು ಆಧಾರದ ಮೇಲೆ ( ಸಿಲಿಕಾನ್ ಚಿಪ್ಪು), ಒಂದು  ಅಥವಾ ಅದಕ್ಕಿಂತ ಹೆಚ್ಚು ಭಾಗಗಳನ್ನು ಏರಿಸಿದ  ಅಥವಾ ಜೋಡಿಸಿದ ವಿದ್ಯುನ್ಮಂಡಲ.

ಹೈಡ್ರಾಲಿಕ್ ಪ್ರೆಸ್ – ಜಲಸಾಮರ್ಥ್ಯದ ಒತ್ತುಯಂತ್ರ – ದ್ರವವೊಂದರಲ್ಲಿನ ಒತ್ತಡದ ಮೂಲಕ‌ ಬಲಗಳು ವರ್ಗಾಯಿಸಲ್ಪಡುವ ಒಂದು ಯಂತ್ರ.

ಹೈಡ್ರೋಡೈನಮಿಕ್ಸ್ – ಜಲಚಲನಾ ಶಾಸ್ತ್ರ – ಒತ್ತರಿಸಲಾಗದ ( ಇನ್ಕಂಪ್ರೆಸ್ಸಿಬಲ್)  ದ್ರವಗಳ ಚಲನೆ ಮತ್ತು ತಮ್ಮ ಸೀಮೆಗಳ‌  ಜೊತೆ ಈ ದ್ರವಗಳ ಅಂತರ್ ಕ್ರಿಯೆಗಳನ್ನು ಕುರಿತ ಅಧ್ಯಯನ. 

ಹೈಡ್ರೋ ಎಲೆಕ್ಟ್ರಿಕ್ ಪವರ್ – ಜಲವಿದ್ಯುತ್ ಶಕ್ತಿ – ನೀರಿನ ಹರಿಯುವಿಕೆಯಿಂದ ಉತ್ಪತ್ತಿ ಮಾಡಿದ ವಿದ್ಯುಚ್ಛಕ್ತಿ. ಸಹಜ ಜಲಪಾತಗಳು ಈ ಶಕ್ತಿಗೆ ಆಕರವನ್ನು ಒದಗಿಸುತ್ತವೆ.

ಹೈಡ್ರೋಜನ್ ಬಾಂಬ್ – ಜಲಜನಕ ಸ್ಫೋಟವಸ್ತು (ಬಾಂಬು) – ಅತ್ಯಂತ ಹೆಚ್ಚಿನ ಉಷ್ಣತೆಯಲ್ಲಿ ಜಲಜನಕ ಬೀಜಕೇಂದ್ರಗಳ ಸೇರುವಿಕೆಯ ಪ್ರಕ್ರಿಯೆಗಳಿಂದ ನಿರ್ಮಿತವಾಗುವ ಬಲಾಢ್ಯ ಸ್ಫೋಟಕ ವಸ್ತು ಇದು. ಈ ಸೇರುವಿಕೆಯು ಉಷ್ಣತೆಯ ರೂಪದಲ್ಲಿ ಅತ್ಯಂತ ಹೆಚ್ಚಿನ ಶಕ್ತಿಯನ್ನು ಬಿಡುಗಡೆ ಮಾಡುತ್ತದೆ.