– ಹೋಮೋಪೋಲಾರ್ ಜನರೇಟರ್ ( ಫ್ಯಾರಡೇ ಡಿಸ್ಕ್) 

– ಏಕಧ್ರುವ ವಿದ್ಯುದುತ್ಪಾದಕ ( ಫ್ಯಾರಡೇ ತಟ್ಟೆ) – ಒಂದು ಲೋಹದ ತಟ್ಟೆ ಹಾಗೂ ತನ್ನ ಮೇಲ್ಮೈಗೆ ಲಂಬಕೋನದಲ್ಲಿ ಸುತ್ತುತ್ತಿರುವ ಕಾಂತಕ್ಷೇತ್ರವನ್ನು ಹೊಂದಿರುವಂತಹ,  ‘ನೇರ ವಿದ್ಯುತ್’ ಉತ್ಪಾದಕ ಇದು. ಈ ತಟ್ಟೆಯ ಕೇಂದ್ರ ಮತ್ತು ತುದಿಗಳ ನಡುವೆ ವಿದ್ಯುತ್ ಚಾಲಕ ಶಕ್ತಿಯು ಪ್ರೇರಿತಗೊಳ್ಳುತ್ತದೆ.

ಹೋಮೋಜೀನಸ್ ರಿಯಾಕ್ಟರ್ – ಸಮಜಾತೀಯ ಅಣುಸ್ಥಾವರ – ಅಣುಸ್ಥಾವರವೊಂದರಲ್ಲಿ ನ್ಯೂಟ್ರಾನುಗಳ ವಿದಳನ ಕಾರ್ಯಕ್ಕಾಗಿ ವಿದಳನ ವಸ್ತು ಮತ್ತು ಮಂದಕಾರಕಗಳನ್ನು ಚೆನ್ನಾಗಿ ಬೆರೆಸಿದ್ದರೆ( ಅಂದರೆ ಸಮಜಾತೀಯ ಮಿಶ್ರಣವಾಗುವಂತೆ) ಅದು ಸಮಜಾತೀಯ ಅಣುಸ್ಥಾವರ ಅನ್ನಿಸಿಕೊಳ್ಳುತ್ತದೆ.

ಹೋಲೋಗ್ರಫಿ – ಮೂರು ಆಯಾಮಗಳ ಛಾಯಾಚಿತ್ರ ಗ್ರಹಣ – ಲೇಸರ್ ಬೆಳಕು ಹಾಗೂ ಛಾಯಾಚಿತ್ರ ಫಲಕಗಳನ್ನು ಬಳಸಿ ಒಂದು ವಸ್ತುವಿನ ಬಿಂಬವನ್ನು ಮೂರು ಆಯಾಮಗಳಲ್ಲಿ ದಾಖಲಿಸುವುದು ಮತ್ತು ಪ್ರದರ್ಶಿಸುವುದು.‌ ಹಂಗೇರಿಯ ಭೌತಶಾಸ್ತ್ರಜ್ಞರಾದ ಡೆನ್ನಿಸ್ ಗೇಬರ್ ಇದನ್ನು 1948ರಲ್ಲಿ ಕಂಡುಹಿಡಿದರು. ಇವರಿಗೆ ಈ ಸಂಶೋಧನೆಗಾಗಿ 1971ರಲ್ಲಿ ನೊಬೆಲ್ ಪ್ರಶಸ್ತಿ ಬಂತು.

ಹೋಲೋಗ್ರಾಂ – (ಮೂರು ಆಯಾಮಗಳ) ಪೂರ್ಣಚಿತ್ರ ದಾಖಲೆ – ಪೂರ್ಣಚಿತ್ರ ಗ್ರಹಣದಲ್ಲಿ ಮೂರು ಆಯಾಮಗಳ ಬಿಂಬವನ್ನು ಪುನರುತ್ಪತ್ತಿ ಮಾಡುವಾಗ ಬಳಸುವ ಒಂದು ಛಾಯಾಚಿತ್ರ ದಾಖಲೆ.

ಹೋಲ್ – ರಂಧ್ರ – ಒಂದು ಘನವಸ್ತುವಿನ  ಕಿಂಡಿ ಚೌಕಟ್ಟಿನ (ಲ್ಯಾಟಿಸ್) ರಚನೆಯಲ್ಲಿ ಎಲೆಕ್ಟ್ರಾನೊಂದು ಇದ್ದು, ಈಗ ಖಾಲಿಯಾಗಿರುವ ಜಾಗ. ರಂಧ್ರವು ಒಂದು ‘ಸಂಚಾರಿ- ಧನಾತ್ಮಕ – ವಿದ್ಯುದಂಶ-ಒಯ್ಯಕ’ ದಂತೆ ಕೆಲಸ ಮಾಡುತ್ತದೆ.

ಹೋಡೋಸ್ಕೋಪ್ – ಗಮನ‌ ಗ್ರಾಹಕ – ವಿದ್ಯುದಂಶ ಹೊಂದಿರುವ ( ಸಾಮಾನ್ಯವಾಗಿ ವಿಶ್ವಾತ್ಮಕ ಕಿರಣಗಳ) ಕಣಗಳ ಪಥವನ್ನು ಗೊತ್ತು ಮಾಡುವ ( ಅವುಗಳ ಜಾಡು ಹಿಡಿಯುವ) ಉಪಕರಣ.

ಹೈ ಟೆನ್ಶನ್ ( HT) – ಉಚ್ಚ ವಿದ್ಯುದೊತ್ತಡ/ ಉಚ್ಚ ವಿದ್ಯುತ್ ಸಾಮರ್ಥ್ಯ ವ್ಯತ್ಯಾಸ ಅಥವಾ ಹೈ ವೋಲ್ಟೇಜ್ – ನೂರು ವೋಲ್ಟ್ ಗಳು ಅಥವಾ ಅದಕ್ಕಿಂತ ಹೆಚ್ಚಿರುವ ವಿದ್ಯುತ್ ಸಾಮರ್ಥ್ಯ ವ್ಯತ್ಯಾಸ.

ಹೈ ಸ್ಪೀಡ್ ಸ್ಟೀಲ್ – ಉಚ್ಚ ವೇಗದ ಉಕ್ಕು – ಮಬ್ಬುಕೆಂಪು ತಾಪ( ಡಲ್ ರೆಡ್ ಹೀಟ್) ದಲ್ಲೂ ತನ್ನ ಕಾಠಿಣ್ಯವನ್ನು ಉಳಿಸಿಕೊಳ್ಳುವಂತಹ ಉಕ್ಕು. ಟಂಗ್ಸ್ಟನ್, ಕ್ರೋಮಿಯಂ, ಇಂಗಾಲ, ವೆನೆಡಿಯಂ, ಮಾಲಿಬ್ಡಿನಮ್ ಮತ್ತು ಇನ್ನೂ ಕೆಲವು ಲೋಹಗಳನ್ನು ಸೇರಿಸಿ‌ ಇದನ್ನು ತಯಾರಿಸುತ್ತಾರೆ.

ಹೈ ಫ್ರೀಕ್ವೆನ್ಸಿ(HF) – ಉಚ್ಚ ಆವರ್ತನ – 3-30 ಮೆಗಾ ಹರ್ಟ್ಝ್ ವರೆಗಿನ‌‌ ಆವರ್ತನವನ್ನು ಹೊಂದಿರುವ ವಿದ್ಯುತ್ಕಾಂತೀಯ ಅಲೆಗಳು, ಅಂದರೆ ಇವುಗಳ ತರಂಗಾಂತರವು 10-100 ಮೀಟರ್ ಆಗಿರುತ್ತದೆ.

ಹ್ಯೂಸ್ಲರ್ ಅಲ್ಲಾಯ್ಸ್ – ಹ್ಯೂಸ್ಲರರ ಮಿಶ್ರಲೋಹಗಳು – ಯಾವುದೇ ಪ್ರಬಲ ಅಯಸ್ಕಾಂತ ಮೂಲವಸ್ತುಗಳು ಇಲ್ಲದ, ವಿಶೇಷ ರೀತಿಯ ಮಿಶ್ರಲೋಹಗಳು‌. ವಿವಿಧ ವಿದ್ಯುನ್ಮಾನ  ಉಪಕರಣಗಳಿಗೆ  ಸಂಬಂಧಿಸಿದಂತೆ ಬಹೂಪಯೋಗಿಯಾದ ಇವನ್ನು 20ನೇ ಶತಮಾನದ ಜರ್ಮನ್  ಗಣಿಯಂತ್ರಜ್ಞಾನಿ ಕಾನ್ರಾಡ್ ಹ್ಯೂಸ್ಲರ್ ರು ಕಂಡುಹಿಡಿದರು.