ಹ್ಯೂರಿಸ್ಟಿಕ್ – ಮಾಡಿ‌ಕಲಿಯುವ ಅಥವಾ ಸ್ವಂತ ಅನ್ವೇಷಣೆಯ ವಿಧಾನ – ಸಮಸ್ಯೆಯನ್ನು ಪರಿಹಾರ ಮಾಡುವ ಯಾವುದೇ ಕ್ರಮವಿಧಿ ಇಲ್ಲದೆ ಇದ್ದಾಗ, ಮತ್ತೆ ಮತ್ತೆ ಮಾಡಿ ಮಾಡಿ ಸರಿಯಾದ ಪರಿಹಾರ ಹುಡುಕಿಕೊಳ್ಳುವ ರೀತಿ. ‌ಬೇರೆ ಪದಗಳಲ್ಲಿ ಹೇಳಬೇಕೆಂದರೆ ಪ್ರಯತ್ನ ಮತ್ತು ತಪ್ಪುಗಳಿಂದ ( Trial and error) ಪರಿಹಾರ ಕಂಡುಕೊಳ್ಳುವ ವಿಧಾನ.

ಹೆಟಿರೋಡೈನ್ – ಅಲೆಸಂಯೋಜಕ ಅಥವಾ ಭಿನ್ನ ಅಲೆ ಮಿಶ್ರಕ‌ – ಒಳಬರುತ್ತಿರುವ ಅಲೆಯೊಂದರ ಮೇಲೆ ತಾನೇ ಉತ್ಪತ್ತಿ ಮಾಡಿದ ರೇಡಿಯೋ ( ವಿದ್ಯುತ್ ಕಾಂತೀಯ) ಅಲೆಯೊಂದನ್ನು‌ ಹಾಯಿಸಿ, ಬಡಿತವು ಉತ್ಪತ್ತಿಯಾಗುವಂತೆ ಮಾಡುವ ಉಪಕರಣ ಅಥವಾ ವಿಧಾನ.

ಹೆಟಿರೋಜೀನಸ್ ರಿಯಾಕ್ಟರ್ – ಭಿನ್ನವಸ್ತು ಮಿಶ್ರಿತ ಅಣುಸ್ಥಾವರ – ಇಂಧನವನ್ನು ಮಂದಕ ( moderator) ದಿಂದ ಪ್ರತ್ಯೇಕವಾಗಿ ಇರಿಸಿದ ಅಣುಸ್ಥಾವರ. ಇಲ್ಲಿ ನೂಟ್ರಾನುಗಳಿಗೆ ಭಿನ್ನವಸ್ತುಗಳಿಂದ ಕೂಡಿದ ಒಂದು ಮಿಶ್ರಣ ದೊರಕುತ್ತದೆ.

ಹರ್ಟ್ಝ್( Hz) – ಪುನರಾವರ್ತನೆಯ ಎಸ್.ಐ.ಮೂಲಮಾನ‌- 1 ಹರ್ಟ್ಝ್ – 1 ಸೆಕೆಂಡಿಗೆ ಒಂದು ಸುತ್ತು ಅಥವಾ 1 ಸೆಕೆಂಡಿಗೆ ಒಂದು ಆವರ್ತನ.‌ ಜರ್ಮನಿಯ ವಿಜ್ಞಾನಿ ಹೇನ್ರಿಚ್ ಹರ್ಟ್ಝ್ ರ ನೆನಪಿನಲ್ಲಿ ಇಟ್ಟ ಹೆಸರು. ವಿದ್ಯುತ್ ಕಾಂತೀಯ ಅಲೆಗಳ ಅಸ್ತಿತ್ವವನ್ನು ವಾಸ್ತವಿಕವಾಗಿ ಮೊದಲ ಬಾರಿಗೆ ತೋರಿಸಿಕೊಟ್ಟವರಿವರು.

ಹೆನ್ರಿ( H) – ಹೆನ್ರಿ ( H) – ಸ್ವಯಂ ವಿದ್ಯುತ್ ಪ್ರೇರಕತೆ ಅಥವಾ ಪರಸ್ಪರ ವಿದ್ಯುತ್ ಪ್ರೇರಕತೆಯ ಎಸ್.ಐ.ಮೂಲಮಾನ ಇದು. 1H = 1 ವೆಬರ್ /ಆಂಪಿಯರ್. ಜೋಸೆಫ್ ಹೆನ್ರಿ (1797-1878) ಎಂಬ ಅಮೆರಿಕಾದ ಭೌತಶಾಸ್ತ್ರಜ್ಞರ ನೆನಪಿನಲ್ಲಿ ಇಟ್ಟ ಹೆಸರು. ವಿದ್ಯುತ್ ಪ್ರೇರಕತೆಯನ್ನು ಕಂಡು ಹಿಡಿದ ವಿಜ್ಞಾನಿ ಇವರು.

ಹೀಲಿಯಂ ನಿಯಾನ್ ಲೇಸರ್ – ಹೀಲಿಯಂ ‌ನಿಯಾನ್ ತೀಕ್ಷ್ಣ ಬೆಳಕು‌ – ಹೀಲಿಯಂ ಮತ್ತು ನಿಯಾನ್ ಅನಿಲಗಳನ್ನು ಬಳಸುವ ಪರಮಾಣೀಯ ತೀಕ್ಷ್ಣ ಬೆಳಕು.

ಹೆಲಿಕ್ಸ್ – ಸುರುಳಿ – ನೈಸರ್ಗಿಕವಾಗಿ ದೊರೆಯುವ ಅನೇಕ ದೊಡ್ಡ ಗಾತ್ರದ ಅಣುಗಳು, ಉದಾಹರಣೆಗೆ, ಪ್ರೋಟೀನುಗಳು ಮತ್ತು ನ್ಯೂಕ್ಲಿಯಿಕ್ ಆಮ್ಲಗಳು ಸುರುಳಿಯಾಕಾರದಲ್ಲಿರುತ್ತವೆ.

ಹೀಲಿಯೋಸ್ಕೋಪ್ – ಸೂರ್ಯದರ್ಶಕ – ಸೂರ್ಯನನ್ನು ಗಮನಿಸಲು ಬಳಸುವ ದೂರದರ್ಶಕ. ಸೂರ್ಯನ ತೀಕ್ಷ್ಣಪ್ರಕಾಶದಿಂದಾಗಿ ಗಮನಿಸುವವರ ಕಣ್ಣುಗಳಿಗೆ ಅಪಾಯವಾಗದಂತೆ ಇದನ್ನು ವಿನ್ಯಾಸ ಮಾಡಿರುತ್ತಾರೆ.

ಹೀಲಿಯೋಸೆಂಟ್ರಿಕ್ – ಸೂರ್ಯಕೇಂದ್ರಿತ – 

ಅ. ಸೂರ್ಯನನ್ನು ಕೇಂದ್ರವಾಗಿ‌ ಉಳ್ಳಂಥದ್ದು

ಆ. ಸೂರ್ಯನ ಕೇಂದ್ರದಿಂದ ಅಳೆಯಲ್ಪಟ್ಟದ್ದು

ಹೀಲಿಯೋಮೀಟರ್ – ಸೂರ್ಯಮಾಪಕ‌ – ವಿಶೇಷ ವಿನ್ಯಾಸದಿಂದ ಸಿದ್ಧವಾದ, ಸೀಳಿದ ಮಸೂರವನ್ನು ಹೊಂದಿರುವ ದೂರದರ್ಶಕ. ಇದನ್ನು ಸೂರ್ಯನ ವ್ಯಾಸವನ್ನು ಮತ್ತು ನಕ್ಷತ್ರಗಳ ನಡುವಿನ ದೂರವನ್ನು ಅಳೆಯಲು ಬಳಸುತ್ತಾರೆ.